مرسله في
عايز اطمنكم على انغام لأن في اخبار كتير بتتنشر مش صحيحة.. لسة تداعيات الجراحة مسببالها ألم والاعراض الجانبية للعملية تستدعي بقائها في المستشفى ايام اخرى لغاية ما يسيطروا عليها.. انا باطمنكم عليها أول بأول علشان تبقوا عارفين الاخبار الدقيقة بعيدا عن الشائعات وعلشان طبعا وده الاهم تدعولها..
مرسله في
مش قادرة أتصور إن الست دى كانت واقفة ماسكة نفسها وصالبة طولها وبتغنى ف العلمين 4 ساعات لايف والحفلة منقول مباشر ع الهواء
وتانى يوم تاخد بعضها وتسافر ألمانيا عشان بعد تقريباً شهر نتأكد إن التعب واضح إنه كبير وأزمتها الصحية بالفعل شديدة ومش سهلة عليها أبداً كانت تقدر تعتذر وتلغى الحفلة أو تأجلها
الست اللى تعمل كدا ست بطلة بتحترم نفسها وشغلها وبتقدر الناس اللى دافعة فيها فلوس عشان تسمعها وقاعدة ف التلفزيون تتفرج عليها
لدرجة إنها حتى متكلمتش ف المنطقة دى خالص حتى من باب تعاطف الناس معاها ولا حسست حد بأى حاجة قصاد حاجة زى كدا لازم أرفعلها القبعة وأشيد بقوتها وتماسكها وف نفس الوقت بدعيلها ربنا يشيل منها و يخفف عنها ومنسمعش خبر وحش عنها وتقوم بالسلامة بأمر الله Angham
مرسله في
منقدرش ننكر إن أنغام صعبانة علينا جدا بأثر رجعي .. صعبانة علينا علشان محدش دعمها بالقدر اللي تستحقه لما قررت تطلب بنفسها الدعم من الجمهور وهي بتبكي في مداخلة مع لميس الحديدي، وتترجى الجمهور إنه ميتخانقش باسمها على السوشيال ميديا، ويدخل في صراع مع جمهور شيرين. صعبانة علينا علشان كانت في المستشفى مش عارفة لسه تشخيص حالتها إيه والناس كانت على السوشيال ميديا بتقطع فيها وبتتهمها إنها ورا حملات الهجوم على شيرين، صعبانة علينا علشان اضطرت تطلع تقول للناس إنها مريضة وفي المستشفى علشان الناس تصدقها وترحم ضعفها ومرضها، لكن رغم كدا الناس موقفتش أوي عند كلامها غير في سياق إنها بتدافع عن نفسها وبتنفي الاتهامات اللي بتواجهها علشان الهجوم عليها يقل. محدش اهتم بفكرة إنها مريضة، يمكن علشان موضحتش طبيعة المرض، أو يمكن علشان بعد المداخلة الناس شافتها في حفلتين متألقة، فالكل أعتقد إنها كانت وعكة صحية بسيطة.. علشان كدا ليها عندنا اعتذار مستحق. الحقيقة محدش تعامل مع بكاء أنغام وقتها على قدر الوجع اللي كانت حاسه بيه. الناس عندها عذر لأن مكانش حد يعرف إنها بتعاني من مشكلة كبيرة، ربنا يعديها منها على خير. لكن بعد ما أزمتها الصحية طولت، و الغموض زاد حوالين طبيعة الحالة الصحية، زاد القلق عند الجمهور، بأن حب الجمهور ليها، الكل بدأ يدعي لها ويقول يا رب تعدي من أزمتها على خير.. احنا شعب طيب جدا وبنحب الخير للناس خاصة لما بيكونوا في موقف ضعف. لكن دا مش هيلغي إنها كانت تستحق إن الجمهور يدعمها أكتر لما طلبت بنفسها الدعم على الهوا وهي بتبكي. أنغام فنانة كبيرة أوي، وإنسانة جميلة جدا، وتستحق إن كل الناس تدعمها، اللي من جمهورها، واللي من جمهور المطربين التانيين، كله يدعمها، يمكن الدعم دا يوصل لها ويكون سبب في إنها تقدر تتجاوز أزمتها الصحية وترجع بالسلامة.
لمحبي انغام الكتير قوي.. قوي قوي.. هاقولكم احدث الاخبار مساء السبت من ميونخ.. كنت منتظر نتائج التحاليل زي ما قلتلكم في اخر خبر كتبته عن انغام.. الحمد لله الأرقام تقترب جدا من الأرقام الطبيعية.. ونصح الأطباء انغام بالمشي خارج غرفتها.. وهي الحمد لله بتاكل بشكل طبيعي.. الكلام عن وجود خراج على البنكرياس غير صحيح اطلاقا.. ولم يحدث أي خطأ طبي في العملية.. والمضاعفات اللي حصلت هي المضاعفات اللي ممكن تحصل في النوع ده من الجراحات الكبيرة والخطيرة.. وزي ما قلتلكم انغام اختارت المستشفى دي لانها متخصصة في الجراحات الخاصة بالبنكرياس.. كمان انغام لم تخضع ل ٣ عمليات جراحية زي ما اشيع.. واخيرا بالنسبة للألم الحمد لله دلوقتي في تراجع . عايز اقولكم ان المحنة اللي مرت بيها انغام كشفت عن حالة حب حقيقية في منتهى القوة والصدق.. وهي تستحق ده.. انا اعرف انغام من سنين طويلة وعارف هي تعبت وشقيت قد ايه علشان توصل للي هي فيه.. فحبكم الصادق جدا هو لفنانة صادقة جدا.. وتستحقه.. دعواتكم بقى علشان تقوم بالسلامة وتعبر رحلة الألم والحب..
إرسال هذه الصفحه لصديق!
لطباعه هذا الموضوع
![البريد الإلكتروني [ مـختلـف ]](http://salmiyaforum.net/ubb/email_ubb6.gif)
![[eyelove]](graemlins/eyelove.gif)
