منتــدى الســالميــه: الزواج من بلد اخر.. شرايكم فيه؟

This is topic الزواج من بلد اخر.. شرايكم فيه؟ in forum ســاحــة الـمجـتمــع و الـــصــحــة at منتــدى الســالميــه.

To visit this topic, use this URL:
http://salmiyaforum.net/cgi-bin/ultimatebb.cgi?ubb=get_topic;f=9;t=001262

مرسلة من أجمل حساس (رقم العضويه 9558) on :

مرحبا أخواني الاعضاء [Smile]

بصراحه عندي موضوع ابي اعرف شنو

رايكم فيه [thinking]

شرايكم بالبنت انها تتزوج واحد من بلد ثاني

يعني مو بلدها..؟؟

وشنو رايكم لو كان العكس.. يعني الشاب يتزوج من

بلد ثاني؟

مشكورين والله يعطيك العافيه

أختكم: أجمل احساس

مرسلة من DaLaLالكويت (رقم العضويه 1094) on :

يقول المثل : (( دهنا في مكبتنا )) [Razz]

أكيد من نفس البلد و الجنسية يكون أحسن ..

مرسلة من أجمل حساس (رقم العضويه 9558) on :

مشكورة أختي دلال على الرد [Smile]

مرسلة من همس الشووووق (رقم العضويه 4279) on :

صـــراحه .. مافيها شي [Smile]

بس يعني الاهل والتقاليد والعادات هي اللي راح تعترض .. [Frown]

مرسلة من أجمل حساس (رقم العضويه 9558) on :

مشكوره همس الشوق على الرد [Smile]

انا بعد وياج واقول مافيها شي.. خصوصا الخليج

لان شعب الخليج واحد ومشترك بالعادات والتقاليد

والدم والتاريخ و.. كل شي.

أحترم رايج واقول لو الله كاتب للواحد يتزوج من اخر

الدنيا راح يتزوج هالشخص لو كل العالم وقفوا ضده..

سبحان الله [Smile]

كل شي قسمة ونصيب

مرسلة من ليل الموادع (رقم العضويه 2225) on :

عايدي اذا حصل التفاهم بين الطرفين

مرسلة من أجمل احساس (رقم العضويه 9558) on :

صح كلامك ليل الموادع ومشكور على الرد.

مرسلة من لون الغيم (رقم العضويه 2295) on :

أسأل أهلي بيوافقون ولا لا [Big Grin]

مرسلة من *§* عــذابــــــة *§* (رقم العضويه 4153) on :

اوافق عليه بس في شرط [Razz]

لو كان في حب [blushing]

هو الشرط الأساسي طبعاً [battingeyelashes]

ومشكوووورة الغالية [applause]

ومثل ما قلتِ كل شي قسمة ونصيب [Razz]

[ 05. يوليو 2003, 08:03 AM: تم تحرير المشاركه من قبل: *§* عــذابــــــة *§* ]

مرسلة من العميد (رقم العضويه 2356) on :

اهو صحيح الانسان مايدرى شنو نصيبه لكن رائ الشخصى

لا لا لا للزواج من غير الجنسيه للجنسين طبعا.

راى شخصى واسمحولى.

مرسلة من BOUMETEEN (رقم العضويه 7) on :

مقيلوه من زمان صغلة الفريج ماتبي الا تيس الغريب [Razz]

بصراحه انا ما اعتقد ان في الكويت كويتيه ترضى بالزواج من اجنبي لأن الكويتيات يا حبهم للشحاطه والعكس صحيح بس تحصل وانا اشوفه زاج مالله داعي [Frown]

مرسلة من KatkoOotaa (رقم العضويه 9539) on :

آنه أقول مثل كلام بومتين

يسلموووووووووووووووووووووووووووووووووووووووووووو

أجمل إحساس

[Smile]

مرسلة من فاطمة علي (رقم العضويه 6531) on :

اذا في تفاهم عاادي بس اكيد الأهل بيعارضون
وانا من رأيي من نفس البلد وايد احسن [battingeyelashes]

مرسلة من قبـــــــــــسه (رقم العضويه 3348) on :

بو متينو انت كله معارض وبسسسسسس [Smile]

مرسلة من أجمل إحساس (رقم العضويه 9558) on :

لون الغيم: مشكور أخوي على الرد وان شاءالله أهلك يوافقون على كل اللي تبيه [Smile]

عذابه: مشكوره حبيبتي على الرد وانا وياج باللي تقولينه.. الحب يسوي المعجزات [Smile]

العميد: مشكور أخوي على الرد وطبعا انا احترم ردك
لو ان رايي يختلف بس" الاختلاف بالرأي لا يفسد للود قضيه" [Smile]

بومتين: مشكور على الرد.. والمثل حلو وياي بمكانه [Smile]

بس ما اعتقد كل الكويتيات رايهم مثلك لاني اعرف وسمعت عن وايد تزوجوا جنسيات غريبه وعجيبه غير الخليج.

كتكوته: مشكوره حبيبتي على الرد [Smile]

فاطمه علي: مشكوره فطومه على الرد [Smile]

قبسه: مشكوره على المرور وانا وياج ان بومتين
"مرات" يعارض لمجرد الاعتراض [Big Grin]

أختكم: أجمل إحساس

مرسلة من razan007 (رقم العضويه 233) on :

والله ما أأيد لا زواج البنت من بلد آخر ولا زواج الولد من بلد آخر

خصوووصاً لي صاروا خليجيين و ياخذون عرب ( من مصر ، لبنان ، سوريا ، الاردن ، فلسطين ، المغرب ، تونس وووو... الخ )

لانه اذا عربي اخذ خليجية فهو مو لسواد عيونها لفلوسها و جنسيتها و الكل يعرف شنو يعني خليجي بديرته و خلني اتكلم عن الكويتيين بالذات

يعني ما يخفى عليكم جنسية كويتية = عز و كل شي مأمن لك لانك مواطن و كل شي يمشي و هاللي ياخذون خليجات يبون يسوون مشاريع و فلوس بأسماءهم و يامااا تصير

اما هاللي ياخذون خليجيين فحدث ولا حرج [Big Grin]

تبي فلوسه بالمقام الاول و ماشاءالله الخليجين يدللون الحريم عدل [Wink]

يعني طلباتها أوامر و هالشي ما يحصل لها مع واحد من ديرتها [Big Grin]

اما سوالف الحب و الخرابيط

فأظن انه نسبتها ما توصل 0.1 %

و بوميتين مو غلطان بكلامه و تمام عليك يا السكبة ما قصرت [Big Grin]

[ 06. يوليو 2003, 05:49 PM: تم تحرير المشاركه من قبل: razan007 ]

مرسلة من BOUMETEEN (رقم العضويه 7) on :

quote:
آنه أقول مثل كلام بومتين

quote:
بو متينو انت كله معارض وبسسسسسس

اي طال عمرج انا دوم محتج ورافع صبعي [Mad]

quote:
بومتين: مشكور على الرد.. والمثل حلو وياي بمكانه
بس ما اعتقد كل الكويتيات رايهم مثلك لاني اعرف وسمعت عن وايد تزوجوا جنسيات غريبه وعجيبه غير الخليج.

هذيل يا بدون يا طحين بجبد نفسهم [Razz]

quote:
قبسه: مشكوره على المرور وانا وياج ان بومتين
"مرات" يعارض لمجرد الاعتراض

وليش اعراض لمجر الأعتراض ؟؟ [Mad]

قالوا لو لج انا ماشي على نظرية خالف تعرف ولا شسالفه ؟؟ [thinking]

مرسلة من Dan_Dana (رقم العضويه 83) on :

حلات الثووب رقعته منه وفيييييه....

ويازين الواحد لي خذ من ديرته واهله بتحشمه وبتحشم اهله ... مب ياخذ غريبة علييه شدرااه عن طبايعها واخلاقها [Smile]

=====================
اي طال عمرج انا دوم محتج ورافع صبعي
=====================
هههههههههههههههههههههههههههههههه

ماشالله عليك مجتهد..كله تشاارك [Razz]

مرسلة من BOUMETEEN (رقم العضويه 7) on :

رزان ما اقدر اقولج الا احستني صنعا [Wink]

quote:
و بوميتين مو غلطان بكلامه و تمام عليك يا السكبة ما قصرت

quote:
ماشالله عليك مجتهد..كله تشاارك

اجل

اشلون

اجل

مرسلة من أجمل إحساس (رقم العضويه 9558) on :

مشكورين كلكم.. رزان كلامج عدل وعلى عيني وراسي..

نفس الكلام لدان دانة وبو متين اللي ما قصر"نجم

الحلقه" [Big Grin]

انا ماقول كلامكم غلط بالعكس.. انا بعد مثلكم ما

اؤيد بالمره زواج الخليجي من جنسيات عربيه ثانيه

او أجنبيه.

بس لكل قاعده شواذ.. واذا رزان تشوف ان الزواج

من بلد ثاني يعتمد على المصالح من الدرجه الاولى

انا اختلف وياها شوي.. صح هالشي موجود بس مو دايما.

انا اقول هالشي عن واقع وخبره بحياتي..

يعني احنا كخليجيين أهل..وأكثرنا عندنا اهل وأقارب

ومعارف بالخليج.. فمو معقوله اسمي زواجي مثلا من

ولد عمتي الاماراتي زواج مصلحه؟!!!

هذا مثال طبعا.. بس حبيت ابين هالشي .. بعدين

لاني معايشه جنسيات مختلفه حاليا فألاحظ ان اكثر

اللي يبي يتزوج من خارج بلده يكون يحب بالمقام الاول

بعيد عن المصالح والفلوس وغيره.

أنا ما اقول اني مع الزواج وضدزواج الشخص من نفس

بلده.. لا.. بل لكل قاعده شواذ مثل ما قلت كل شي

قسمة ونصيب.. واذا ربي كاتب لج يا رزان تاخذين

"شامي" بتاخذينه ..واذا الله كاتب لك يا بومتين

" هنديه" هم بعد بتاخذها لان هذي حكمةالله..

واللي مكتوب عالجبين لازم تشوفه العين..

ومشكورين كلكم على ردودكم [Smile]

مرسلة من Dan_Dana (رقم العضويه 83) on :

بقولج شي اختي من اللي اشووفه...

البنت ما ترضى تطلع برع بلادها لانها بتقاابل نااس ما تعرفهم ومالها سند في البلد الثااني...

اما انها تاخذ حد من اهلها في بلد ثااني هذا شي ثاني..

بس تاخذ واحد مايقرب لها من بلد ثااني هذا مرفووض...

وفووق هذا الاهل ما بيرضوون وانا اتكلم لج عن اللي عندنا...محد تفكر تتغرب عشان ريال من بلد ثااني...

والريال يوم يفكر ياخذ من برع - غير الخليجيه - عشاانهن ارخص من اللي داااخل... [Wink]

بعطيج مثاال..

الحين مصري تزوج بخليجية...ليش؟؟؟ حباً فيها...لاطبعاً ما بيخلي بنات بلاده وفوق هذا الخليجيه مطالبها اكثر...
بس الخليجيه شو عندها..اكيد فلوووس وهذا سبب زواجه منها..بيبني مستقبلة وبيهدها وبيسير مصر ياخذ من هناااك [Wink]

وهم الخليجي يوم ياخذ لج مغربية والا هندية يوم انهن ارخص من الخليجية ومطالبهن عادية مقارنةً بالخليجية وفووق هذا لو خذت واحد من بلدها ما بيسوي لها شراات اللي سواه لها الخليجي...

ماافي شي ابلاااااش في هالدينا......

الدنيــا مصاالح حبيبتي..وكل واحد يدور مصلحته

السموحه ع الاطاالة....اتمنى تكونيين فهمتي شو نقصد

وصدقتوا بوميتيييييييييييين ورزوووووووون [Smile]

==============
اجل اشلون اجل
-------------

هههههههههههههههههههههههههه [Razz]

مرسلة من وصايف (رقم العضويه 258) on :

مرحبا اجمل احساس..
الحقيقه قبل سنتين كنت افكر انى اتزوج واحد خليجي..
يعني مو سعودي..
وكنت طايره للسمافعلا..لانه كان باعتقادي ان الحب وحده يكفي..
وكأنه ربي مهلني..بديت افكر فيها بعقل..
لقيتها صعبة جدااااااااااااااا..

اول شى افكر فيها فى المستقبل وين باعيش؟؟
بارضه بعيده عن اهلي..وهالشى مااقدر عليه ابد..
ثاني شى عيالي بيتبعون جنسية ابوهم..
لاقدر الله ابوهم صار له شى شبيصير على انا وعيالي؟؟

ثالث شى الوظيفة والدراسه.؟؟
راح اضطر انى اخذ الجنسية وانا ابدا مااتنازل عن جنسيتي السعودية..واللى معطيتني كل الفخر والكرامه والاعزاز..

رابعا السفريات وابى اشوف امي واهلى واختى وفلانه وعلانه..

خامسا المشاكل اللى راح تصير بيني وبينه ..
لو انى فى بلدي بيكون عندى اهل ممكن الوذ فيهم..
بس ببلده..اروح لمين؟؟

الحقيقه مااؤيد هالزواج ابد..
حاليا ماافكر الا بواحد مو سعودي بس..
الا من قبيلتي بعد..

لان الزواج من غير الجنسية اللى انتِ تنتمين لها..
صدقيني العنا بعينه..والتعب بعينه..
الوحده شيحدها عالشقـــا؟؟

عموما مشكورة اختى اجمل احساس عالموضوع ..
وتحياتي لك

مرسلة من وصايف (رقم العضويه 258) on :

رزون حبيبتي الله بالخير..

حبيبتي ماتلاحظين ان هالرجال اللى يتزوجون من برى الكويت او برى السعوديه مثلا من لبنان ولا مصر يتمتعون بنسبة غباء ماهى قليله..

الواحد ببلده يقعد يتشرط ابيها بنت عمرها ماطلت من شباك ولاتعرفت على احد..
ابيها بنت قبايل ونسبها 2220 مثلي..
وابيها وابيها..

ويسافر لبرى يتزوج وحده
مهو داري ايش اصلها من فصلها..
مايدري عنها اى شى..
لايدور نسب..ولايدور عفة ولا اخلاق..
رقاصة ولا طقاقة ولا ولا ولا......
شرايك بهالنوعيه الغبيه من الرجال ياارزون؟؟

مرسلة من أجمل إحساس (رقم العضويه 9558) on :

دان دانه: مشكوره وايد على الرد وعلى إبداء رايج.

كلامج عدل وعلى العين والراس ويحصل وايد.. ما اقول

الا احترم رايج ويعطيج العافيه [Smile]

وصايف: مشكوره حبيبتي على الرد وعلى إعطاء مثال

من حياتج الشخصيه. كلامج عدل أخت وصايف وأوافق عليه

وأحترمه جدا. [Smile]

بس انا مستغربه ليش محد فيكم قال ان الزواج قسمة

ونصيب؟!!... كلامكم كله صحيح وما يختلف عليه اثنين

" وانا بعد وياكم" .. بس الزواج من علم الغيب وما

ألاحظ اي احد تطرق لهالموضوع.. مع ان كثيرين يحطون

شروط لزواجهم ..انا ابي كذا وكذا.. ويكون يشتغل

الشغله الفلانيه ومن عايلة كذا ولا من ديرتي وغيره

من الشروط.

بس بالاخير تتزوج واحد ماله شغل بكل اللي قالته..

ليش؟؟؟ لان ربي رايد لها هالشي.

أتمنى تفهمون انا شنو أبي اوصل له. وعلى العموم..

هذي وجهات نظر.. ومثل ماقلت ان اختلاف الراي لا يفسد

للود قضيه.

مشكورين كلكم ويعطيكم ألف عافيه [Smile]

[ 07. يوليو 2003, 08:37 AM: تم تحرير المشاركه من قبل: أجمل إحساس ]

مرسلة من razan007 (رقم العضويه 233) on :

هلا والله اجمل احساس

quote:
يعني احنا كخليجيين أهل..وأكثرنا عندنا اهل وأقارب

ومعارف بالخليج.. فمو معقوله اسمي زواجي مثلا من

ولد عمتي الاماراتي زواج مصلحه؟!!!

لو تلاحظين يا الغالية اني حددت
و ماقلت خليجي لانه الخليج واحد و تقريباً عيشة وحده
انا قلت عــــــــــــربـــــــــــــــــي و حددت الجنسيات

و بالنسبة للحب فما اظن انه الحب موجود خصوصاً بهالزيجات إلا بالاحلام الوردية و الافلام علشان يوصلون للي يبونه [Wink]

و اذا فعلاً في حب فقلت ماراح توصل لنسبة 0.1 % [Smile]

quote:
واذا ربي كاتب لج يا رزان تاخذين

"شامي" بتاخذينه

فال الله ولا فالج [Big Grin]

و عن نفسي ماعندي ادنى استعداد آخذ واحد من بره و تقولين شامي بعد عشم ابليس بالجنة [Razz]

والله يا وصوفتي ياخذها من الشارع و ببلاش و ما يدري إلا و اهو يدفع آلااااااااااف عليها و هي تسحب منه ولا هو داري [Razz]

و اجمل احساس محد اعترض على انه الزواج قسمة و نصيب بس في عقل يحكم و عادات و تقاليد تقيدنا [Smile]

تحياتي لج على هالموضوع الحلو و النقاش الاحلى [Smile]

مرسلة من أجمل إحساس (رقم العضويه 9558) on :

مشكوره حبيبتي رزان على الرد وعلى اهتمامج بالموضوع

والله يعطيج الي ببالج ويهنيج ويوفقج بحياتج [Smile]

مرسلة من BOUMETEEN (رقم العضويه 7) on :

quote:
نفس الكلام لدان دانة وبو متين اللي ما قصر"نجم

الحلقه"

احم احم

quote:
وصدقتوا بوميتيييييييييييين ورزوووووووون

احم احم

مرسلة من *أَمَلِ مَقتُول*ًٍَِ (رقم العضويه 7416) on :

الصراحة راحة
انا ماأأيد الزواج من بره
يعني اولا الرجال الى من دولتج او البنات الى من دولتك كلهم مشاء الله
مايعجبونك بالعكس كلهم حلوات بنات ارض اهلي وجدادي
وشكر كر

مرسلة من أجمل إحساس (رقم العضويه 9558) on :

شكراااااااا أخوي أمل مقتول على الرد..

واحترامي لرأيك [Smile]

مرسلة من جوري الشرقيه (رقم العضويه 5941) on :

هااااااي...

ليش حنا الخليجين شايفين انفسنا على ايش؟؟؟؟ ليش مسوين حالنا اعلى من الناس؟؟؟ عشان عندنا فلوس بس ؟؟؟ كلها اربعين سنه وراح يخلص البترول ونرجع على بساط الفقر مره ثانيه...حتى مافيه شي حنانمتاز فيه عن الدول العربيه....مع انا الدول العربيه الاخرى تمتاز بااشياء جدا رائعه مثل مصر بعد احصائيه اجرته الامم المتحده ظهر فيه الشعب المصري اذكى شعب في العالم يعني عندهم عقول توازن بلد... يعني ليش لغرور هذاااااا....حتى الو قلنا حنا عندنا فلوس ليش ماطلعنا في احصائيه الامم المتحده الااعلى دخل في العالم الى طلعة فيها سويسره حتى حنا يالخليج ماطلعنا فيه ......يعني بلاش غرور.....

وش فيه زاوج من الخارج اذ كل الدول العربيه تتزوج من بعض ليش حنا مانتزوج من الوطن العربي ؟؟؟؟؟يعني الشرع الاسلامي لم يحرم الزاوج من الوطن العربي نجي حنا ونحرم؟؟؟

quote:
لبرى يتزوج وحده
مهو داري ايش اصلها من فصلها..
مايدري عنها اى شى..
لايدور نسب..ولايدور عفة ولا اخلاق..
رقاصة ولا طقاقة ولا ولا ولا.....

واذ كانت مسلمه متعلمه معها الشهاده الجامعيه وبنت ناس متعلمين ومربين بنتهم على القيم الاسلاميه هل هذا يكفي ولا تبون شي اعلى من التربيه على القيم الاسلاميه ....

quote:
ماتلاحظين ان هالرجال اللى يتزوجون من برى الكويت او برى السعوديه مثلا من لبنان ولا مصر يتمتعون بنسبة غباء ماهى قليله..

والله ياوصايف ماهقيته منك عن جد انصدمت يوم قريت وانتي كاتبه الى يتزوج من برى غبي ومو اي غبي كمان يتمتع بنسبة غباء ليش ياوصايف وانتي توصفين اغلى واحب انسان الى قلبي ونور عيوني الي اطالع الله ثم اطالعه (ابوي) الغالي انه غبي وكمان شديد الغباء...عن جد جرحتيني...مشكوره يا مشرفتنا وصايف

مرسلة من بودعيج (رقم العضويه 6927) on :

الصراحة أنا ما أيد الزواج من النوع هذا
لان تكثر فية المشاكل >>>>>> لاتعليق أخر

مرسلة من *§* عــذابــــــة *§* (رقم العضويه 4153) on :

quote:
والله ياوصايف ماهقيته منك عن جد انصدمت يوم قريت وانتي كاتبه الى يتزوج من برى غبي ومو اي غبي كمان يتمتع بنسبة غباء ليش ياوصايف وانتي توصفين اغلى واحب انسان الى قلبي ونور عيوني الي اطالع الله ثم اطالعه (ابوي) الغالي انه غبي وكمان شديد الغباء...عن جد جرحتيني...مشكوره يا مشرفتنا وصايف

جوري الشرقية ..

اختي ..

لا تاخذين كلام الأخت وصايف بجدية

هو مجرد راي خاص فيها .. يعني حرية راي غناتي

ليش زعلتي يوم قالت هالشي ..

ليش ما استانستي .. يوم غيرها قال ..

يوافق عالزواج من هالنوع .. بس بشرط واااحد ..

هو وجود شي غالي وثمين .. وما في اي كلمة تقدر توصف معنى في هالدنيا

عرفتي شو هو الغلا [Razz]

[[ الحـــب ]] [blushing]

لأتمنى ما تاخذين باخاطرج من كلام وصوتنــا .. لانه هو مجرد راي شخصي ..

والسموحــة الغالية للمداخلة [help]

بس حسيتج تضايقتي واااااايد [Frown]

والسموحــة منج مرة ثانية

مرسلة من جوري الشرقيه (رقم العضويه 5941) on :

quote:
هو مجرد راي خاص فيها .. يعني حرية راي غناتي

اوكيه عذابه تقول رائيه بكل حريه بس مو على حساب الناس

quote:
والسموحــة منج مرة ثانية

اول شي ثانكس على اسلوبك الاكثر من رائع عن جد حسيت انك اختي الثانيه والله يعطيك مليون عافيه وثانكس

مرسلة من وصايف (رقم العضويه 258) on :

مرحبا جوري..
عزيزتي ليش دايم متسرعه وماتعطين نفسك وقت عشان تستوعبين الكلام المكتوب؟؟

انا ماتكلمت عن والدك ولا عن اى احد..

انا قلت وبصريح العباره..
تلقين الشخص خلينى اتكلم عن السعودي ديرتي
هالسعودي(اللى معقد نفسه بالزواج) لمن يجي يبي يتزوج شروطه
ابيهااصل وفصل..وابيها 220..
وابيها من اصل نجدي..وابيها وابيها..
واذا ربي ماكتب له يتزوج من هنا يسافر برى..
اى وحده ياخذها..شروطه اللى كان حاطها كلها تبخرت
لا اصل وفصل ..ولا 220 ولا غيره
مجرد مره والسلام..

كلامي هذا فيه شى يزعل؟؟

كلامي ياجوري كان واضح ومايحتاج توضيح..
فعلا انعت هالشاب اللى يتصرف مثل هالتصرف انه شاب غبي..وقمة فى الغباء بعد..

بنات بلدك تارسين الديره..
الجمال..والاصل والفصل..ويدور برى..

حبيبتي لاتاخذين كلامي على انه موجه لشخصك..
انا خصصت او اللى قصدتهم فئة من الشباب عندها عقدة النقص..هذى كل السالفة..

وعاد الا جوري تزعل علينا..
ترى مانقدر على زعلك ياجوري..
وانا فعلا ماكنت اقصدك او اقصد اى شخص بالذكر..
لكن هذا رأيي..ويتهيا لى انه مايزعل..

وجهة نظري الشخصية وقلتها بكل صراحه
وغير كذا مامست ابد..ليش هالحساسية؟؟

مرسلة من أجمل إحساس (رقم العضويه 9558) on :

مشكورين كلكم على الردود والمشاركه.

ان شاءالله محد يزعل من كلام الثاني .. لان كل واحد يقول رايه.

أختكم: أجمل إحساس

مرسلة من Bo raas (رقم العضويه 709) on :

الزواج قسمه و نصيب..... و اللى الله كاتبه يبى يصير........

بس..... لى تعقيب على كلام الغاليه وصايف:

كود:

 حبيبتي ماتلاحظين ان هالرجال اللى يتزوجون من برى الكويت او برى السعوديه مثلا
 من لبنان ولا مصر يتمتعون بنسبة غباء ماهى قليله..

اعتقد يا الغاله خانج التعبير هالمره.. طلع اللى يتزوج لبنانيه او مصريه غبى

عيل اللى متزوج او امه اجنبيه شنو يطلع [smash]

[ 23. يوليو 2003, 08:26 AM: تم تحرير المشاركه من قبل: Bo raas ]

مرسلة من أجمل إحساس (رقم العضويه 9558) on :

مشكور اخوي بو راس على الرد والمشاركه بالموضوع [Smile]

مرسلة من BECKHAM-Q8 (رقم العضويه 7230) on :

اذا كانو من الخليج فحنا نعتبر نفسنا ديرة وحده

واهم شي التفتهم مثل ماقال اخوي ليل الموادع

مرسلة من أجمل إحساس (رقم العضويه 9558) on :

مشكور اخوي بيكهام على الرد والمشاركه في هالموضوع المهم.

انا رايي من رايك [Smile]

مرسلة من الموج (رقم العضويه 10309) on :

اجمل احساس هلا فيك واشكرك على الموضوع واشارك (عذابه) في رايه الحب وحده يزيل جميع العقبات

ولكم تحياتي

مرسلة من بنت الباشا حنفي الاوبهه (رقم العضويه 8650) on :

وشــــــــــــــووله عاد

وليـــــــــه اخذ الاجنبي [nervous]

قلو شبابنا ولا قلو بناتنا

مابـــــــــــــــدي غير سعودي [Wink]

مرسلة من ابتسام (رقم العضويه 9921) on :

موزين جذي

مرسلة من الموج (رقم العضويه 10309) on :

الحقيقه يعجبني فيكم الصدق في طروحاتكم ومناقشاتكم وهذا يدل على وعي المشاركين في ايجاد الحلول والمناقشه الصادقه اشكركم جميعا.

وبهديكم كل الامي واوجاعي وهمومي بس رجاء يتم التوزيع بينكم بتساوي لاحد ياخذ زياده

مرسلة من أجمل إحساس (رقم العضويه 9558) on :

مشكورين كلكم على ردودكم وعلى الروح الرياضيه [Smile]

والاختلاف بالرأي لا يفسد للود قضيه...

UBB.classic™ 6.7.1