اخوانى اخواتى الكرام تحية طيبة وبعد .. انا ادرى بتقولون هذا صج زفر ومواضيعه كلها زفرة .. وطبعا الكتاب باين من عنوانه .. الموضوع عن الحداق السالفة صج زفرة بزفرة .. لكن زفرة هالمرة على غير شكل الموضوع عن الحداق وعن سمجتنا هالايام والحين خلونا ندش فى الموضوع امس كنت قاعد مع الربع فى الدوانية ونسولف عن البحر وكان الجو صج جو بحر ويبيله نحرك اصابعنا اللى بدت تخمل و تظهر عليها ملامح النعومة فقررنا انه نروح الحداق .. وبما ان الطلعة مو مخطط لها قلنا خل نروح مكان قريب يعنى اذا باعدنا خمسين ميل بحرى >> يعنى مو بعيد المهم رحت و لبست دشداشة الحداق الزفرة وقعدت ازهب الطراد ومن عقبه ردعت الميادير وجهزت الخيوط على ما يتجمعون الربع تدرون شلون .. اشرايكم تشوفون الطلعة بالصور والتعليق .. يتراولى احسن واخف من الكتابة الوايد واللى مالها داعى
وراح نبدى باول شى قعدت اسويه اللى اهووو تجهيز الطراد وطبعا هالبنت الحلوة مالكم شغل فيها لانها مو من ضمن الموضوع لكن كان فيها حب استطلاع وحبت ترز ويها علشان تعرف شنو بسوى قبل لا اقلص الطراد
وعقب ما خلصت من الطراد وكان كل شى اوكى وعلى حسب الاصول قلت خل اضبط الخيوط واسنع الشغل علشان لا دشينا الا كل شى جاهز وفعلا تليت شنتة الخيوط وفتحت شنتة الميادير وقعدت اردع واجهز شغلى
المهم ضبطت كل شى والربع وصلو قلصنا الطراد ودشينا بحر وصلنا محدقنا وقطينا السن وحطينا طاسة الييم اللى اهى هذى
عاد كل واحد اخذ اخيط وشك ييمته وسمه باسم الله وقط خيطه .. عاد وانا قاط خيطى طرى على ( بومتيين) صاحبنا ليش طرى على هالانسان ما ادرى وذكرت شى ما ودى اذكره بالبحر لان هالشى من ينذكر لازم يطلع واللى اهو هذا ( الجم )
قلت ولييييه اول قطة جم .. عيل كدينا خير واقوم اقط القطة الثانية ولا نبرة جم من خمط عرفته ويوم تليته وقام يطق براسه قلت لا محاله ان جم بل اجزم انه جم وفعلا طلع جم ثانى وهذا اهوو
هم قلت مو مشكلة لكن كنت خايف من الثالثة .. ما بغيت اثولث وعلى فكرة ترى محد صاد جموم الا انا وربعى قاطين خيوطهم لا نبرة ولا شى جنهم قاطين بجليب بس قاعدين يضحكون على ويطنزون وكل شوى هذا مكان يايبنا نحدق فيه مو لو قاعدين فى الدوانية نشرب جاى ونسحق زقاير ابرك المهم وانا قاط خيطى ولا تنبر ذيج النبرة الحلووووة عاد جان اقولهم مو جم هالمرة هذى خوش نبرة .. نبرة طيبة المهم جان اصيده ومن كربت عليه قام يشاوط ويلاوط لا قام يدب براسه جان اقولهم زهبولى المطاعة الحبيب الثالث وصل او واحد منكم يقوم يتل السن نبى نغير مكانا .. وعلى ما سحبت خيطى الا الشباب تالين السن وصاحبنا الجم المحترم شرف اللى اهو هذا
تعالوا تحت شوية علشان تكملون الموضوع v v v v
-------------------- قيد الانشاء المشاركات: 10522 | من: kuwait | تاريخ التسجيل: نوفمبر 2002
|
عاد رحنا مكان ثانى وقطينا ولا اول قطة نويبى قلت هذا احسن من ذاك على الاقل سمجة تونس اشوى ان افتكينا من ذاك ابو الصنق اللى اذانا وهذا اول نويبى .. شوفوا شلون زانطه بس علشان اراويكم الضرسين ملوته شحلاتهم جنه ياهل طايحين ضروسه .. وهذا اهو النويبى
والله قعدنا فى هالمكان فترة تقارب الساعتين واكثر ولا فى شى يذكر وهذا اللى صدناه شى ما يترس العين جم نويبية على جم شعرى هذولى اهم جدامكم بالزبيل
عاد اهنى قلت بلا طراد بلا دوخة راس ماكو الا اروح ميفرتى المحظورة وايد ابرك ويقول المثل شلك بالبحر واهواله وارزاق الله على السيف قلت حق الشباب الظاهر البحر كله شعرى ونويبى نشرع وايد ابرك وفعلا شرعنا وردينا بيوتنا لكن ايدى تحكنى .. وكان ودى احدق على طول اخذت اغراضى ورحت مكانى اللى ما اقدر اخذ ربعى فيه والله وقعدت وقطيت خيطى .. ولا ذيج النبرة الحلوة اللى صج تشرح الصدر تليتها ولا بنت النوخذة شوفوها شحلاتها
وقطيت القطة الثانية ولا هم بنت النوخذة .. قلت اييي هذا الشى اللى يونس وقعد اتل من بنت النوخذة ويخلط معاها شعم وبالوول على ينم شى حلووو وشى طيب شوفوا هالفسكرتين من ناحية الجمال الفسكر احلى سمجة بالبحر ومن ناحية الاكل .. شى عجيب
وتليت من هالفسكر والشعم لين طاب خاطرى .. على فكرة هذا شى من لا شى صدناه الباجى بالثلاجة طبعا .. بس والله كود حلووووو
بس اللى كنت متحسف عليه انى ما صدت مثل السبيطى هذا اللى يعور القلب
ولا مثل هالكود اللى يثلج الصدر .. هذا الواحد اللى وده لا طلع البحر يكون حداقه جذى ماشاء الله .. حداق عجيب وسمجة تسر الخاطر بالوول وشعم ومزيزى وسبيطى وفسكر بعد اهنى بس الواحد لا دش البحر وصاد يقول صدت
فى نهاية الموضوع عندى سؤال بحرنا ليش بدت تنقرض منه السمجة ؟؟ مع ان الخير تارس البحر !!! فى الايام اللى فاتت .. ايام منع دخول البحر بالليل كنا نقول متى يسمحون والله اذونا حارمينا من البحر ومن الحداق لان حداق الليل له لذة وطعم خاص .. والحداق بصفة عامة راحة نفسية ورياضة ذهنية لكن عقب ما اسمحو وشالو المنع .. والله اتمنى يردون يمنعون الحداق وطلعة الطراريد واى قطعة بحرية بالليل لان الكرافات نشفو البحر .. وما تسلم شباكهم من اى سمجة .. او على الاقل يمنعون الكرافات ولا يحددون لهم وقت وفى النهاية اتمنى يعجبكم الموضوع وتعبى ما يرووح بلووووشى
اخوكم / الســــــاحــــــــــر
[ 24. أكتوبر 2003, 10:05 PM: تم تحرير المشاركه من قبل: AL-SA7ER ]
-------------------- قيد الانشاء المشاركات: 10522 | من: kuwait | تاريخ التسجيل: نوفمبر 2002
|
رد مقتبس:اخوانى اخواتى الكرام تحية طيبة وبعد .. انا ادرى بتقولون هذا صج زفر ومواضيعه كلها زفرة .. وطبعا الكتاب باين من عنوانه .. الموضوع عن الحداق السالفة صج زفرة بزفرة .. لكن زفرة هالمرة على غير شكل الموضوع عن الحداق وعن سمجتنا هالايام والحين خلونا ندش فى الموضوع امس كنت قاعد مع الربع فى الدوانية ونسولف عن البحر وكان الجو صج جو بحر ويبيله نحرك اصابعنا اللى بدت تخمل و تظهر عليها ملامح النعومة
بعد شبدي انت اي نعومه يا بو خلي هذي ايد سياف مو حداق
مشالله عليه الله يعطيه الصحه والعافيه انشالله
رد مقتبس:عاد كل واحد اخذ اخيط وشك ييمته وسمه باسم الله وقط خيطه .. عاد وانا قاط خيطى طرى على ( بومتيين) صاحبنا ليش طرى على هالانسان ما ادرى
انا اقولك ليش قاعد تفكر وتقول صيد اليوم كله ما راح يشبعه شسوي الحين
رد مقتبس: عاد رحنا مكان ثانى وقطينا ولا اول قطة نويبى قلت هذا احسن من ذاك على الاقل سمجة تونس اشوى ان افتكينا من ذاك ابو الصنق اللى اذانا وهذا اول نويبى .. شوفوا شلون زانطه بس علشان اراويكم الضرسين ملوته شحلاتهم جنه ياهل طايحين ضروسه .. وهذا اهو النويبى
الله يعينه على زنطتك يا بو خلي انا اشهد ان لو ترده البحر يحرم يقرب من اي ميدار الا اجزم انه يقرر يموت يوووع
مشالله كل هذا وطلعه مو متزهبين لها اجل وشلون لو تعزم وتفكر قبل اسبوع اظني انك بتنشف البحر يا بعد شبدي
بس ما قلت لي وين الخثاااااااااااااااااااااااااق؟؟؟؟؟؟؟؟؟؟؟؟؟؟؟؟؟؟؟؟؟
بنت الديرة انتى والله اللى ششششششششى وشى عجيب بعد حاااااظر غالى والطلب رخيص .. اعتبرى الخثاق وصل انشاء الله بعد رمضان تامريين امر
رد مقتبس: يا عيني عليك سويحر اثاريك صياد مو ساحر
الجوكر انت ماسمعت الاغنية اللى يقولون فيها عمى ياصياد السمج صيدلى بنية هذى عنى غنوها .. ومن عقبها صرت صياد بس زقيرووووون
رد مقتبس: ماتعلمنا وين هالقطعه الي صايد فيه هالشقر هذول
اسامه .. بوحمد هذى الله يسلمك مو قطعة هذا حداق سيف ومن الخشب اللى تحتى والحديد اللى يمى يبين انه مكان ممنوووووع القرب منه يعنى السالفة مكان محظوووور جدا جدا لكن السمجة وسحرها اللى يقط بالتهلكة
وبالنسبة حق القطعة اللى تتكلم عنها الكلام اللى وصلك صحيح لكن مايات يوم اتل فيها خوش تل ويوم ياذيك اليميام والجم لكن والله فيها خوش سمجة وسمجتها مشكلة شعم ونويبى وبطان وينم وشعرى وسبيطى .. احلى من هالسمجة ماكو لكن مايات وحداقها ثبر وتبى جرة ماية وحق السبيطى يبى منجوسة ولا زورية حية
رد مقتبس: وإذا القطعه زينه ودي اخاويك بطلعه حداق هناك على يوم
لا والله ما يكدرون يلوعون الجبد وخاصة لا ياك واهو يدم براسه ولا طلعته الصنق تارس الخيط صج يلوع الجبد
رد مقتبس: "الجمه المنقسي" ينبر نبره تقوول موت .. تمصع الواحد !!
واخرتها خياس ...
كويتى عاد تصدق ذاك اليوم كنت احدق بخيط خمسين وما كان فى نبرة وكنت مولع زقارة وقاعد اسولف مع الربع شوى ولا ذاك اللى ضرب على وحرق ايدى حرق يوم تمكنت من الخيط وصعدته كانت الماجأة ذاك المنقسى اللى عمرى ما ضرب على نفسه حتى من كبره مستحيل انك تعرف ان الضارب عليك جم والله فكر انه سكن ولا يريور عود
رد مقتبس: وتعال طلع الميدار المنفهق من حلجه ..
لا عاد اهنى اول شى عطه وحدة على الراس وبعدين بطل على راااااااحتك عاد عندى بايب خاص حق الجموم الله وكيلك ضربة وحدة على الراس تشوف الجم مغفى على الماى ويقولك : مع ريح الهوا مسافر .. مساااافر
رد مقتبس: وبعدين قطه بحر .. وللا عطه الصعايدة !!
الحين حتى الصعايدة ما يبونه .. تصدق مرة صدت جم بالدوام وخليته قلت تاكله القطوة .. القطوة تمر عليه حتى مالها خلق تطالعه
رد مقتبس: دق على تالي لبغيت تطلع حداق ..
ترا أعرف أقصص ييم
خوش عيل وقت الطرشة خلك جاهز .. يبيله والله بس ياريت يكون ورى الفطور ويستحسن عقب صلاة العشاء ناخذ سحورنا ونرد الفجر
-------------------- قيد الانشاء المشاركات: 10522 | من: kuwait | تاريخ التسجيل: نوفمبر 2002
|
إرسال هذه الصفحه لصديق!
لطباعه هذا الموضوع
![[Big Grin]](biggrin.gif)
![[Mad]](mad.gif)
نكدها شوي لما جا في بالك خخخخخخخخخ
![[Confused]](confused.gif)
![[Wink]](wink.gif)
![[battingeyelashes]](graemlins/battingeyelashes.gif)
![[thinking]](graemlins/thinking.gif)
![[Smile]](smile.gif)
![[Eek!]](eek.gif)
![[blushing]](graemlins/blushing.gif)
![[Roll Eyes]](rolleyes.gif)
![[nerd]](graemlins/nerd.gif)
![[Razz]](tongue.gif)
