بما انه بكره بيكون موعدنا اخيراً مع ابداع بيكسار الجديد
خاطري استرجع معاكم بعض المشاهد المميزه اللي محد يقدر يطلعها بهالصوره السينمائيه المتكامله غير بيكسار
طبعاً افلامهم كلها روعه من البدايه حتى النهايه
لكن تستهويني المشاهد العميقه اللي مادري شلون تنجح بيكسار بصناعتها .. بحيث انك تصدق المشهد اللي قدامك بكل جوارحك
ومثل ماراح تشوفون كل المشاهد اللي بذكرها مالها خص بالكوميديا
بالرغم من ان بيكسار تبرع بكوميديا الموقف اللي تفتقر لها باقي افلام الانميشن العاديه
بس في مشاهد عميقه عالقه بذهني .. بحيث اني كل ماسترجع الفلم واتذكره ماتذكر الا المشاهد اللي باكتبها الحين
لو في فلم ماشفتوه طوفوا فقرته عشان لايحترق عليكم
نبدا جولتنا البيكساريه مع اول فلم لهم :
Toy Story 1
من اكثر المشاهد اللي احبها بهالجزء مشهد بز يطير لما يكتشف انه مجرد لعبه عاديه من خلال الاعلان التلفزيوني اللي شافه بالصدفه .. مشهد عميق وتعابير وتصرفات بز لما اكتشف انه كان عايش طول حياته بجذبه من اروع ماشفت ..
a Bug's Life
مشهد اتحاد النمل ضد الجراد بأخر الفلم وكيف انهم تمردوا على وضع العبوديه اللي كانوا فارضينه عليهم الجراد وانتصروا لما حطو يدهم بيد بعض .. كل ما اتأمل بفكرة المشهد الاخير واتذكر وضع الشعوب المغلوب على امرها وكيف ان الفلم قدر انه يعكس واقعهم من خلال حياة حشرات صغيره مثل النمل والجراد يزيد اعجابي اكثر بهالفلم !!
Toy Story 2
مشهد اللعبه جيسي وهي تسرد قصتها الحزينه لوودي وكيف ان رفيجتها اللي كانت بالنسبه لها كل حياتها تخلت عنها لما اكبرت .. الطريقه والاسلوب اللي اعرضوا من خلالها سالفة جيسي ابداع ماله مثيل على وجه الكره الارضيه .. مشهد يأثر بالصغير والكبير .. خصوصاً اللي عاشوا نفس تجربتها وعانوا من عدم وفاء اصدقائهم لهم ..
Monster's Inc
المشهد الاخير لما حاول المارد انه يصلح الباب اللي يوصل لغرفة الطفلة بوو عشان يفرح رفيجه الوحش شلبي .. شوفوا لاي درجه الاخلاص .. تقطعت يده وهو يجمع كل ذرة خشب عشان يرجع الباب مثل ماكان بس عشان يفرح رفيجه .. وتكملة المشهد ايضاً مؤثره لما يكتشف الوحش انه يملك اخر قطعة .. ومشهد الختام لما يفتح الباب ويشوفها ويبتسم .. ابداع والله
Finding Nemo
مشهد البدايه بكل بساطه واحد من اجمل المشاهد اللي تم عملها في بيكسار وغير بيكسار .. مشهد مؤثر وعميق وسوداوي بعض الشيء .. لاحظوا معاي الفكره شلون بسيطه لكن مليانه عواطف .. زوج وزوجته من اسماك البهلوان توهم ناقلين بيت جديد ومعاهم احلام وتطلعات لمستقبل حلو مع اطفالهم اللي مازالوا في بيضاتهم .. فجأه وبلمح البصر تختفي كل احلامهم لما يهجم عليهم سمك قرش .. وتموت الام بعد ماضحت بحياتها لانقاذ اطفالها .. ومايتبقى شي للزوج المنكوب غير طفل واحد بس .. شوفوا معاي جمال السرد والصوره والمشاعر الفياضه اللي تحطنا فيها بيكسار .. بذمتكم مب ابداع ؟
The Incredible
من اروع افلام السوبر هيروز ويعجبني في بيكسار انها تنبأت بموجة افلام الابطال الخارقين قبل لاتطلع بهالكثافه من خلال هالفلم .. الفلم فيه مشاهد وايد حلوه .. لكن من اكثر المشاهد اللي حبيتها لما كانت العائله كلها تحارب يد بيد في الغابه ضد اعوان الشرير ..
Cars
المشهد اللي يعرض ذكريات مدينة الرادياتير اللي كانت عامره بالحياه بالستينات والكل يزورها قبل لاتغير الحكومه الطريق اللي يمر عليها بهدف اختصار الطريق على المسافرين .. المشهد جداً حزين ويعور القلب ويخلينا نتأمل بالتطور الرهيب اللي قاعد يصير كل يوم وكيف ان هالتطور بالرغم من انه يوفر علينا الوقت لكن يفقدنا متعة انجازه ..
RATATOUILLE
من المشاهد المهمه بالفلم واللي كل مارجع اشوفها انبهر بطريقة اخراجها وصياغة الحوار فيها .. مشهد ريمي وابوه لما كانوا قدام المحل المخصص لقتل الفئران .. طموح ريمي وثقته بموهبته ماخلته يشوف مستقبله مثل ماكان موضح قدامه على زجاج المحل .. ميت بمصيدة فيران .. طموحه كان يقوله انه مستقبله بيكون غير اللي يشوفه قدامه .. بإختصار مشهد ملهم .. حبيت العمق والفلسفه اللي فيه ..
WALL-E
ابداع ماله حدود .. كل مشاهد الفلم رهيبه وتنبض بالحياه .. لكن اكثر مشهد حسيت انه عالق براسي مشهد رقصة الحب اللي كانوا يرقصونها والي وإيف بالفضاء .. السينماتوغرفي بهالمشهد يخطف الانفاس من روعته ..
_____________________________
تسع افلام .. تسع تحف
تسع اعمال شفناها وبنتم نشوفها وبنتم نضحك ونتأثر ونستمتع فيها
بيكسار ماتقدم اعمال عشان تعيش يوم ولا اسبوع ولا شهر ولا سنه وينسونها الناس ..
بيكسار تقدم اعمالها للتاريخ ..
مع كل فلم لهم يزيد احترامي لابداعهم واخلاصهم بتقديم ماده ممتعه ومفيده للمشاهد
ياترى شنو بيكون مشهدي المفضل بتحفتهم الجديده UP !!
بكره انشاءالله بعرف الاجابه
[ يونيو 04, 2009, 01:04 AM: تم تحرير المشاركه من قبل: [ L.O.V.E.R ] ]
--------------------
المشاركات: 27170 | من: ~ NeverlanD ~ | تاريخ التسجيل: يوليو 2002
|
لاجديد مع بيكسار .. الابداع عندهم مثل النهر المتدفق اللي ماله نهايه .. Up يعتبر امتداد لسلسلة ابداعات هالشركه اللي ماتعرف معنى الفشل او كيف تصنع فلم رديء .. بجديدهم أب تركز بيكسار على المعاني الانسانيه الجميله مثل العائله والحب والاخلاص والتضحيه .. الفلم يقدم سيل من اللحظات المؤثره والمشاهد الكوميديه الراقيه اللي تعتمد على كوميديا الموقف .. كل الاشياء اللي يحب يشوفها المشاهد عالشاشه راح يحصلها بسهوله بالفلم .. مغامره مثيره وسط غابات الامازون بين التلال الصخريه وشلالات الجنه تذكرنا بأجواء مغامرات انديانا جونز .. رومانسيه ومشاهد حب صادقه ومؤثره بين زوجين يحبون بعض .. كوميديا خفيفه ومرحه ونظيفه ومافيها اسفاف وتصلح لكل العائله .. موسيقى اخاذه وساحره تأسر المشاعر وتاخذنا لاجواء افلام هوليوود بعصرها الذهبي .. بإختصار فلم ممتع ومؤثر ومحكم الصنع من البدايه للنهايه ..
يستعرض الفلم حياة كارل فريدريكسن من الطفوله للشباب واخيراً للكهوله بالربع الساعه الاولى من الفلم على طريقة المونتاج .. مشاهد صامته تتخلها موسيقى ساحره من المبدع اللي قدم لنا موسيقـة راتاتوي .. بيكسار قدمت في افتتاحية الفلم خلاصة خبرة سنوات طويله من الابداع وصنعت افتتاحيه جميله وساحره .. تضحك وتحزن فيها بنفس الوقت .. بيكسار تلعب بمشاعرنا بهالوقت البسيط مثل مايلعب الرسام برشيته .. يغير ويحول ويطرطش على لوحة الرسم مثل مايبي .. وكأنه مشاعر المشاهد لعبه سهله بيدهم .. حرفيه عاليه مادري من وين يجيبونها !!
الافتتاحيه كانت روعه .. من منا لما كان صغير ماكان عنده بطل طفوله ؟ .. كارل نفس الشي .. بطل طفولته كان المستكشف المغامر مونتز .. طريقة اظهار اعجاب الطفل كارل ببطل طفولته والبرائه اللي بحركاته شي ماينوصف .. لما يرفع يده ويقلد حركة صبعه .. او لما يركض عالرصيف ويقفز فوق الحصى ويلف عن جذع الشجره ويتخيل انه يقود طيارته الخاصه .. برائه مالها حدود راح ترسم على وجوهكم ابتسامه عريضه وتاخذكم لعالم طاهر ومليان حب .. او لما يلتقي بالطفله ايلي ويتعرفون على بعض مثل اي طفلين عايشين بعالم غير اللي احنا عايشين فيه .. شي ماينوصف والله .. وكيف اخر شي تزوجوا واشتروا البيت اللي كانوا يلعبون فيه بطفولتهم وعدلوه وعاشوا فيه حياة سعيده ومثاليه .. وبعد كل هالمشاهد المليانه حب ياخذنا الفلم لمنعطف سوداوي .. حزين ومؤثر .. عظمة الفلم كلها تكمن بعرض هالمشاهد بدون حوارات .. وقدرتها على التأثير فينا .. مجرد مشاهد صامته مع موسيقى جميله .. عالعموم بيكسار تبرع بهالشي مثل ماشفنا بتحفتها السابقه والي .. فهالشي مب غريب عليهم !!
من الاشياء اللي اثارت اعجابي فعلاً الحبكه القصصيه المبهره والسيناريو الرائع اللي صاغوه أنامل المبدعين في بيكسار .. فمثلاً التحولات اللي مرت فيها شخصية كارل والتغير اللي طرأ عليه بعد ماتعرف على الطفل راسل كانت بإختصار من اروع الاشياء بالفلم .. وبعدين تخيلوا الوضع الغريب اللي انحط فيه كارل .. رجل عمره 78 سنه مع طفل اصغر منه بـ 70 سنه بمكان واحد معلق بالسما وماعندهم مفر .. جيلين مختلفين اجبرتهم الظروف انهم يتعاونون عشان كل واحد يحقق حلمه .. كارل يحلم بالوصول لشلالات الجنه .. وراسل يحلم بشارة مساعدة المسنين .. بتكون رحله صعبه اكيد بس الاكيد بعد انه راح يتخللها مواقف غير متوقعه ومضحكه بسبب الفارق العمري الكبير بينهم ..
من اجمل الاشياء واللي تركت فيني اثر ان هالطفل كان بمثابة الملاك الصغير اللي دخل بحياة كارل عشان يحرره من سجن الذكريات اللي كان عايش فيه ويخليه يشوف الدنيا بمنظور ثاني تماماً .. صار كارل بالاخير بمثابة والد لهالطفل اللي علمه اجمل درس بالحياة وهو التضحيه وعدم تخلينا عن الاشخاص اللي نحبهم مهما كانت الظروف .. من المشاهد الجميله والمؤثره بعد مشهد كارل لما حقق حلمه وحط البيت بشلالات الجنه وبدا يتصفح كتاب مغامرات ايلي .. واكتشف ان الصفحات البيضه اللي كانت المفروض تعبيها بتفاصيل وصور مغامرة العمر اللي كانت تحلم فيها بشلالات الجنه .. عبتها بصور زفافها وحياتها مع كارل .. انصدم كارل وعرف ان ايلي كانت طول هالوقت تشوف حياتها معاه على انها اجمل واحلى من اي مغامرة ثانيه تحلم فيها سواء بشلالات الجنه او غيرها .. المشهد قوي ويترك اثر كبير وغريب بنفسية المشاهد .. وبعدها تجي اللحظه الاهم لما يحذف كل اثاث البيت ويروح ورى راسل .. عظمه على عظمه يا بيكسار !!
خلونا نتكلم شوي عن البيت .. الشخصية الصامته وبطلة الفلم الاولى مع كارل .. الرائع بالموضوع انه طول الفلم خلونا نشعر بأن البيت مش مجرد بيت عادي .. كنا نحس ان روح ايلي موجوده بكل جزء فيه .. كأنها كانت معاهم بكللل هالرحله .. وطبعا من اجمل مشاهد الفلم كانت مشهد تحليق البيت لاول مره .. الموسيقى روعه وطريقة ارتفاع البيت رهيبه .. والغريب اني صدقت فعلاً ان البالونات استطاعت انها تجلع البيت من مكانه وتطيره .. سحر غريب تملكني بمشهد التحليق ..
الفلم غني بالشخصيات المحببه والقريبه للقلب .. مثل الكلب الاهبل الظريف دوق .. والطائر الملون كيفن اللي يعشق الشكولاته .. والمستكشف مونتز وقلبه الاسود وحبه لمصلحته وبس .. وكلابه الغريبه اللي حتى لو كانوا كلاب مميزه وتتكلم بس يبقون بالاخير كلاب ويلحقون اي كوره يشوفونها .. بشكل عام الفلم يحتوي على توليفه جميله من الشخصيات اللي تخلي المشاهد يندمج معاهم من اول مشهد يظهرون فيه وكأنه يعرفهم من فتره طويله ..
اكثر جمله اعلقت براسي ( ذا ادفنتشر از أوت ذير ) وكل ماتذكر الجمله اتذكر ايلي وهي تقولها بطريقتها الهبله وهي صغيره بالمشهد اللي تسللت فيه لغرفة كارل .. تقول الجمله بطريقه خبله وتضحك وهي رافعه صبعها بثقه .. ايلي تجنن وفعلاً ماحسيت اني افتقدتها لانها كانت موجوده بكل جزء من البيت .. اخيراً اقول ان Up فلم رائع ويترك اثر عميق برسالته اللي يقدمها .. تعلمت من الفلم امور وايد وعرفت ان المغامره الحقيقيه واجملها على الاطلاق هي اللحظات اللي نقضيها بحياتنا مع الناس اللي نحبهم .. بالنسبه لي اعتبر Up بلا شك واحد من اجمل وامتع افلام لبيكسار .. واحطه بالراحه بين اهم ثلاث افلام بتاريخهم ..
من المشاهد المفضله :
* الافتتاحيه الجميله والمونتاج اللي بأول الفلم * مشهد تحليق البيت * مشهد دخول راسل البيت * مشهد راسل والجي بي اس * مشهد كارل لما يتخيل انه ينزل راسل * مشهد كارل وراسل لما كانوا قاعدين تحت المطر وكان راسل يتكلم عن ابوه بتأثر وكيف ايقظ مشاعر كارل وخلاه يحس فجأه بالمسؤوليه اتجاهه * مشهد الاسر لما دخلوا بين التلال الصخريه والموسيقى العجيبه المصاحبه للمشهد .. حسيت اني اشوف فلم لانديانا جونز * مشهد احتراق البيت * مشهد تصفح كارل لكتاب المغامرات الخاص بإيلي لما وصل شلالات الجنه * مشهد هواش الشيبان كارل ومونتز ولما يسدد كارل الضربه القاضيه بطقم اسنانه * مشهد سقوط البيت والجمله اللي قالها كارل بأنه مجرد بيت * مشهد حضور كارل لاحتفال تسليم شارة الكشافه لراسل * واخيراً وليس اخراً .. مشهد النهايه لما البيت حط رحاله عند شلالات الجنه ..
[ يونيو 06, 2009, 04:25 PM: تم تحرير المشاركه من قبل: [ L.O.V.E.R ] ]
--------------------
المشاركات: 27170 | من: ~ NeverlanD ~ | تاريخ التسجيل: يوليو 2002
|