ليالي الانس في فيينا .. نسيمها من هوا الجنه نغم في الجوّ له رنّة .. سمع لها الطير بكى وغنّى متّع شبابك في فيينا .. دي فيينا روضة من الجنّة ساعة هنا. لو تفضالك .. تنسى معاها الكون كلّه
: :
فيينا بلد الفن والثقافه , بلد الطبيعه الغناء الجميله بلد السهر اللي تغنت عليها أسمهان ليالي الانس في فيينا
السنه حصل لي الشرف للمره الثانيه اني ازورها وكانت من أحلى رحلات حياتي . . فشرايكم اخذكم بجولي وياي من خلال عدستي الخاصه في ضواحي فيينا وخارجها ؟ : :
Are you ready ?
البداية وصلنا يوم 6\8 \2007 لفيينا بعد رحله مرهقه لمدة 5 ساعات
وأتجهنا لفندق ساس او Radisson SAS طبعا فندق 5 ستارز
هذا اللوبي من داخل ماصورت الاوتيل من برا بس موقع الاوتيل جداًً حلو وقريب من شارع المشاه " الكيرتنر" واحسن من الفندق اللي يمه الماريوت لانهم بس يسكنون عائلات
وحمدلله على حظنا جاتنا احسن غرفه بالاوتيل كله واللي كانت شقه سابقه حق سفير سعودي
فيها 4 غرف وصاله كبيره مثل ماتشوفون وطاولة طعام و3 حمامات الكل حسدنا عليها
: :
والحين تعالوا ندخل لأشهر شارع مشاه فالعالم
الكيــرتنر
طبعا هالشارع مشهور بالكوفي شوبز والتسوق والمطاعم
مثل ماتشوفون القهوه الورديه اسمها قهوة عايده تقدم أحلى كيكات ممكن تذوقونها بحياتكم والحلو ففينا ان الكوفي شوبز اتم فاتحه لين 12 فليل
مب مثل لندن من 10 جحوتوا الناس
والكيرتنر اشتهر بعد بالناس اللي يقدمون استعراضات
او بالاحرى طراروه كشخه
وفي هالمهرج اللي يجي كل ويك اند
يونس كله يفشل الناس يوم جيت بمشي رحت من مكان بعيد خفت يفشلني لول
وفالكيرتنر رسامين اللي ينتشرون بالشارع ويتمون يترجون الواحد عشانه يرسمونه وشوف انواع المديح you're so beautiful let me draw you a pic
وهني رسامه رسمت اخوي اختار اخوي رسم كاريكاتوري لول
شوفوا النتيجه
: :
يتبع
[ مارس 13, 2008, 06:10 PM: تم تحرير المشاركه من قبل: miss Milano ]
مرسلة من miss Milano (رقم العضويه 37402) on :
عدنــــا
وطبعا بما ان فيينا مسمينها بلاد هل قطر لازم نشوف درزن سياير قطرية كل يوم
وهالسياره مالت واحد راهي كل يوم مرتزه فالكيرتنر لاالمشكلة شايب ولما تجي الساعه 12 يتم يدور فالدواعيس المؤديه للكيرتنر عشان الخليجين يشوفونه
وهذي لقطه للكيرتنر بالليل
طبعا مافي احلى من القعده فقهاوي فينا فالليل ولا ليش قالوا ليالي الانس ففينا مثل ماتشوفون القهوه البيضا هذي اشهر قهوه يقعدون فيها الخليجين
مالك محط رجل فيها اسمها europe cafe واحلى اسكريم بتذوقه فحياتك فيها
: :
وللي يحبون الاشيا التاريخيه في أطراف الكيرتنر كنيسه قديمه جداً
مثل ماتشوفون هالكنيسه احترقت من مئات السنين حتى شوفوا البياض اللي فوق والحين قاعدين يصبغونها يقولون عالصيف الجاي بتكتمل
الشامبـــرون
قصر ملكة النمسا ماري تريزا ام ماري انطوانيت ملكة فرنسا
القصر حلو وفخم بس مب بفخامة فرساي
هذي صورة للقصر من الساحه الخلفيه
وهذا القصر من جدام صوب المدخل
طبعا التصوير من داخل ممنوع بس استغلينا لحظة السكيورتي ماكانوا موجودين وصورنا هاللقطه
وهذي صورة لحديقة القصر
الحديقه الشي الوحيد اللي عجبني فالشامبرون اكثر من فرساي
واللي ضحكني اكثر شي الحمامات لو تشوفون شصغر وانتوا بكرامه
: :
براتر
أكبر ملاهي في أوروبا واللي مطيحين فيها كل ليلة لين تسكر الساعه 12 فليل
الملاهي وايد حلوة وحلاتها تروحون لها فليل فيها العاب جدا خطره وفي العاب يهال ومطاعم واشيا حلوة ومسليه بس برويكم منطقة تواجد العرب
شفتوا هالمكان المظلم هذي سياير التصادم
لحظة شوفوها شلون تصير فليل
يشغلون اغاني عربيه عشان يجذبون العرب وانواع الاغاني سواها قلبي , هذا اللي شايف نفسه وكل اللي تبونه
ومافي الا المينن هل قطر وهل السعودية منقعين فيها وفي خبلان يرقصون وطبعا مالك محط رجل كل واحد مايبي يقوم من سيارته
: :
يتبــع آخر جزء
[ سبتمبر 24, 2007, 12:09 AM: تم تحرير المشاركه من قبل: miss Milano ]
مرسلة من miss Milano (رقم العضويه 37402) on :
: :
الدونا إنزل
مكان حلو تروحونله بأندر جراوند او تاكسي كله مباني وعمارات وقهاوي حلوة غير عن اللي فالكيرتنر
مثل ماتشوفون عالجنب كله مطاعم وقهاوي
وهني في نقازيه مرة رحنا فليل ماكان في حد ناقزنا
وهذا منظر للدونا انزل مثل ماتشوفون المكان يطل على نهر الدانوب ومباني حديثه
وهني مثل ماتشوفون قوارب للتأجير خل اقولكم سالفه صارت لنا هني فالقوارب مرة كنا شكثرنا الحريم والعيال واليهال ماشالله اجرنا نص المراكب تقريبا وماشالله صج عرب احنا محولينها جنها قوارب تصادم والريال اللي مأجر علينا ساكت ومطول باله لين جات الطامه الكبرى
شفتوا هالجسر ؟ واحد من يهالنا الله حفظه وقام تعلق بالجسر وهو راكب المركب ومشوا عنه وتم متعلق عاد اللي يأجر المراكب استنزل علينا وخذا مركب وقام طلعنا كلنا وشمت فينا النمساوين العذال
: :
الحين بنقلكم بجوله سريعه على بعض الاماكن
هذا برج فيينا
تقدرون تروحون فوق وتشوفون فينا كلها وفيه مطعم لو تبون تتغدون وفيه حديقه كبيرة يمه
: :
هذي حديقة الشتات بارك واللي مثل هايد بارك بلندن بس الهايد احلى
هالحديقه مقابلة الساس والماريوت بس تقطع الشارع الا انت فيها عني ماحب اروحلها وايد
: :
وهذي بعض الصور لاماكن مادري شنهي لان ركبنا نفس الحنطور وفي حرمه تشرح وانا اسمع الايبود وماسمعت شتقول
اخر صورة لمسرح الاوبرا في آخر الكيرتنر
آخر شي
ادري الموضوع وايد طويل بس اسمحوا لي حاولت اختصر الاماكن والصور قد ماقدر
وأتمنى يحوز على رضاكم
[ سبتمبر 24, 2007, 04:20 AM: تم تحرير المشاركه من قبل: miss Milano ]
مرسلة من ابو الزلف (رقم العضويه 81393) on :
روووووووووووووووووووووووووووعة مبروك عليك الرحلة واو كثير استمتعت و انا عم بقراهم وااااااو
مرسلة من قلب حساس (رقم العضويه 10429) on :
امبيه امبيه ماصدددددددددق
اليوم انا حلمانه اني مسافره فيينا .. وان الدنيا كلها ثلج عندهم حتى داخل الفندق
اييييي واللللللله ان فيييييينا جنه جنننننننننننه
وناسه وايد استانست وانا اقرااا ذكرتيني بأيام مضت بصراحه ماذكر احنا وين سكنا بس اللي اذكره الفندق كان على شكل هررم كبيير وكان وايد روعه وراقي
وتسسسسسلم ايدج على الموضوووع والله يعطيج العافيه ومبين استانستوا بالسفره يا عسى دوم ياربي
تحياتي فديتني ارق قلب حساس
مرسلة من يجيلك يوم (رقم العضويه 122) on :
WooooW .. مس ميلانو !!
تصدقين رفيجي كل سنه مطيح هناك
و انا كله اقوله وعع شيوديك هالبلد الممله
مادري ليش دايما ماخذ الفكره انها بلاد ممله .. لول
عالعموم ما قلتيلي شلون الـshopping هناك
ما نعرف نروح بلاد ما فيها سوق .. لول
و شفيج تقارنينها بلندن بين كل جمله و جمله
لندن هي لندن حتى لو تسكر 6 العصر خخخخ
ميرسي مس ميلانو
مرسلة من miss Milano (رقم العضويه 37402) on :
ابو الزلف
حمدلله ان التقرير اعجبك
قلب حساس
لول صج حلمتي بفيينا
فديتها والله انا من اسبوع رديت حلمت فيها
حاسه بزهق مب طبعيي بعدها
اي والله الحمدلله استانسنا
وبخصوص فندق جنه هرم اممم يمكن الانتركونتننتال ماتذكر
مرسلة من miss Milano (رقم العضويه 37402) on :
يجيلك يوم
هلا عبود
ماينلام رفيجك
وانا اشوف فيينا احسن من لندن
لعدة اشياء الامان تخيل تسهر لين 2 مافي خوف ولا شي حمدلله نرد الاوتيل ولايصيرلنا شي
احتمال نزورها عن طريق المانيا .. بس اهلي ما تشجعوا
و رحنا باريس و بلجيكا .. و الشنطه البرادا عرفتها
هذي اللي مدرجه من الوردي للأسود .. شفت جوتي PRADA
نفس الحركه بالضبط كان روووعه
و مالت عليهم و على بوتيكاتهم فوقهم
لو انا منج اقولهم شكو فاتحين انشالله لوووووول
فديت GUCCI دبي قمة فلأدب
يعاملوني معامله خاصه و اللي مو موجود يجيبونه و هم حمير
[ سبتمبر 24, 2007, 02:16 AM: تم تحرير المشاركه من قبل: يجيلك يوم ]
مرسلة من miss Milano (رقم العضويه 37402) on :
لول
ذكرتني بسلفرج ها لايكون انت من اللي يروحون المطاعم اللي فوق
اي هذي فيه منها جوتي فزيعاا
يلا انشالله تروحلها السنه الجايه
وبتستانس فيها على ضمانتي
مرسلة من أجمل إحساس (رقم العضويه 9558) on :
الموضوع بكبره روووعه
قلبووو..
اذكر قلتيلنا بالبيت انج حلمتي بفينا..
ترى الفندق اللي سكنا فيه على كل هرم اهو منتجع..اسمه شي Club!!!
مشكوره مس ميلانو على الموضوع ويعطيج العافيه
مرسلة من بنت الكويت (رقم العضويه 17) on :
مس ميلانو تقرير رائع شكرا على الصور والتقرير الممتع واتمنى لوكان هناك تكملة لباقي الرحلة زيارة مدن ثانية مثل انسبروك او سالسبورغ او زيلامسي
والله يعطيج العافية واهم شي انكم استمتعتوا بالرحله واتوقع ان رحلتكم كانت على الخطوط القطرية
مرسلة من miss Milano (رقم العضويه 37402) on :
اجمل احساس
تسلمين انتي الروعه والله
وخوش عيل سكنتوا بمنتجع كشخه
بنت الكويت
تسلمين
رحنا لزلمسي كنت بحطهم بنفس التقرير
بس حسيت بيطلع over وممل وطويل
ولا سافرنا عالاماراتيه
هل قطر مقاطعين القطريه لول
مرسلة من howtodeal (رقم العضويه 10339) on :
ميس ميلانو..
الحمد الله على السلامه .. و شكلكم استانستوا وايد في الرحلة بصراحة المناطق اللي سرتوها رهييييبة..
رد مقتبس: مب مثل لندن من 10 جحوتوا الناس
زين انه 10 أنا اللي شفته انه أغلب المحلات في أوروبا تسكر من الساعه 7
رد مقتبس: ادري الموضوع وايد طويل بس اسمحوا لي حاولت اختصر الاماكن والصور قد ماقدر
ليش تختصرين؟؟ بالعكس الموضوع حلو .. ولو كان أطول بيكون أحلى بعد
مع اني ما أفهم في الشنط بس لو شفت هالشنطة بشتريها علشان أحطهاديكور في غرفتي انشالله تحصلينها في لندن
[ سبتمبر 24, 2007, 07:29 PM: تم تحرير المشاركه من قبل: howtodeal ]
مرسلة من Kuwaity (رقم العضويه 4) on :
موضوع راااائع وانا شخصيا استمتعت بكل كلمة وكل صورة بالتقرير والنمسا من اروع الدول الاوربية بالطبيعه بعد سويسرا وخاصة بحيرة زيلامسي وسالسبوع احد منتجعات جبال الألب البافارية
شكرا مس قطر وننتظر الجديد منك دائما
مرسلة من miss Milano (رقم العضويه 37402) on :
howtodeal
تسلم والله ومن ذوقك ياماجد
لول وانا ماقصد عن الاسواق اللي تسكر 12
لول اقصد المطاعم والكوفي شوبز
اما بفينا لا تسكر 7 بعد ماعدا الخميس والجمعه
يخلونها لين 8 عشان بعدها ويك اند
ومعاك حق طلعت ذويق مثلي عجبتك الشنطه
يارب القاهااا موصية عليها ناس مخصوص من لندن لول
Kuwaity
تسلم والله من ذوقك اخوي كويتي
وبالفعل النمسا من اجمل الدول
وصج زلمسي اجمل كطبيعه من فينا
بس فينا اونس
مرسلة من Mak (رقم العضويه 5) on :
miss Milano
مجهود رائع وصور رائعه
مرسلة من miss Milano (رقم العضويه 37402) on :
Mak
تسلم والله شرفتنا بمرورك
مرسلة من طبيعي (رقم العضويه 11956) on :
موضوع يخرع ويستاهل تثبيت
مرسلة من Om_3ango0o9ain (رقم العضويه 2390) on :
استمتعت وايد وااايد واااااايد و آنا اقرى و اشوف الصور ..
يعطيج العافيه و اهم شي انكم استانستوا ..
حدها فيننا اتينن و الصور وايد حلوه و يريت اذا عندج بعد اتحطيلنا الباجي علشان نستمتع بباجي المناظر ..
و الجنطه عجيبه حددّج ذوق
يسلمو و ناطرين باجي الصور ..
مرسلة من miss Milano (رقم العضويه 37402) on :
طبيعي
تسلم والله عالتثبيت
ودام ثبته راح اضيف جزء ثاني اليوم الفجر
ام عنقوصين
هلا والله ام عنقوصين
حمدلله انج استمتعتي وانتي الذوق والله
ولايهمج اليوم بنزل جزء ثاني
مرسلة من razan007 (رقم العضويه 233) on :
مس ميلانوووو
الله يعطيج العااااااااااااااااااااااااافية
صج صج صج ابدعتييييييييييييييي بالموضوع الصور و التعليقاات شيييييييييي
خصوصاً اللي تعلق بالجسر خخخخخخخخخخخخخخخخخخخخخخخخخخخ
و الحمدلله انج استانستي بسفرتج بهالصيف
بعدين دامج تبين الجنطة جان مريتي لندن قبل لاتردين قطر و شريتيها
شووووووووووووووكررررررررررررررررن مس ميلانووو عالتقرير الحلووو مرة ثانية
و لاتحرمينا من هالطلات الحلوة يا حلوة
مرسلة من miss Milano (رقم العضويه 37402) on :
razan007
هلا تو مانور الموضوع حبيبة ألبي
بخصوص الشنطة هو على كيفي امر لندن
واليهال لول يحليلهم على شطانتهم يونسون
مرسلة من حسّاس (رقم العضويه 19999) on :
الموضوع مرتب و حلو
الله يقوم صاحبته بالسلامة ...
سلامي....
مرسلة من قلب حساس (رقم العضويه 10429) on :
^ ^
آميييييييييييييييييين يارب
تحياتي فديتني ارق قلب حساس
مرسلة من أجمل إحساس (رقم العضويه 9558) on :
آمين يارب ..
قلبي معورني عليها..
ربي يشافيج وتردين لنا وتحطين الجزء الثاني يالغاليه..
مرسلة من razan007 (رقم العضويه 233) on :
باذن الله بتقوم بالسلامة و بترد
مرسلة من miss Milano (رقم العضويه 37402) on :
رجعــت عشان اكملكم بـاقي الرحله لاني نسيت اكتب عن مدينة مهمــة الا وهـــي
zellamsee : :
بعـد ماقعدنا اسبوع في فيينـا كان من المقرر ان نروح لمدينة زيلامسـي لمدة 4 ايام ونرجع بعدها فيينـا وقمنا ولبسنا ورحنا محطة القطـار ونطرنا لين شرف القطار
الرحله من فيينا إلى زلامسي تستغرق 4 ساعات ونص وفيها تغيير للمحطه في مدينـة سالزبورج عاد بهالتغير صار لنا موقف اخـوي تأخر عن القطار وكلنا ركبنـا , وهو الشيخ مادري وين رايح تمينا على اعصابنا نتصله مايرد! توه شوي ويحرك القطار الا ابوي طالع من الدريشه ويصوت عليـه اشوا جا يركض مسكين الا طلع وقف لانه تعبان ماسك شنطتين مالتي ومالت اختي : بعد 4 ساعات ونص وصلنـا لجنة الله على الأرض مثل ماتسميها عمتـي لزيلامسي وسكنا بفندق Grand اللي يعتبر احلى فندق من ناحية الشكل بزلامسي..وهذا شكل الفندق من صوب شارع المشـاه وهذا شكل الفندق من ناحية البحيره الحلو بهالفندق انه يطل على شارع المشـاه وعلى البحيره وعلى الحديقه يعني كل شي وعامةً فنادق زلامسي كلها ريفيه وبهالصورة : : والحيـن نشوف بحيـرة زلامسي المشهوره
وهذا بيـوم كان الجو فيه فظيـع الغيم نازل تحت
ومايصير بحيره بدون مراكب
وهذا مركب تروحون تتغدون فيـه ويدور فيكم على البحيره لمدة ساعتين بس ماركبنا احنا
يتــبع : :
مرسلة من miss Milano (رقم العضويه 37402) on :
: شـارع المشـاه هاليوم كان رهيـب, مطر طول اليوم قمنا نراكض انا واختي لين شرينا لنا مظله وقعدنا نتمشى بعدين رحنا ماكدونالدز فالمطر عشان نتعشى جان اقولها يازين الريحه شمي ريحة ضو كنه فالبر وبعدها طلعت فليل اجيبلي كوفي من القهـوه وانا اتمشى وحاطه الايبود واسمع عبادي الجوهر والمطر يطقطق وهذي صورة ثانيه للشـارع في يوم عادي من غبائنا ماصورنا صوب القهـاوي والقعدات : : من الأسبـاب اللي خلتنا نروح زلمسي هي عشان نشوف الثلج اخذنا تاكسي وانطلقنا للجبل هو قريب مب بعيد على فكرة ورحنا وقصينا تذاكر حق التلفريك وركبنـا الجبل ارتفاعه 4 الاف كم , وكان لازم نبدل فيه 4 تلفريكات , والصعود اصلا للقمة ب45 دقيقه! واحنا فالتلفريــك مافيه الا انا ميته خوف ( عندي خوف من الأرتفاعات ) واخواني يضحكون مافيه الا أنــا.. مع ان دوم بسفراتي اركب بس الارتفاع بزلمسي كان يخرع هذي مناظر واحنا بالتلفريك عند 3 وقفه قبل مانوصل للقمة في محل لبيع مستلزمات التزلج احنا شرينا قفازات لان نسينا نشتري قبل
هني وهم قاعدين يسوونه وهني اكتمل السنو مان بعد مالبسه اخوي العود نظارته وكابه وقفازاته ولايحليلهم كل من جاي ويصور وياه واحنا نبي نروح بس مانقدر ناخذ الاغراض لان معجبين السنو مان شكثر فنطرنا لين جروب كويتين وسعودين صوروا واخوي خذا ملابسه ورحنا بس ترى ماقعدنا وايد بالثلج لان كان برد موت وانا قاعده عالكرسي احس رجلي من تحت متجمده اي نسيت وفيه مرتفع حق الزحلاقيه ركب اخوي وركبت وياه اول شي ركبنا بسلام لين نزلنا وطحنا جدام خلق الله
يتبــع
: :
مرسلة من miss Milano (رقم العضويه 37402) on :
: بعدها بيوم رحنا مدينة اسمها ولف جانج تبعد عن زلمسـي ساعتين تقريبا طلبنا سياره عشان نروح لها كان يطلع السواق ( حرمـــه ) اخوي اول ماشاف انها حرمه قال لا بالله بيصير شي ---> غير مؤيد لقيادة المرأه بدال ماتودينا الهاي واي قالتلنا بوديكم طريق مختصر وعشان تتفرجون عالطبيعه قلنا اوكي معليه جان تركبنا بجبـال تخـرع ارتفاعها يمكن 3000 كم وطريق واحد يعني ومافي حواجـز لو مجرد تلف غلط بنكون رايحين فيها المشكلة تسـرع وهي تسـوق وتسولف ويا ابوي وتلفت وايد واحنا معصبين وخايفين وقلوبنا في بطنا وابوي معـرق من الخوف وهي متفرغه تسولف واخوي كل شوي صرخ بالعربي يقول جعلج بعد ماتوصلينا تدعميـن وتفكينا بس حمدلله وصلنا بسلام ولما جينا بنرجع قلنالها شوفي ودينا هاي واي لاتردينا من هالطريق
هذي صورة بقــره فالطريـق لما وصلنا ولف جانج ماشفنا شي مميز يعني جنها زلمسي بس زلمسي احلى وهني كان في ناس فوق البحيرة ينزلون من الجبل بالباراشوت وبعدها رحنا لمطعـم ايطالي فظيـع احلى شي عندهم السويت بعد ماأكلنا قلنا حق ابوي خلاص خل نرجع مع السواقه الخبله تمللنا ورجعنــا
: :
بعض المناظر لزلامسي
وبس مابي اطول عليكم بالصور ماقعدنا فيها الا 4 أيـام عني انا استانست اكثر شي بآخر يوم لان كان مطر وفيه مهرجان يبيعون ذره وسندويتشات وكيكات وملابس وفرق يعزفون بالطريق يعني كان كأنه اجواء الافلام + كان يطق مطـر هب بتعجب اللي يحبون الهدوء والطبيعه مثل ابوي وامي انا واخواني كنا كل يوم نقول ليتنا ففينا وبعدها ردينـا لحبيبتي فيينــا عند الأهل والجمعه والأزعـاج والوناسه
مرسلة من «[.نجــ 5 ــوم.]» (رقم العضويه 12532) on :
miss milano sorry توني انتبه للموضوع من البداية بعد في جزء ثاني بس روووعة كثير الموضوع و حبيته كثير و قرات كل التفاصيل بصراحة بلاد حلوة و تسوى الواحد يروح لها
اشوف الجزء الثاني و بعدين ارد ثانكس و الموضوع متعوب علية الف عافية
مرسلة من Spark (رقم العضويه 10288) on :
انا اخاطري اروحها
حبيت النفاصيل و الصور حلو دليل سياحي حق الي يريد يروح يسلمو ميس
[ مارس 13, 2008, 06:30 PM: تم تحرير المشاركه من قبل: Spark ]
مرسلة من miss Milano (رقم العضويه 37402) on :
«[.نجــ 5 ــوم.]»
تسلـم من ذوقـك والله وبالفعل فيينـــا غير ان شاء الله يعجبك الجزء الثاني
spark
تسلمين والله حياتي من ذوقج ,, وانا ماعرف اقول شي بدون تفاصيل لازم السالفه كلها
مرسلة من razan007 (رقم العضويه 233) on :
مس ميلانوووووووووووو
الصور رااااااااااااائعة و احلى شي سردج للأحداث مع الصور خخخخخخخخخخ
بس سالفة التلفريك هذي ماادري شلون قدرتي عليها
لو منج جان طلبت طيارة توديني مب تلفريك
و كله كووووم و البقرة اللي بالطريج كووووم
ماادري ليش ماتأيدين جمال الطبيعة .. بس وااايد عجبتني صور هالمدينة و طبيعتها خلابة
يعطيج الف الف عاااااااااااااااااافية يا عسل عالموضوع المميز و الممتع
[ مارس 13, 2008, 07:57 PM: تم تحرير المشاركه من قبل: razan007 ]
مرسلة من miss Milano (رقم العضويه 37402) on :
رزون ميرسي حياتي على الرد
شفتي شلون والله قلبي كان يطق وانا بالتلفريك
ولا بالنزول كل شوي وقفوه وصرنا نتمرجح بين السما والارض
نورتي الموضوع
مرسلة من f O t a t 5 O b z (رقم العضويه 82505) on :
ميس ميلانو
روعة روعة أبي أروح الحين لول يصير أروح أنا ورويدا ؟
المهم إن فينا ما فيه أحلى منها لازم أروح لها بالقريب العاجل
شكراً وياليت فيه جزء ثالث لول
مرسلة من f O t a t 5 O b z (رقم العضويه 82505) on :
إهداء لك ولـ فينا من رويدا لول
ليالي الأنس مرسلة من «[.نجــ 5 ــوم.]» (رقم العضويه 12532) on :
حتى الجزء الثاني رائع بس و انا اقرا التفاصيل لوهلة حسيت اني بالموقف بس من قريت اسم عبادي الجوهر افكاري STOP يعني ما تصلح فينا و يا عبادي لووول قولي فيروز محمد عبدة و لو اني ما ادانية بس احس الاغاني هذه ويا هالمناظر تكون احلى لوول
المهم الحمد الله على سلامتك و المهم استانستي وايد
و ان شاء الله يسن لنا بالقريب العاجل نزور فينا
مرسلة من miss Milano (رقم العضويه 37402) on :
فتـات الخبز
مب هين ها رويدا مرة وحده
لامايصير الحين حلاتها بالصيف عشان الحين تغيب الشمس بسـرعه
والف شكر عالاهــداء روعه رويدا
5نجـــوم
تسلم من ذوقـــك اخوي
بس شفيه عبــادي والله فظيــع حق هالاجواء الهـاديه
انا عموما بالسفر ماسمع الا لبونورة ومجيد وعبـادي اكثر شي
تسلم عالرد
مرسلة من G.i.s.e.l.l.e (رقم العضويه 83808) on :
روعـه ميس انا رحتلها بسنة 2005 ووايد اعجبتني عائلية وحلوة واحلى شي فيها مثل ماقلتي أكلها
مرسلة من miss Milano (رقم العضويه 37402) on :
ميرسي جيزيل على ردج الحلو
عاد احنا بفينا ماورانا الا البـلعه
من يوروب كافيه لشاتنوجا لسيجا فريدو لعايده لفينيتزيا