رد مقتبس:المرسل الأصلي هو عليلو: شفتو من اسبوع تقريبا بالسينما
رهييييييب
عليلو عندنا .. يا هلا ويا مسهلا
تفاجأت لما شفت ردك وتفاجأت اكثر لما عرفت انك رحت السينما وشفت فيلم لديزني لول خلاص ضمنت ان الفيلم بيطلع رهيب
شفتو رهيييب بس لو نقارن و احنا شعب يحب المقارنات لول مع راتاتوي و والي ما بيوصل مستواهم بس عموما حبيت الفيلم و قضيت وقت ممتع و رحت له مخصوص السينما لاني قررت اعطي فرضة لافلام الانيميشن و موضوعكم تبع ديزني هوا اللي حمسني صراحة
هل أنت شجاع كفاية لتشاهد أحدث أفلام ديزني وبيكسار Brave في صالة السينما بصورة ثلاثية الأبعاد .. بالإضافه إلى الفيلم القصير والحائز على ترشيح لجائزة الأوسكار La luna والذي سيعرض قبله مباشرة؟
إذاً سجل عندك موعد العرض الأول في بلدك!
مصر: 15 أغسطس 2012. الأردن: 15 أغسطس 2012.
البحرين: 16 أغسطس 2012. قطر: 16 أغسطس 2012. الإمارات: 16 أغسطس 2012. لبنان: 16 أغسطس 2012.
--------------------
المشاركات: 27170 | من: ~ NeverlanD ~ | تاريخ التسجيل: يوليو 2002
|
ياعيني ياعيني على فانز ديزني مصر والاردن .. الفيلم بينعرض عندهم بكره .. الف مبرووك ويارب تبشرونا بالإنطباعات الحلوه عن الفيلم!
انا طبعاً شكلي راح ااجل مشاهدتي لبعد العيد لان بفترة العيد بتكون زحمه عالسينما خصوصاً العوائل والاطفال راح يكونون مصدر ازعاج بالنسبه لي وراح افقد تركيزي بالفيلم ..
افلام بيكسار بالسينما اعتبرها وجبتي السنويه المفضله .. اخر دلع .. اول شي نحلي بالاعلانات الجديده وبعدها الفيلم القصير المعتاد وبعدييييين الوجبه الرئيسية البيكساريه
--------------------
المشاركات: 27170 | من: ~ NeverlanD ~ | تاريخ التسجيل: يوليو 2002
|
OMG !!!!!! شباب أنا للحين مب قادر أستوعب شنو اللي شفته اليوم , أنا كنت رايح الفيلم وحاط فبالي إني رايح أشوف أحدث أفلام بيكسار , بس من أول مشهد تفاجأت صراحة وانصدمت , هل أنا قاعد أشوف فيلم لبيكسار أو فيلم كلاسيكي لديزني ؟؟!!! ياناس ياعالم , بيكسار في هذا الفيلم بالذات انسلخت عن جلدها تماماً , والله العظيم حسيت نفسي قاعد أشوف كلاسيكية من كلاسيكيات ديزني , اتفاجأت من كمية الإبداع والسحر الموجود بالفيلم , من بداية الفيلم تبدأ الموسيقى الاسكتلندية الحالمة للرائع باتريك دويل , ياللي قدم لنا سكور رائع جداً ويعلق فالبال على طول , واللي زاد من قوة السكور أكثر هو أنه باتريك أصلاً سكوتلندي وهذا عطى الموسيقى بالفيلم نكهة سكوتلندية وحسسنا أنه قاعدين في قالب الحدث سكوتلندا , وكذلك أنه استخدم آلات موسيقية سكوتلندية وهذا كان أكبر إضافة قوية للسكور , ومن الأشياء اللي صراحة زادت إعجابي بالفيلم وخلاه بنظري فخم بمعنى الكلمة هو الخلفيات اللي رسموها بالفيلم والغرافيكس الفظييع اللي مسوينه , يا الله بس على شكل الأشجار كيف طالعة بالغابة والصخور كيف شكلها , كل شي كان مصمم تصميم دقيق وباين أنه العاملين على الغرافيكس اهتموا فالخلفيات بشكل رهيب ومرعب بمعنى الكلمة , هذا غير شكل المناظر الطبيعية لما تتحرك الكاميرا بكل خفة عليها وتظهرها لنا من جوانب رائعة تسحر الواحد وتدخله عالم سحري ماله مثيل . الفيلم يظهر لنا شخصية الأميرة ميريدا , أميرة ترفض اتباع التقاليد , أميرة تبغي تصير حرة وتعيش من دون هموم ومشاكل الزواج , أميرة ودها تستانس وتروح كل مكان مع حصانها بكل طلاقة وحرية , صراحة وايد أعجبت بشخصية ميريدا الكبيرة والصغيرة , بس طبعاً كل وحدة تختلف عن الثانية , ميريدا الصغيرة كانت كيوت ومثل كل بنت صغيرة تخاف من أي شي غريب وعلى طول تروح تحتمي فحضن أمها , لكن ميريدا الكبيرة صارت ماتهاب ولاتخاف من شي , لكن ماودها تعيش حياة الأميرات والتقاليد اللي يتبعونها , لكن ودها تغير قدرها , ودها تسوي أي شي عشان تهرب من واقع زواج الأميرة عاجلاً أم آجلاً , ومن هالمنطلق تبدأ رحلتنا مع أميرتنا ميريدا , في محاولة لتغيير قدرها وتخلصها من العادات القبلية للقبائل الملكية , وكذلك من أكثر الشخصيات اللي كان لها حضور قوي هو الملكة إلينور , ياجمالها هالملكة كلها فخامة ورقي وكلاس طبعاً , حضورها كان مميز بشكل كبير في القصة , خاصة أنه القصة تركيزها بشكل أكبر كان على علاقة ميريدا بإلينور يعني علاقة الأم فبنتها , راح تنبهرون بالمشاهد اللي تجمع هالشخصيتين مع بعض , جد جد وايد أتأثرت فيهم , خاصة لما تعلم ميريدا الأصول والسنع لول , وكيف كانت تجبرها تلبس الملابس الضيقة اللي يلبسونها الأميرات في الحفلات والمناسبات , وأنا متاكد أن الكل راح يحب الكيمياء اللي بين هالشخصيتين بالذات , وطبعاً بالوقت اللي الملكة قاعدة تحاول تصلح فيه أخطاء ميريدا , نشوف الملك أبو ميريدا هو ساس خراب البنت لوول , الملك شخصيته حبوبة وعفوية ويدخل القلب , أحلى مشهد له لما كان يعلق مع ميريدا على الناس اللي تقدموا لها وطلبوا يدها لول , الملك طبيعته يحب أنه ميريدا تاخذ حريتها وتسوي اللي فبالها , عكس أمها اللي كانت مصرة أنه ميريدا تتبع كل شي بالأًصل والفصل , سواء في اللباس أو آداب الطعام , أو آداب الحديث مع الناس في الجماعة , إلينور كانت بيرفيكت وكان ودها ميريدا تعلم ميريدا أنها تصير مثلها وأحسن عنها بعد . الحين بتكلم عن إخوان ميريدا الثلاث بالفيلم , صراحة هالثلاثة كانوا مسوين جو مضحك ومبهج بنفس الوقت بالقصة , كل ما أشوفهم في مشهد لازم أضحك , لأنه صراحة حركاتهم كانت وايد طريفة وتدخل القلب بسرعة , وأهم شي يموتون على شي اسمه أكل لول , أحلى مشهد لهم بيكون مع خادمة من خادمات القصر , بغيت أموت من الضحك في هالمشهد لكن مابقول عنه شي أكثر عشان ما أحرق عليكم , بعد من الشخصيات اللي ظهورها كان قليل جداً لكنها عامل أساسي بأحداث القصة وحبكتها هو الساحرة , ياربي ماتدرون شكثر حبيتها حبيتها حبيتها حبيتها من كل قلبي هالساحرة والله بس من أول ماطلعت استانست وايد وانبهرت بالطريقة اللي ميريدا قدرت توصل فيها للساحرة , يعني جد جد المشهد كان رائع وأجوائه ساحرة بمعنى الكلمة . بس الشيء اللي جد خذ عقلي وجنني هو الأغاني اللي بالفيلم , الفيلم فيه يمكن 4 أغاني على ما أظن , أغنية touch the sky هالأغنية آخ بس شو كانت حالمة وجميلة وتاخذ العقل والله انبهرت فيها ومن المشاهد اللي فيها , هالأغنية بس من تسمعونها راح تحسون بإرادة ميريدا القوية للحرية وراح تفهمون قصتها بس من هالأغنية الرائعة , وبعد أغنية into the open air , هالأغنية لاتقل روعة وجمال عن الأغنية اللي ذكرتها قبل , أغنية مبهرة ورائعة تكلمنا ميريدا وكيف أنه خاطرها تشعر بالحرية بهالعالم الواسع وتتجول فيه وتستكشفه على راحتها , وأهم شي أغنية Learn me right هالأغنية بالذات مابتكلم عنها لأنه بمثابة حرق للأحداث لكنها صرااحة إبداع إبداع وانبهرت وأعجبت فيها بشكل مرعب , الفيلم بكل بساطة كان بمثابة وجبة دسمة , خلتني أشبع , وبيكسار هالمرة رجعت بقوة من بعد الفشل اللي صار مع كارز 2 السنة اللي طافت , راح تنبهرون بأجواء الفيلم وحبكته السوداوية خاصة نهايته الملحمية اللي بجد تحبس الأنفاس وبتخليكم توصلون لأقصى درجات الحماس والمتعة وراح يرتفع عندكم مستوى الأدرينالين , وبعد بتحبون شخصياته وبتعشقونها لدرجة الجنون بالذات ميريدا وأمها , راح تستمتعون بالأغاني المذهلة والحالمة بالفيلم , راح تشوفون تويست قوي ورائع بالقصة وحبكتها , راح تشوفون الفيلم مرة وثانية وثالثة وماراح تشبعون منه أو حتى تملون , لأنكم بتعيشون جو المغامرة والإثارة والأكشن والحرية والفانتازيا والسحر والخيال والجمال والفخامة والرقي والإبهار والإبداع المتجسد على هيئة فيلم , بكل بساطة أقولها راح تنتقلون لعالم خيالي وساحر وبتسافرون لأرض عجيبة وساحرة مليئة بالجمال والحرية , راح تعيشون جو الشجاعة (بريف) !!!! لكن قبل هذا كله وقبل ماتسافرون لهالعالم , راح توقفون عند محطة بالفضاء الخارجي , بتقدرون تشوفون النجوم والقمر والسماء من منظور ساحر ومذهل , لدرجة أنه ممكن تلمسونها , بالمختصر أقولها راح تنتقلون لعالم لا لونا الساحر واللي راح يبهركم بمعنى الكلمة جمال الرسومات بالفيلم وجوه اللي يرد الروح , قصة الفيلم بسيطة والفيلم خالي من الحوارات لكنه إبداع وإبهار وماراح تحسون فيه إلا ويخلص بسرعة , لكن مع ذلك بتعيشون تجربة فريدة من نوعها , من أول ثانية تبدأ , اعتبروا نفسكم خارج هالعالم وأنكم سافرتوا خلاص لمكان ثاني مكان صعب الوصول إليه بالواقع لكن مع لا لونا كل شي جايز , رغم عدم وجود الحوارات لكن الموسيقى لعبت دور أساسي بالفيلم وكانت روعة بمعنى الكلمة , وأكيد من ممكن يقدم لنا موسيقى ساحرة بهالشكل غير المبدع مايكل جاكينو , بكل بساطة أقولها حبي وعشقي لفيلم بريف يوازي حبي وعشقي لفيلم لا لونا !!
[ أغسطس 16, 2012, 09:26 PM: تم تحرير المشاركه من قبل: [ L.O.V.E.R ] ]
تسلم تسلم هاليد اللي كتبت احلى مراجعه قريتها بحياتي .. ولا حتى اكبر فان لبيكسار كتب عن الفيلم بهالحب والاعجاب والحماس .. حمدان انت بداخلك ناقد محترف وناضج ماشاءالله بالرغم من صغر سنك!
مراجعه طويله وكل سطر فيها اهم من الثاني ومع ذلك مافيها ولا حرق واحد للاحداث .. هذا اللي اسميه مراجعة احترافيه
كلامك عن الفيلم نفس احساسي بالضبط لما قريت قصة بريف وحرقت ابو الاحداث على نفسي .. حسيت نفسي اقرا عن فيلم له علاقه بكلاسيكيات ديزني اكثر من كونه ينتمني لاجواء بيكسار .. انبهرت وانغرمت بشخصية ميريدا والملكة ..
ناقص الحين اشوف ابداع الرسامين في بيكسار وكيف اشتغلوا عالرسم والمؤثرات واشوف هالمزيج المبدع من اداء الممثلين مع الموسيقى والاغاني المميزه بقالب واحد! جداً متحمس ومراجعتك حمستني اكثر
--------------------
المشاركات: 27170 | من: ~ NeverlanD ~ | تاريخ التسجيل: يوليو 2002
|
مرسله في
الله يسلمك ناصر , ويعطيك العافية على كلامك الحلو , أنا حاولت بقدر الإمكان أني ما أحرق شي على اللي ماشافوا الفيلم للحين , وفي نقطة مهمة جداً مادري كيف نسيت أذكرها , اللهجة الاسكتلندية طالعة رهيبة بالفيلم ومناسبة جداً للشخصيات , حسيتها قريبة من القلب واايد , فيها نوع من السحر اللي يجذب المشاهدين , نفس تأثير اللهجة المصرية في أفلام ديزني !!!
اليوم رحت العرض الصباحي لفيلم بريف .. اخترت العرض العادي على الثري دي عشان اشوف الوان الفيلم على طبيعتها لان اهم عنصر بأفلام الرسوم المتحركه بوجهة نظري هي الالوان .. وللاسف نظارات الثري دي العاديه تحجب سحر هالالوان وتخلي الشاشه مظلمه .. بالاضافة الى انه الثري دي عمره ماشكل اضافه قويه لافلام بيكسار .. وهالكلام اقوله بعد ماجربت اعطي بيكسار ثلاث فرص من خلال اب وتوي ستوري 3 وكارز 2 .. فعشان كذا قلت خلني ادخله بشكل عادي ..
وبعد ما انتهيت من مشاهدة بريف فكرت وين انسب مكان احطه فيه بالنسبه لافلامي المفضله لبيكسار؟ وقررت احطه بالمرتبة الرابعه بعد توي ستوري 2 والبحث عن نيمو وراتاتوي ..
الفيلم كلمة رائع شوي عليه وماتوفيه حقه .. اكثر شي عجبني بالفيلم وابهرني بكل معنى الكلمة هو القفزه القويه لبيكسار بمجال المؤثرات البصرية .. الصورة بهالفيلم تغرد بكوكب ثاني بعيد عن افلام بيكسار اللي سبق وشفناها .. الخلفيات تحبس الانفاس من روعتها .. منظر الغابات والجبال والسهول والغروب والشروق وحتى المشاهد المعتمه كلها تنفذت بشكل خرافي بالفيلم .. بريف من ناحية الصورة مايتقارن مع اي فيلم لبيكسار .. قبل كنت اعتبر راتاتوي هو افضل افلامهم من ناحية الصورة .. الحين بالراحه اقول ان بريف عطى رتاتوي على راسه من هالناحيه ..
الفانتازيا اللي ببريف ماتشبه اي فانتازيا سبق وشفتها لا بديزني ولا غير ديزني .. الفانتازيا هنا كانت واقعيه ومختلفه تماماً .. صحيح الفيلم خيالي وفنتازي وفيه تعاويذ سحرية .. بس الاحداث كلها مغلفة بشكل واقعي .. مثلاً الساحره بالفيلم شكلها مثل اي عجوز طبيعيه بالنسبه لشخصية كارتونية .. من غير اي مبالغات او تهويل .. والعالم اللي عايشه فيه ميريدا عالم حقيقي مش ممكن تشوف فيه حيوانات ناطقة مثلاً .. وحتى الحيوانات مانشوفها بالفيلم تتصرف بشكل كارتوني مثل ماكسيموس وباسكال بتانجلد ..
ومثل افلام بيكسار في لحظات بالفيلم مستحيل احد يقدمها بهالمستوى غير بيكسار نفسها .. علاقة ميريدا بأمها هذي هي نفسها علاقة مرهف بنيمو .. نفس سحر بيكسار المعتاد لمسته هنا وهناك .. وعلاقة عائلة ميريدا بابوها وامها واخوانها الثلاثه هي نفسها علاقة عائلة الخارقون ببعض .. هالابداع بعلاقة الشخصيات ببعض ماركة مسجله لبيكسار .. عندهم لمسه خاصه فيهم بهالجانب .. خصوصاً لما توصل هاللحظات الإنسانية المؤثره اللي تلامس المشاعر لذروتها .. انا على نهاية الفيلم ماقدرت اتمالك نفسي وامتلت عيوني بالدموع ..
وبخصوص موردو .. من اكثر الامور اللي اثارت اعجابي بالفيلم طريقة رسمه بهالجبــــروت والوحشيه .. كل مايطلع عالشاشه احس برعب حقيقي منه .. نادر ما اشوف فيلم انميشن واخاف من شكل شخصيات انا عارف انها مرسومه باليد بالنهايه .. بالعاده اللي يخوفني هي الفكرة نفسها .. مثل فكرة تعاون فاسيليير مع الجن بالاميرة والضفدع .. وفكرة تحول الاطفال لحمير في بينوكيو .. وفكرة انجذاب الاميرة شفق للمغزل في الاميرة النائمة .. لكن اني اشوف شخصية مرسومه وارتعب منها كشكل واحس منها بهالخوف الفظيع؟ عمرها ماصارت معاي الا مع شخصيتين اثنين بس .. العجوز الساحرة بفيلم سنووايت .. وابليس من فيلم فانتازيا .. والحين انضم لهم الدب موردو .. تصميمه وتحريكه كان جبااار بكل معنى الكلمة .. احس ان داخل جسمه كمية من العضلات اللي لو دخل فيه مليون سيف حاد وعملاق ماراح يأثر فيه ..
حتى تصميم حصان ميريدا كان مبهر ..
ومانسى المخلوقات الزرقه الصغيرة والتأثير الصوتي الرهيب اللي تم اختياره لهم .. فكرة ان هالمخلوقات عباره عن شي معين ماراح يتضح للمشاهد إلا بأخر الفيلم مع اختيار صوت طفولي لهم عطاني احساس فظيع ومهيب اتجاههم .. كل مايطلعون القى نفسي متسمر زياده عالشاشه ونفسي يتقطع!
اما ميريدا والينور فهم اكيد كانوا نجمتين الفيلم .. تصميم الينور جداً رائع وعندها هيبه وطله ملوكيه غريبه .. الينور صارت عندي من بعد الفيلم من الشخصيات الانسانيه المفضله لبيكسار .. وميريدا حبيت جموحها وقوتها ولامبالاتها .. تركيبتها ولاديه لكن بنفس الوقت مش مسترجله .. لما حاول احد المدعويين يقدم ابنه لطلب يدها وبالغلط ظنت ميريدا ان اللي بيتقدم لها هو صاحب الجسم المفتول اهتمت لامره ورفعت راسها عشان تشوفه .. وبهاللحظه تبين لي انها بنت مثل اي بنت ثانيه ممكن تنبهر بشكل شاب بمواصفات معينه .. بس تظل الينور شخصيتي النسائيه المفضله بالفيلم ..
والفيلم فيه اغنيتين طوال .. واغنيتين قصار .. اول اغنية بالفيلم كانت رائعه وحماسيه وهي المفضله عندي .. والثانيه حلوه بعد .. وحبيت انهم ماخلوا ميريدا تغني بشفايفها واكتفوا بصوت غنائي خارجي يتردد بالفضا .. كأنه اللي يغني ويعبر هي الروح المنطلقه الموجوده بداخل ميريدا .. واغنية الملكة روعه وتعور القلب خصوصاً باللحظه اللي طلعت فيها بأحداث الفيلم ..
والفيلم مليان مشاهد رائعه وتعلق بالذاكره .. لكن في مشهد اعتبره احد افضل المشاهد اللي شفتها بأفلام بيكسار كلها .. هو المشهد اللي كانت تبوح فيه الملكة الينور بمشاعرها لميريدا وتحاول تتخيل ان ميريدا امامها وتسمعها .. وبالمقابل ميريدا تحاول تتخيل امها بأنها امامها وتسمعها .. وبأخر الفضفضه ينطقون نفس الكلمة (افهميني) .. اعتقد هالكلمة وهالمشهد بالذات هو خلاصة فيلم بريف كله والدرس اللي لازم نطلع منه .. وهو محاولة الاصغاء للطرف للأخر .. المشهد تم تنفيذه بشكل جداً جميل .. وهذا كله يرجع لقوة فريق التحرير بالفيلم ..
وفي مشاهد ثانيه جداً حبيتها مثل مشهد الملكة الينور وهي تدريب ميريدا على العزف وتعلمها كيف تتصرف كأميرة .. وكثير كثير كثير حبيت مشهد حبس ميريدا بالبرج .. حسيت نفسي اشوف سندريلا او رابونزل .. وهالشي اشوفه ذكاء من بيكسار انها تلجأ لإستخدام بعض المشاهد المتعارف عليها بالقصص الخيالية بما ان هذا اول فيلم فيري تيل لهم ..
واذا بتكلم عن المشاهد المضحكه فأكيد الأولاد الثلاثه الصغار راح يتصدرون قائمة المشاهد المفضله عندي بالفيلم .. مع انهم مايتكلمون لكن فيهم لعانة الدنيا كلها .. ومن المشاهد الذكيه اللي ضحكتني وحبيت فكرتها واعتبرها من التوب بالفيلم هو مشهد الانسر ماشين الخاصه بالساحره خخخ
طبعاً الفيلم مايخلوا من بعض السلبيات ونقاط الضعف اللي حسيت ان كان ممكن تجاوزها لو اشتغلوا عليها اكثر .. واسمحولي اظلل الجزء المقبل بالابيض لان اللي راح اذكره فيه حرق للاحداث ..
مثلاً حسيت ان كان ممكن يلقون حل مقنع اكثر من حياكة النسيج اللي قطعته ميريدا .. يعني لما مرودو كان انسان .. فرضاً ندم وقرر انه يصلح اللي دمره .. فالحل لازم يكون نفس حل ميريدا بأنه يجمع الصخرتين المنفصلتين عن بعض .. لكن كيف يقدر يسويها؟ يحط سوبر جلو مثلاً؟ .. وبعدين مشهد ميريدا لما دخلت عالمجاميع بالقصر وحاولت تلهيهم عشان تتسلل امها من غير لا احد يشوفها .. معقوله فوق الالفين بني ادم بالمكان مالاحظ ولا واحد فيهم دبــه كبيره وهي تمشي وراهم؟ يعني اسمحولي اللي تمشي دبه كبيره مش قطه صغيره! .. ادري بأنه فيلم كارتون وانه للاطفال والخ الخ .. لكن بيكسار غير .. عودونا بأن افلامهم مش مجرد افلام كارتونيه وخلاص وانها تحترم عقلية اللي يتابعها سواء بأي عمر كان صغير ولا كبير .. وهذا اللي استغربته ..
عالعموم الفيلم من بدايته لنهايته رائع .. ووجود بعض النقاط السلبيه البسيطه ابداً مايعني شي .. لان الفيلم كله على بعضه تحفه فنيه .. الفيلم مفصل تفصيل على مزاج عشاق افلام ديزني .. فيه سحر وخيال وواقعيه وعلاقات مؤثره ومشاهد مضحكه واغاني ممتعه .. هذا هو فيلم الانميشن اللي كنت انتظر اني اشوفه من بعد تانجلد!
وبالنسبه للفيلم القصير لا لونا .. بإختصار شديد .. هالفيلم صار بالمركز الاول عندي وبلا اي منازع بالنسبه لافلام بيكسار القصيره
اول ماطلع القمر بهالمشهد مع الموسيقى التصويرية الرائعة لمايكل جوكينو شهقـــت .. السينما كلها نورت .. شهالجمال والسحر؟ يعني جد جد حرام هالفيلم ينعرض على هامش اي فيلم طويل .. لازم ينعرض بروحه ويتعناله المشاهد مخصوص عشان يشوفه .. اجوائه حالمه وآسره .. طريقة معالجة الاجيال الثلاثه المختلفه المتمثله بشخصية الاب والجد والحفيد .. وفكرة ان كل واحد عنده طريقة تفكير خاصه فيه ومش شرط يكون اللي يناسب جيل الاباء يناسب جيل الابناء .. يعني فيلم رائع وفكرته عميقه حتى لو مافي ولا اي حوار مفهوم بينهم .. لكن رسالته توصلك وتصيب الهدف مباشره .. وهذا اللي يخلي الفيلم عظيم بنظري ..
اللي يحب يعيش تجربة فريده من نوعها لازم يحضر بريف بالسينما ويستمتع بهالابداعات .. بيكسار بعد ماخلوني اطلع وانا حزين السنه اللي فاتت من النتيجة النهائية لكارز 2 .. هالسنه خلوني اطلع وانا راضي عنهم كل الرضى ..
[ أغسطس 19, 2012, 01:02 AM: تم تحرير المشاركه من قبل: [ L.O.V.E.R ] ]
--------------------
المشاركات: 27170 | من: ~ NeverlanD ~ | تاريخ التسجيل: يوليو 2002
|
مرسله في
ووواااااووو ناصر برافو عليك والله تدري أنه ردك حمسني أرجع أشوف الفيلم والحين بعد مرة ثانية بالسينما , لا جد صراحة ذكرت كل التفاصيل اللي أنا ماقدرت أذكرها وأسلوبك يشد الواحد أكثر ويرغمه أنه يشوف الفيلم حتى لو هو مب من فانز بيكسار , وبخصوص نقاط الضعف اللي ذكرتها اتفق معاك صراحة , بس أهم شي أنه بيكسار بالنهاية قدمت عمل يرضينا ويفرحنا , عكس اللي صار السنة اللي فاتت
ميرسي حمدان ربنا مايحرمناش منك .. انا مقرر احضره مره ثانيه بعد العيد ان شاء الله .. فيلم ملحمي وكبير مثل هذا حرام ينشاف مره وحده بالسينما
بخصوص الحضور ..
تصدق عاد ان السينما كانت مليانه عالاخر! .. انا رايح الصبح وبرمضان عشان اشرد من زحمة الناس .. بس ماشاءالله القاعه كانت مفوله .. وكلهم كلهم اجانب .. والشي الغريب ان اغلبهم كبار .. من عمري وطالع!
--------------------
المشاركات: 27170 | من: ~ NeverlanD ~ | تاريخ التسجيل: يوليو 2002
|
إرسال هذه الصفحه لصديق!
لطباعه هذا الموضوع
![[heartpump]](graemlins/heartpump.gif)
![[kiss]](graemlins/kiss.gif)
![[Eek!]](eek.gif)
وتفاجأت اكثر لما عرفت انك رحت السينما وشفت فيلم لديزني لول![[super]](graemlins/super.gif)
![[Big Grin]](biggrin.gif)
![[worried]](graemlins/worried.gif)
![[applause]](graemlins/applause.gif)
![[eyelove]](graemlins/eyelove.gif)
![[Razz]](tongue.gif)
