احس اننا احنا العرب اكثر فانز تصير لهم اكشن ومغامرات عشان نحصل اصدارات يالله مو معقول ..!!
لكن الحمد لله على كل حال
ولولا هالآكشن عقولتك ، جان ماحسينا بقيمة هالإصدارات وفرحتنا بتكون عادية وأقل نوعاً ما، يعني صدقني لو الفيلم نزل بالمحلات وبشكل طبيعي وفيفا عادي ماعليها شر، جان مابتشوف أغلب الأعضاء بالشلة رادين بالموضوع نفس اللي صار مع الديناصور اللطيف، محد علق عالتغطية بالدليل إلا كم من واحد رغم احتواء هذاك الإصدار على شيء جداً رهيب وخطير وهو اللوجو المعرب هذا غير الدبلجة الفخمة للفيلم، لكن ومع هذا كان في متناول اليد، والدليل كان يصرخ من الردود، حتى أتذكر يومها أنت كنت كاتب (( توك ناش من النوم )) وبس
معاك حق بكل كلمة قلتها بخصوص الاصدار وحلاته لما نحصله بطرق اصعب شوي لكن بعد ما ننسى حلاة الفيلم وهو يكون عالرفوف مرصوص رص بكل الصيغ
مفتقد هالشي جداااا
كنا حاطين ايدنا بماي باردة ولا نشيل هم انه مابينزل اصدار معين ومن فترة من الفترات كنا نقول خلاص الافلام القديمة راحت علينا ومابنشوف اصدارات جديدة منها وعلينا العوض بالافلام الجديدة ..! بس مع اللي صار في زوتوبليس خلانا نخاف انه نفس الشي ممكن يصير مع الافلام الجديدة بحيث تنقطع عندنا بس سبحان الله .. وعلى نياتكم ترزقون
يتسكر باب وينفتح باب ثاني
--------------------
المشاركات: 1978 | من: K.S.A - Jeddah | تاريخ التسجيل: أغسطس 2011
|
طبعا حاطين صور المحل بالموقع و ماشالله شكله محل ضخم و مليان بلاوي متلتله .. خاطري اروح دبي مخصوص عشانه
الحين اللي عرفته من فروع فيرجن الأمارات انه كل الأفلام اللي من توزيع فيفا انسحبت و مابقي الا الأفلام اللي من توزيع شركة سكوب عندهم
اتوقع لين يتم الأتفاق النهائي مع الشركة الجديدة هالأفلام كلها بترجع تنزل مع زوتروبوليس و حتى الافلام الجديدة باتمان و سوبر مان وغيرهم اللي مانزلو للحين
بس اللي مستغرب منه شلون هالمحل ظل محتفظ بالستوك و قاعد يبيع منه
اشتر من امازون احسن لك ترا كل بضاعة ديزني اليديدة و القديمة تلقاها هناك ، و انصحك تشتري من موقع ubuy الكويتي لأن هالموقع له عدة مواقع مخصصه لكل بلد
يطلع لك سعر البضاعه بالكويتي و تشتريها بالسعر الكويتي و كي نت بعد .. و هو يتكفل بالعنوان و الشحن و التوصيل و كل شي .. طبعا راح تدفع سعر الشحن و جذي بس قصدي يفكك من اي خطأ أو ان فلوسك تروح عليك
من بعد الإكتشافات الأخيرة واللي كانت جداً سارة, قررت أزور هالمحل اللي تكلمتوا عنه وأشوف شو عندهم, وصورت لكم بعض الصور عشان تعرفون اللي موجود حالياً عندهم, وترى شكل تصميم المحل نفسه ماتغير , قصدي نفس الصور اللي انحطت فوق
مثل ماتشوفون إصدارات زوتوبيا مصفوفة بجميغ صيغها
وعندكم هالسلة أسعارها مخفضة للثري دي والعادي وهذا محتواها
السلة محتواها أغلبه لديزني وفرصة للي ناقصنه شيْ يقدر يكمله مثلاً أنا أخيراً حصلت بريف البلوراي العادي عندهم كنت أدوره من زمان
وهاذي بعض الديفيديهات المخفضة
قسم البلوريهات عندهم عبارة عن ربع المحل ويحتوي على العديد من الإصدارات المختلفة وستوكات كثيرة لأفلام كنت أدورها لسوني ولقيتها عندهم, بالإضافة إلى العديد من الإصدارات البريطانية, والربع الثاني من المحل عبارة عن ديفيديهات لايف آكشن وماخذة مساحة كبيرة
وكذلك المحل يتبع نظام التأجير وهالقسم الخاص بالبلوريهات المأجرة
والقسمين الأخيرين بالمحل عبارة عن ديفيديهات الأطفال والكارتون بروحها بزاوية آخر المحل وصوبها قسم ألعاب ودمى
وهذا القسم الملكي
وبعدها لقيت زاوية آخر المحل فيها مكتب وستوكات وايد فاستغليت الفرصة وصورت
طبعاً استغليت الفرصة وخذت كل اللي خاطري فيه وأسعارهم حلوة وأقل عن كارفور حتى , نصيحة مني اللي ناقصه شيْ يزور المحل وبيلقى عندهم واايد أشياء وأهم شيء ألبوم يلازمني خيالك للفنانة أحلام طلعت من المحل وبإيدي أربع نسخ كان خاطري بزيادة بس ماعندهم
وقعدت أسولف مع الفلبينية عن المحل وقالت لي هذا الفرع الوحيد
ولما سألتها عن إمكانية شراء أفلامهم من النت قالت تقدر تشتريهم عن طريق موقع سوق، المكان الرسمي للمحل، وقالت إنه زوتوبيا صار بالنسبة لهم الأكثر مبيعاً بالموقع، ومنصدمة إن الناس تشتريه على كل الصيغ في كل أوردر رغم إنه لنفس الفيلم، فقلت لها هذا شيْ طبيعي لوول وهالصناديق اللي تشوفونها عبارة عن ستوكات بيرجعونهم لفيفا لحد ما الشركة اليديدة تعيد تسعيرهم وتوزيعهم بالمحلات
[ أغسطس 10, 2016, 05:58 PM: تم تحرير المشاركه من قبل: [ L.O.V.E.R ] ]
اشتر من امازون احسن لك ترا كل بضاعة ديزني اليديدة و القديمة تلقاها هناك ، و انصحك تشتري من موقع ubuy الكويتي لأن هالموقع له عدة مواقع مخصصه لكل بلد
يطلع لك سعر البضاعه بالكويتي و تشتريها بالسعر الكويتي و كي نت بعد .. و هو يتكفل بالعنوان و الشحن و التوصيل و كل شي .. طبعا راح تدفع سعر الشحن و جذي بس قصدي يفكك من اي خطأ أو ان فلوسك تروح عليك