popular من أفضل المسلسلات الأجنبية الي تتكلم عن حياة المراهقين داخل المدارس. اعتبر هذا المسلسل هو الستاندرد والأساس. ومن بعده فرخوا باجي المسلسلات الي من طقة glee لاني اعتبر glee وغيره تحصيل حاصل. مسلسل بوبيلر انتج سنة 1999 واستمر لحد 2001
عدد حلقات المسلسل 43 حلقة توزعت على موسمين فقط. وللأسف مع انتهاء الموسم الثاني والي كانت تهايته تستدعي وجود موسم ثالث على الأقل!! أو خاتمة معقولة مو يخلونها مفتوحة.
منتج العمل وقتها قال انه راح يتمم هالعمل بفيلم تلفزيوني علشان يخلي لعشاق هالمسلسل خاتمة لكن للأسف مرت السنوات وتم طي صفحة هالمسلسل. خلوني أقولكم أبطال هالمسلسل الي حبيتهم وتعلقت فيهم.
ليزلي بييب
لعبت دور " بروك " المشجعة ذات الشعر الأشقر والاكثر شعبية والي كل البنات يحبون ياخذون تألقها وشهرتها ويتمنون يمشون معاها. بروك ماكوين كانت طيبة القلب لكن نيكول صديقتها تأثر عليها ف بروك شخصية غير واثقة بحالها.
كارلي بوب
لعبة دور " سام " امووت عليها ولما شفت صورها بعد هالسنين من انتهاء المسلسل صايرة مزة المزز وشخصيتها بالمسلسل تكون ضد بروك في كل شي وتنشأ بينهم حروب داخل المدرسة
تمارا ميلو
أدت دور " ليلي " شخصيتها تحب البيئة وضد قتل الحيوانات واتهموها بالشذوذ لكن بالاخير تزوجت جوش وهي من صديقات " سام " المقربات
كريستوفر غورهام
أدى شخصية " هاريسين " والي يحب " سام " بجنون ولكنه ما يبوح لها بهالشي. وصارت مشاكل وحب "بروك" لأن سام حبت واحد ثاني لكن بالنهاية اعترف بحبه لسام لكن للأسف بسبب النهاية الغير مكتملة ماعرفنا شنو صار..
سارا رو
أدت دور " كارمن " الفتاة البدينة الي ماعندها ثقة بنفسها ودايما منبوذة وحلمها تكون من فريق المشجعات علشان تحس بقبول لكن دايمًا توقف لها نيكول بالمرصاد وتهزئها.. تمر بمراحل متقلبة بحياتها وتحب أكثر من شخصي وهي من ضمن الصديقات المقربات لسام وليلي مسوين قروب 3 بنات مع بعض نفس الشخصيات ومعاهم هاريسين
برايس جونسون
ادى دور " جوش فورد " كان حبيب بروك وكان الأكثر شعبية من بين الشاب لاشتراكه في فريق كرة القدم الأمريكية ووسامته فكان حلم كل الفتيات. تتوتر علاقته في بروك ويتركون بعض ويحب كارمن المتينة فترة ويتركون لكن بعدين يحب ليلي ويتزوجون في نهاية الموسم الثاني من المسلسل. ولكن ماندري شنو يصير لان للاسف نهاية المسلسل ماعطتنا شنو الأحداث اللاحقة هل تطلقوا لأنه مع ليلي صغار وتزوجوا بسن ما يسمح لهم يقضون حياتهم. امه وابوه ينفصلون فيضطر يعيش مع أمه. لكن لما قرر يتزوج ليلي ابوه فرض عليه شروط وامه راحت اشتغلت في ولاية ثانية.
تامي ليان مشيلز
أدت شخصية " نيكول جوليان " الفتاة الحقودة صاحبة المشاكل والسوسة والي تبي الزين لها وهي صاحبة بروك الروح بالروح. ولأن بروك طيبة، دايمًا نيكول تكون الشيطان الخفي وتحرضها على اعمال دائمًا ما تندم بروك عليها بعد فوات الأوان. شخصية نيكول حلوة وعلى كثر الشر الي تسويه ففي حلقات يصحى ضميرها ونشوف نيكول الانسانة. لكن بالحلقة الأخير من الموسم الثاني والاخير تكون نيكول بالسيارة ومخمورة وتصدم بروك الي طلعت من الحفلة زعلانة بعد ما هاريسين اختار سام حبيبته.
رون لستر
أدى شخصية " شوغر دادي " البدين الي يكون صديق جوش فورد صاحب الشعبية الكبيرة. ويمر بمواقف بسبب سمنته واستهزاء الناس فيه.
ليزلي غروسمان
ادت شخصية " ماري تشيري " هذي اعتبرها بطلة المسلسل بامتياز هبالها وجنونها يدرسون أموت عليها أم حنج للأسف بعد هالمسلسل طلعت في أفلام بأدوار كومبارس انقهرت!!! مع انها مبدعة وتمثل عدددل بس مادري ليش مايعطونها فرصة!! كانت ماخذة دور الفتاة الغنية بالمسلسل الي عندها اموال طائلة وصديقة نيكول ودايمًا تطيح في بلاوي ومشاكل ومختلفة عن بقية زملائها. باختصار شخصية " ماري تشيري " مميزة جدا
ليزا دار
ادت دور " جين " وهي تكون أم سام زوجها متوفي بالسرطان وتتزوج " مايك " والد بروك. يعني سام وبروك يصيرون خوات!! تخيلوا يكرهون بعض بالمدرسة وفجاة والدينهم يتزوجون وينجبرون يعيشون مع بعض ف تصير بينهم مواقف وااااايد بالبيت لحد ما سام وبروك يتآلفون ويصيرون مثل الخوات وأكثر..
سكوت برايس
أدى دور " مايك " والد بروك زوجته هجرته وهجرت بنتها بروك وراحت نيويورك وتزوجت واحد اصغر منه. ف مع مرور الوقت يحب " جين " ام سام ويتزوجون. ويخلف من " جين " بنت. يعني يصير عندهم 3 بنات
دايان ديلانو
أدت شخصية " مس غلاس " المعلمة المسترجلة لدرجة ان الطلاب يسمونها SIR ههههههه نظرًا لخشونتها. لكن دايما ما يطلع منها الجانب الانثوي. ادت الممثلة دايان في هالمسلسل أكثر من 3 شخصيات وكانت مبدعة الى حد الثمالة. وايد حبيت تمثيلها تدخلك بمووود ثاني وعالم ثاني. وعلى الرغم من قسوتها وحدتها وتذمر الطلاب منها الا انها يطلع منها مواقف انسانية..
======
( شوفوا شكلهم وهم صغار وقارونهم بصورهم فوق وهم كبار ههههه فرق )
شفت المسلسل أول مرة على mbc4 حطوا موسم واحد فقط في 2007 وظل المسلسل محفور في بالي لحد ما شفته موجود امازون ف شريته واستمتعت بكامل حلقاته.انصح كل ما شاف المسلسل ويحب هالنوعية من المسلسلات يشوفه. بس راح ينقهر بالحلقة الأخيرة.
منو شاف المسلسل؟ ودي أتكلم وياكم عنه منقهر على جم شغلة. لاني امس خلصت من الموسم الثاني وأبي اطلع الي بجبدي
حمزة
[ مارس 20, 2015, 01:20 PM: تم تحرير المشاركه من قبل: حمـزة ]
صج والله متابعين المسلسل!! والله توقعت محد شايفه الا انا!! صج صج قهر انهم انهو الموسم الثاني بهالطريقة الفاشلة قهرووووني.. المشكلة ان الناس حابته وشفت وايد ناس يتحلطمون انه انتهى بهالصورة.. ع الاقل لو خلوا نهاية منطقية علشان يريحونا بس للأسف ماسووها..
جوران: ههههههه اي اي ماري تشيري عسل خاصة لما تضحك لها ضحكة مميزة كأنها ضحكة الكرتونز مادري شلون تضحك.. كلبة
ومشهد المجرم هذا كان من الحلقات الأخيرة للموسم الثاني بس تموت ضحك تصرخ يعني عايشة دور الخايفة والمهلوعة
========
شفتوا شوغلر دادي صار عود كبريت!!!! كان دب بطة الحين صار حاله حال جوش الظاهر سوا تكميم