و في شغلة نسيت أني اذكرها والي هي وقفة شكر لـ "فيصل" عراب كلاسيكيات ديزني الاخيرة في منتدى السالمية أحب أشكرك على الموضوع الرائع .. و أشكر عراب شلة ديزني الأول "ناصر" و أشكر كل مشاركة ساهمت في تغطية الفيلم من الصفر لحد اليوم يعطيكم العافية و عسانا دوم عالقوة يميع
يا حبيبي يا سعيد والله هذا كله ما يجي شي من اللي قدمتوه و بتقدمونه أنا كل ما في الأمر اني أتولع بالأفلام اللي أفتح لها تغطية و نوعاً ما أتنبأ لها انها تكون على ذوقنا و العلم عند الله و بنفس الوقت، تكون هالتغطيات بمثابة متنفس إيجابي ندخل له و نتنفس الصعداء من بعد سلسلة من أخبار سيئة كانت بالنسبة لكم أنا فعلاً مبسوط بآرائكم كلكم عن الفلم كل واحد فيكم حمسني بطريقة مختلفة!
ان شاء الله بقدر أروح البحرين و أشوفه خلال هالأسبوع ولو انه ضغط بالنسبة لي بشكل غير طبيعي لكن ما عاد فيني صبر عقب الحكي اللي حكيتوه
ناصر رايك يبي له مخمخة ما شاء الله طويل!
--------------------
.
.
المشاركات: 5990 | من: Saudi Arabia | تاريخ التسجيل: أغسطس 2007
|
قبل شوي رجعت من السينما،، فلم محترم و راقي ويستاهل يكون من ضمن آفلام ديزني.. قبل ما تقرون آتمنى من اللي ما شاف الفلم انه ما يقرا ردي لانه بيكون فيه سبويلرات و حرق لاحداث الفلم..
اولا حبيت اقول انه تجربتي مع الفلم اختربت شوي بسبب الناس اللي كانوا معاي.. كانوا يضحكون على أغلبية مشاهد الفلم بما فيها المشاهد الدرامية يعني لما هانس كشف هويته لآنا القاعه كلها ضحكت .. فيه مشهد درامي لالسا بعد ضحكوا فيه.. المشهد اللي ولع فيه آولاف النار علشان يدفي آنا بعد بالنسبة الهم كان كوميدي من البداية للنهاية.. احسهم حاطين في بالهم انه اي فلم انيميشن لازم يكون كوميدي ومستغربين من الدراما اللي في الفلم.. ووحدة طلعت من الفلم قاعدة تسب فيه لانه هانس طلع شرير و تقول قاعدين يحاولون يكونون كول بس مب ضابطه .. قلت في خاطري مالت عليج انتي مدغشقر وايد عليج
بتكلم عن الشخصيات ورآيي فيها عالسريع
آنا .. حبيتها من آول مشهد الها.. حبيت هبالتها و عبطها و طيبتها... ماشية عالبركة مثل ما يقولون وعايشة حياتها ببساطه.. كريستن بيل آدت الدور باتقان و تحسونها كأنها واقفه على المسرح و تمثل..
السا... هي و آنا مع انهم مختلفين بس حبيتهم بنفس الدرجة.. مثل ما قال ناصر مشهدها و هي بغرفتها حابسة نفسها كل هالسنين يقطع القلب حتى آخر شي لما آنا تجمدت وكانت تبكي عليها كسرت خاطري اللي ما خلاني آكرهها انه كل المشاكل اللي سوتها مب بقصدها.. أبوها و أمها تعاملوا مع قواها بطريقة غلط وهالشي سببلها كل هالمشاكل في حياتها.. وبعدين لايق عليها دور الملكة.. راكزه وحكيمه مب مثل آنا
آولاف.. حبيت انه يلمع طول الوقت.. هالشي ما كان مبين بالدعايه.. دمه خفيف و دوره بالفلم كان مهم جدا.. احيانا الشخصيات الثانويه تقهر شوي مثل موشو و سيباستيان بس اولاف العكس تماما.. آغنيته حبيتها و عرفتنا على شخصيته آكثر..
هانس.. حتى لو ما قريت السبويلرز كنت بشك فيه .. احسها واضحه انه بيطلع الشرير بس النذاله اللي فيه ما حصلتش.. مشهده مع آنا مقرف.. كنت آتمنى نهايته تكون اسوآ،، شي قريب لنهاية جوثل..
كريستوف و سفن .. ما عندي تعليق عليهم عدا اني حبيتهم
كثير عندي آشياء آقولها عن الفلم بس ما بطول عليكم.. آتمنى بس انكم ما تقارنونه بتانجلد.. تانجلد فلم ثاني كليا ماله علاقة بفروزن وبرأيي الاثنين بنفس الروعة... أنا شخصيا حبيتهم بنفس الدرجة و يزعلني لما أحس انه الكل كاره تانجلد
ياريت جون لاسيتير يعطي المخرجين وكتاب الأغاني مشروع يديد عالسريع لأنهم أبدعوا في فروزن
التقييم 10 من 10 يسسس
[ ديسمبر 22, 2013, 05:06 PM: تم تحرير المشاركه من قبل: howtodeal ]
-------------------- [ المشاركات: 7335 | من: الامارات | تاريخ التسجيل: يوليو 2003
|
يوم الجمعه كان يومي المنشود دخلت الفيلم (إلي ماكنت متحمس له وايد ولا كنت أدخل موضوعه حتى لوول)
بس شـ أقول وشـ أخلي الفيلم فاااااااق كل توقعاتي من شفت دعايته وأنا كاره شكل آلسا وآنا لأنهم يشبهون رابونزل (قصدي لا جديد على مستوى الرسم مش كرهاً بـ رابونزل بالعكس أموت فيها) لكن بعد ماشفت الفيلم قلت لا لا لا أبداً مافيه شبه خصوصاً آلسا شكلها ناضج أكثر وكشخه ملكيه
المهم نرجع للفيلم , البدايه روعه كانت مع الإغنيه لما العمال يقصون الثلج من البحيره بشكل قوالب ويحملونه , على طول تذكرت بداية فيلم بوكاهونتس لما جون سميث ورفاقه يركبون السفينه
الرسم بالفيلم إبهاااار مشاهد الثلج تاخذ العقل وتحس إنك موجود بموقع التصوير مع الـ 3دي , على فكره الـ 3 دي جداً حلو بالفيلم ومشاهد الثلج فضيعه بالنظارات
كنت ظالم آلسا وأقول عنها شريره لكن طلعت مظلومه وخايفه على أهلها أكثر من خوفهم هم عليها لدرجة إنها عزلت نفسها في قصر لحالها عشان تحمي أقرب الناس من نفسها
حبيت مشاهدهم وهم صغيرات يلعبون كيف آنا متعلقه بإختها الكبيره وتطفشها في نومها عشان تلعب معها وعورت قلبي آنا لما فقدت ذاكرتها وراحت كل يوم تطق الباب على إختها ولحد ماكبرت وهي كل يوم تروح تسولف لها وتغني من ورا الباب وقلب آلسا متقطع عليها لكن ماتقدر تفتح لها الباب وتدخلها
مشهد تتويج آلسا كـ ملكه كان أوسكاري درامي لما ماوافقت على زواج هانس من آنا , وآنا سحبت القفاز من يد إختها وآلسا خرج الموضوع من سيطرتها وإنفضحت قدام الكل المشهد هذا كان تحفه ومش مشهد لـ فيلم كرتوني وهالنقطه تحسب لصالح ديزني برافو
بخصوص هانس , أخوي كان حاس فيه شي أبو زلوف هذا وكان يقول لي وراه بلاء هالهانس أكيد لما آنا ترجع للمدينه هو راح يكون مستولي على كل شي , وهو صادق حدسه كان في محله وفعلاً أنا بعد ماإستغربت ولا إنصدمت لكن في أمريكيات جنبي جالسين إنصدموا وشهقوا شهقه مسموعه وحبيت إندماجهم بالفيلم وتفاعلهم الروعه لول
(((على فكره ناصر مشهد هانس إلي كان توه بيبوس آنا مش محذوف عندنا)))
أولاف يجــــــنن وايد وايد حبيت شخصيته ويا رب الصوت العربي إلي بيختارونه يكون بحرفية الأجنبي ونفس النبره الحلوه , إنصدمت لما عرفت إن أولاف من صنع آلسا وإبتكارها شكلاً ومضموناً وحتى هي إنصدمت من وجوده لول , حركاته تجنن وله ذبات فضيعه تفطس ضحك مع كريستوف وسفين, عور قلبي لما قال خاطره يعيش الصيف ويشوف الشمس لول وتحققت أمينته ومعاه غيمه فوق راسه طول الوقت
كريستوف وسفين حبيت علاقتهم ببعض من يوم كانوا صغار وهم أصدقاء وشخصية كريستوف قدعه وحلوه لكن ماشوف فيه مقومات أبطال ديزني مادري كيف يعني لول أحسه طرطنغي شوي , يمكن عشان شكله العادي ومافيه وسامة أولاد ديزني مثل علاء الدين وطرزان وجون سميث وكابتن فيبس والأمير غريب والأمير عريق
في شغله ماحبيتها بالفيلم وأعتبرها شي أساسي وركيز في أفلام ديزني إلي هي شخصيه شريره قويه ومخيفه , ألحين من كل عقلهم ديزني حاطين هانس هو الشرير بالفيلم ولا شاف الشر أصلاً هالهانس حرام فيلم بـ حجم فروزن يكون مافيه شرير كفو لول
بس كله كوم وأغاني الفيلم كوم ثاااااااني أفضل أغاني لـ فيلم ديزني من سنة 96 بعد الأحدب , من بعد الأحدب ماسمعت أغاني هالقد إبداع من أفلام ديزني وأتمنى ولو إني أشك إن النسخه العربيه الفصحى تكون منصفه مع الأغاني وتعطيها حقها بنفس مستوى الأصليه
لي شوفه ثانيه للفيلم أكيـــــد بـ صراحه ماشبعت ودي أدخل مرتين وثلاث بعد
خصوصاً إن قبل الفيلم لا يبدأ يحطون تريلر أنجليا لـ فيلم ملعونه أنا قمت أناقز بالقاعه من الوناسه إنصدمت إنه نزل لأني كنت أنتظره كل إسبوع أثاري ديزني مقررين ينزلونه مع فروزن وبعد ماتخلص كل الدعايات (لأفلام مالها صله بـ ديزني) وقبل الفيلم القصير تبع ميكي يحطون دعاية ملعونه
بخصوص الفيلم القصير روووووووعه ماتوقعته مبتكر هالقد يجنن 3دي , فعلاً ديزني هالسنه راضتنا من بعد رالف المدمر
[ ديسمبر 23, 2013, 05:33 AM: تم تحرير المشاركه من قبل: A H M A D ]
--------------------
When the evening falls And the daylight is fading From within me calls ? Could it be I am sleeping For a moment I stray Then it holds me completely Close to home, I cannot say Close to home, feeling so far away
ايه صح كلامك بالضبط مثل نهاية جون راتكليف.. نسيت هالشي
رد مقتبس: تظن ان هانس عنده جوانب طيبه بشخصيته؟
مثل لما ساعد الاهالي وعطاهم اشياء يتدفون فيها ولما انقذ السا من السهم اللي كان راح يصيبها
ولا كان قصده بس انه يكسب قلوب الناس عشان يوصل لهدفه مثل ماسوى مع انا؟
أبدا.. أحسه مثل الحية ما ينوثق فيه.. خسارة فيه الأغنية الحلوة اللي كتبوها.. جان زين لو غناها كريستوف بداله..
بالنسبة لتانجلد.. رايك واحترمه أكيد بس مستغرب انك تقول انه التقدير اللي لقاه الفلم مبالغ فيه.. أحسه راي قاسي جدا خاصة لفلم لقى استحسان كبير من الجمهور و النقاد.. انا بالنسبة لي تانجلد و فروزن أحلى فلمين أنيميشن نزلوا في السنوات الأخيرة.. وهم السبب الرئيسي لرجوع أفلام ديزني الموسيقية اللي كبرنا ونحن نشوفها.. ان شالله جون لاسيتير ينتبه لهالشي ويكون قاعد يحضر شي كلاسيكي يبهرنا كلنا مثل هالفلمين..
-------------------- [ المشاركات: 7335 | من: الامارات | تاريخ التسجيل: يوليو 2003
|
اما فيلم ميكي القصير صدق ابهرني تقريباً هذا افضل فيلم كرتوني 3دي اشوفه بس احسهم مصخوه وطولوه شوي
نوصل للفيلم الرئيسي
مثل ماكان الاسد الملك ثورة من ناحية الرسم في وقته هالفيلم اقدر اقول عنه انه قفزة لديزني من ناحية رسم السي جي ومتقدم بمراحل على تانجلد ورالف هذي هي المقارنة الوحيدة الي اشوفها بين الفيلمين بس انهم يقولون انه افضل واحد صدر من بعد الاسد الملك لا لانهم ظلموا وايد افلام فالوسط مايوصل هالفيلم لمستواهم
بما اني ماعرف القصه وماحبيت اقراها قبل الفيلم فكنت متوقع انه شوي سوداوي وان اليسا شريرة بس طلع مالها ذنب فلي صار
حبيت رسم الفيلم جوه مرح جداً وممتع للنظر خصوصا الالوان مع انه معظمه ابيض شخصية اولف معني ماحبيتها بالمره في اول اعلان (( وهالاعلان عطاني انطباع سيئ عن الفيلم )) بس حبيت شخصيته ونبرة صوته حبيت مشاهدهم وهم اطفال حبيت حركات أنا وهي تحرك عيونها مع الساعة وتتكلم في فتحة المفتاح عشان الصوت يوصل اذكر اسويها وانا صغير
واكثر شي حبيته الظلال على الشخصيات عاطيتنهم عمق وواقعية اكثر من تانجلد
الاغاني كانت عادية ماتعلق فالبال وبعد ماطلعت ماقدرت اذكر ولا شي منهم غير يوم تقول let it go
الفيلم كان فيه نوع من التطويل وبطئ حسسني بملل شوي وحشوا ماله داعي مثل المشهد الي كريستوف يغني قبل ماتدخل عليه أنا والمشهد الي الاقزام يغنون فيه
الفيلم بيعيش اكثر من تانجلد بس اخرته بينسى مثله
الرساله الي انتبهتلها ان - الاهل لازم مايعاقبون عيالهم لانهم مختلفين بالعكس لازم يشجعونهم ويطلقونهم ويعطونهم فرصه في هالحياة - ان الحب الحقيقي يكون للاهل قبل اي حد ثاني لان محد يبقى لحد
فعلاً ديزني أخيراً فتحت أبوابها , وللحين مب مصدق أنها فعلاً كبرت فعيني بعد ماطاحت خلال السنين اللي طافت , ياناس ياعالم تدرون أن ديزني أخيراً قدرت تتغلب على نفسها بعد السنين الأخيرة من التخبطات , قدرت تخلق أعجوبة ممكن تنضاف لعجائب الدنيا , قدرت تعمل تحفة فنية تنافس تحفها الفنية السابقة !! وهذا الكلام والله ترى مب مبالغة مني نهائياً , أنا شفت رقعة فنية راقية من العيار الثقيل المملوء بالسحر والأغاني واللوحات الفنية المدهشة , أنا عن نفسي دخلت الفيلم وماشفت غير إعلانين الشيء الوحيد اللي سويته إني سمعت أغاني الفيلم قبل لا أجوفه ومن الأغاني بس عرفت إن في شيء غير متوقع بانتظاري , يعني والله الأغاني من سمعتها وأنا ميت ميت فيها كل يوم أغنيها وأسمعها سواء فالبيت أو طالع بالسيارة يعني حماس حماس من قلب والله خاصة أنها معمولة بطريقة جداً راقية والكلمات لها معنى رائع وبنفس الوقت تحس بنشاط وأنت تسمعها . أنا كنت أحاول أدخل الفيلم أول عرض بس ماقدرت لأني انشغلت وقتها , لكن أمس الصبح قررت أتوكل على الله وأروح الفيلم لأنه فيلم مثل هذا ماينفع أجوفه على طول لا لازم أكون متهيأ نفسياً لأن ديزني فعلاً ألقت قنبلة علينا فصالة السينما من بداية الموسيقى القوية اللي فبداية الفيلم وصوت الآهات والهايبر اللي كان موجود وفجأة تبدأ الأغنية وصراحة انصدمت أقولكم والله انصدمت المقدمة صدمتني بشكل معقولة اللي جفته معقولة ياعالم ديزني قدمت افتتاحية قوية للفيلم وهذا اللي كنت أباه من كل قلبي هاي ديزني اللي أعرفها , ديزني بأفلامها كانت دوم تفتتح الفيلم بأغنية توصف لك البيئة والحضارة للبلد اللي موجودة بالفيلم وبعدها نست هالشيء وقامت تتبع أساليب أخرى مثل السرد لكن أخيراً رجعت بفيلم فروزن وقدمت لنا مقدمة قوية مع أغنية (القلب المتجمد) اللي كانت بمثابة صاعقة للمشاهدين بالفيلم كلهم اصطلبوا وقتها يعني مب بس مقدمة موسيقية وخلاص لا كانت مقدمة قوية ولها جاذبية يعني حسيت كأن من ساعتها تم إلقاء لعنة سحرية علي خلتني أعشق الفيلم أولريدي ومن وقتها خلاص أنا عشقت الفيلم بهالخمس دقايق هذا بعد وأنا توني فبداية الفيلم فمابالكم بالفيلم كامل !!! . وايد حبيت أشكال آنا وإلسا وهم صغار كانوا حدهم كيوت بالذات آنا فديتها , خاصة بمشهد أغنية بناء رجل الثلج هالمشهد فعلاً حرك مشاعري وايد مع أني لما كنت أسمع الأغنية قبل لا أجوف الفيلم ماحسيت بنفس الشعور لكن لما جفت اللي صار وملامح آنا كيف كانت ياخي ذبت ذبت فيها وكسرت خاطري وايد كان ودي أحضنها هالمشهد أعتبره من أحلى المشاهد بين الإخوان والأخوات اللي جفتهم بأفلام ديزني . واللي حبيته بعد بالفيلم واللي يخليه بيرفكت من الناحية الفنية هو مستوى سرد الأحداث بالفيلم واللي كانت على صعيد عالي من الكمال والكامل الله , يعني في مشاهد كانت صامتة وفي مشاهد كانت حوارية لكن التوازن بينها كان شغل احترافي يعني جد تحسون عمل متعوب عليه والله للحين مبهور من اللي جفته , وبعد من الأغاني المفضلة عندي بالفيلم (لأول مرة منذ الأزل) هالمشهد كان مضحك بشكل فظيع استانست عليه وايد وخاصة حركات آنا العبيطة كيوت هالمخلوقة مال التقرص , الأغنية نفسها تفتح نفس الواحد يتحمس على أي شيء كان ينتظره من زمان وأخيراً وصل الوقت المناسب عشان نبدأ العمل عليه وسبحان الله إعادة الأغنية اللي تكون بآخر الفيلم قلبت كل الموازين والأحاسيس اللي كانت فالأغنية الأصلية, كانت تخوف وطريقة الحوار بين آنا وإلسا كان مثير لأقصى حد وكل وحدة تركض والثانية مادري شو تسوي آآآه بس , وبعد أغنية (الحب باب مفتوح) كان حلوة ودويتو حلو بين هانز وآنا حبيت الكيميكس اللي كان بينهم وكيف أن كل واحد منهم عبارة عن النصف الثاني للآخر وناسة لول لكن المشهد اللي كنت أترياه قبل لا أجوف الفيلم بكبره كان مشهد أغنية (ليت ات جو) والحمدلله المشهد ماخيب ظني بالعكس هالمشهد هو اللي اعتبره الماستر سين بالفيلم كامل والله ياناس الفيلم حطوه بصوب وهالمشهد بصوب ثاني خياااااال جماااال سحرررر ميوزيكككككككك فيري تييييييل مثييير جاذبية مب طبيعية والله مب عارف أوصف اللي جفته الأغنية بروحها فخمة وأنت تسمعها من دون شيء فمابالكم مع المشهد المخصص لها , يعني جد قلبي كان ينبض بسرعة وقتها من الإبهار وكمية الإبداع اللي جفته كل شويء يصير شيء مفاجىء وحركات إلسا وهي تتحرك والأشياء اللي سوتها إبهار إبهار بمعنى الكلمة . شخصيات الفيلم كانت متناسقة مع بعضها وحسيت بنوع من التوازن يعني حسيت أن كل واحد منهم وجوده كان ضروري مب مثل بعض الأفلام اللي تكون فيها شخصيات وجودها وعدمها واحد , بس اللي استغربت منه والله أولاف على قد ما الناس يقولون عنه روعة وحبوه وميتين عليه أنا كنت أبداً مادانيه خاصة من الإعلانات اللي طلعتها ديزني قبل عرض الفيلم عن أولاف كرهته كره يعني مب بس ماحبيته لكن والله مب مجاملة حبيته وايد ووجوده كان عاطي جو كوميدي عالآخر كل شيء يقوله أضحك عليه وإخلاصه لأصدقاءه وحبه لهم كان شيء يحرك المشاعر حقيقةً , والبطلين الذكور بعد هانز وكريستوف ههههه مابتكلم عنهم من دون حرق شوفوا الفيلم بروحكم أحسن , آنا ياحياتي هالخبلة حبيتها حبيتها فديت روحها شكلها حلو وانفعالتها أحلى وأسلوبها بالكلام يونس خاطري أيلس وأسولف وياها متأكد إني بموت من الضحك على أي شيء تقوله أو تسويه , والأقزام مع إن ظهورهم كان قصير بالفيلم بس أغنيتهم روعة وتحسون أن لهم عالم غير مختلف عن الباقين وحياتهم وايد بسيطة بس كيوت , أشكالهم تضحك خاصة كذا حركة سووها بعض الأقزام ذبحتني ضحك بس ركزوا عدل يوم بتشوفون أغنيتهم لأن المشهد زحمة أقزام وكل حد يسوي شيء غير عن الثاني لول وأتمنى صراحة أشوف فيلم قصير عنهم وعن تاريخهم , وبطلة الفيلم بكبره إلسا هالمرأة الحديدية مشاهدها كانت الأروع بالفيلم , تحسون بهيبة وفخامة لما تشوفونها تتمشى وتتمخطر بفستانها آآه يا إلسا ياليت في منج بهالكون , أسلوبها فالكلام نظراتها ياعالم نظراتها تذبح تذذذذبح مابالغ ترى . من الأشياء اللي كنت أسمعها قبل لا أجوف الفيلم أنه بيكون سوداوي فحطيت فبالي أن أغلبه بيكون مغامرات وكوميديا وبعض المشاهد السوداوية مني ومناك , لكن يوم جفت الفيلم أقولكم شهقت الفيلم بكبره سوداوي تعرفون شو يعني بكبره مابتحصلون غير كذا مشهد كوميدي موزعين بالتساوي بين المشاهد الموجودة بالفيلم , يعني السوداوية اللي شفتها بالفيلم كانت بمثابة الضربة القاضية بالنسبة لي لدرجة أنكم تحسون أنه فيلم للبالغين مب للأطفال للحين مب عارف كيف ديزني قدرت تسويها وبكل جرأة مع أن بالإعلانات نهائياً ماجفت هالشيء زيروووووو وخاصة أن الفيلم مليان مشاهد مؤثرة لدرجة إني دمعت مرتين بالفيلم لول , هذا غير الأحداث اللي بصراحة ماكانت متوقعنها نهائياُ وهذا اللي يميز فيلم فروزن عن باقي أفلام ديزني يعني سواء فالبداية فالنص فالمشهد الملحمي آخر الفيلم توقعاتي كلها انقلبت فوق تحت ماتوقعت أبداً يصير اللي صار والتويست الرهيب فآخر الأحداث وهاي صدمة بحد ذاتها بالنسبة لي كفان لديزني ونقطة لصالح المسار المتماسك والحبكة القوية اللي مشت عليها القصة برافووو يا ديزني. كذلك بعد من المميزات اللي تصف بصالح الفيلم هو أن ديزني لأول مرة بحياتها تخلينا بعد مانخلص الفيلم نروح وندور أجوبة للأسئلة اللي ماعطونا أجوبتها بنهاية الفيلم يعني جد حسيت بإحساسي لما أشوف لوست أو وانس ابان تايم وصراحة مانتبهت على هالشيء مباشرة لكن لما كلمت ناصر بعد ماطلعت من الفيلم وقعدت أسولف وياه نبهني على هالشغلة وكان معاه حق صراحة وقعدنا نحلل ونمخمخ عاللي صار. أيضاً كان تطور ملحوظ بالفيلم من ناحية الأنيميشن (السي جي) مقارنة مع الأفلام اللي طافت لديزني والخلفيات والمناظر الثلجية كانت إبهار بمعنى الكلمة ومليانة تفاصيل صعب الواحد ينتبه لها من أول مرة وفي ملاحظة بعد انتبهت عليها بالكريديتز آخر الفيلم أن في واحد بقسم الإضاءة اللي يشتغلون عالفيلم اسمه مهند حسن يعني واحد عربي ياحظه صارتله بصمة بتاريخ ديزني الحافل لول . أدري اللي بيقرأ ردي بيحس فيه نوع من المبالغة والتبجيل لرائعة ديزني اليديدة لكني كنت أقصد كل جملة قلتها وكل حرف كتبته لأن فعلاُ حسيت بهالشعور لما جفت الفيلم وبخاطري بعد وايد كلام أقوله بس مب عارف ياربي كيف أوصف مدى جمال القطعة الفنية اللي جفتها لأني منصدم ياناس ومتجمد بعالم الجليد والثلج اللي شفته بفيلم فروزن وصراحة بعد في شيء أبا أقوله بس مستحي لول تدرون أن لما انتهى المشهد الملحمي بآخر الفيلم شهقت وقعدت أصيح والله العظيم انصدمت من عمري يعني صحت صياح مب بس دموع لمدة تقريباً 15 ثانية وبعدها قلت حمدان اصطلب وخلك ريال بس والله العظيم ماقدرت أقاوم وأنا بحياتي ماسويتها بفيلم أبد يعني , ولعلمكم أنا ماصحت عشان النهاية بالقصة لا أنا صحت لأن ديزني اللي أعرفها رجعت وبقوة , حسيت بشعور كأن حد أحبه وماقدر أتخلى عنه مات والحين بقدرة قادر رجع للحياة بشكل غير لكن بالروح نفسها والمضمون نفسه وهذا هو المطلوب وبإذن الله راح أدخل الفيلم مرتين عالأقل قبل لايشلونه من السينما واليوم فالليل بتكون المرة الثانية لأني للحين صراحة ماشبعت من الفيلم وفرصة إني أجوفه مرة ثانية عالشاشة الكبيرة , وأقدر أقولها وبفخر أن فروزن من أفضل الأعمال السينمائية اللي جفتها هالسنة سواء على مستوى الأنيميشن أو اللايف آكشن , وأشكر ديزني فديتها اللي عطتنا أخيراً الشيء اللي حلمنا فيه من زمان صح بيكون أحلى لو كان تو دي لكن عالأقل هذا ولا بلاش , أنا جفت بهالفيلم كل شيء عشقته بديزني وهذا هو المطلوب ديزني عملتي فبنيتي فأبدعتي فحملتي فولدتي كلاسيكية جديدة ستظل خالدة في قلوبنا أشكرك من الأعماق من المحب لك : ديزناوي ماسي.
بس الله يسامحك كان حطيت فواصل بين الجمل والفقرات .. الكلام مرصوص على بعض .. عيني عورتني
رد مقتبس:أنا صحت لأن ديزني اللي أعرفها رجعت وبقوة , حسيت بشعور كأن حد أحبه وماقدر أتخلى عنه مات والحين بقدرة قادر رجع للحياة بشكل غير لكن بالروح نفسها والمضمون نفسه وهذا هو المطلوب
awww يحليلك حمدان
ديزني محظوظه فينا والله .. شهالجمهور اللي يحبها هالحب
رد مقتبس:من المميزات اللي تصف بصالح الفيلم هو أن ديزني لأول مرة بحياتها تخلينا بعد مانخلص الفيلم نروح وندور أجوبة للأسئلة اللي ماعطونا أجوبتها بنهاية الفيلم يعني جد حسيت بإحساسي لما أشوف لوست أو وانس ابان تايم وصراحة مانتبهت على هالشيء مباشرة لكن لما كلمت ناصر بعد ماطلعت من الفيلم وقعدت أسولف وياه نبهني على هالشغلة وكان معاه حق صراحة وقعدنا نحلل ونمخمخ عاللي صار
لول بالضبط
مثلاً اغنية البداية "فروزن هارت" ماتوقعت انها تحمل الاجابة على السؤال اللي كنا نردده بينا وبين نفسنا
شمعنى السا انولدت بهالقوة الخارقه؟
لما تسمع كلمات الاغنيه بتعرف الجواب ..
يمكن لها تفسير ثاني مادري بس من خلالها حسيت انهم عطونا الوصفه اللي خلت هالقوة تجي لإلسا بالذات
ممكن لانها انولدت بظروف مناخية صعبة تجمعت فيها عوامل اسطورية معينه ادت لأنها تكون كذا
Born of cold and winter air And mountain rain combining This icy force both foul and fair Has a frozen heart worth mining
وفي شي ثاني ما انتبهت له الا بثاني مشاهده
* حرق احداث *
في اول مشاهدة قلت لنفسي شلون الاصفاد الحديدية اللي قيدوا فيها كف إلسا ماتحملت قوتها وبرودتها وتكسرت؟
بينما القفازات كانت تمتص قوة الثلج وتمنعه من الخروج؟
بثاني مره بس انتبهت ان القفازات كانت سحرية وان الاقزام عطوها للملك عشان تكبح قوة إلسا
وعلى فكرة شعوري اختلف تماماً بعد مارجعت اشوف فروزن بالمشاهد اللي ظهر فيها هانس بأول الفيلم ..
خصوصاً اغنيته مع آنا ماقدرت احس ان هانس كيوت فيها مثل ماشفتها قبل لا يكشف عن وجهه الحقيقي
ووايد كلمات قالها لآنا كنا نظن انه واو كيوت لما قالها
لكن الحين انقلبت كلماته 180 درجة لما رجعت اسمعها واستوعبها .. بديت افهم قصده
اللي يقول هانس مش بقوة باقي اشرار ديزني
هانس واحد من اسوء عشر اشرار ..
خسته وحقارته كانت بالتلاعب على مشاعر بنت بريئة .. خلى المشاهدين كلهم يقعون بحبه وبعدها فاجأهم بنذالته
شخصية حقيرة وبنفس الوقت وجوده ممتع عالشاشة
--------------------
المشاركات: 27170 | من: ~ NeverlanD ~ | تاريخ التسجيل: يوليو 2002
|
إرسال هذه الصفحه لصديق!
لطباعه هذا الموضوع
![[rose]](graemlins/40.gif)
..![[heartpump]](graemlins/heartpump.gif)
![[Confused]](confused.gif)
![[Mad]](mad.gif)
![[Frown]](frown.gif)
حتى آخر شي![[crying]](graemlins/crying.gif)
اللي ما خلاني آكرهها انه![[Razz]](tongue.gif)
![[Embarrassed]](redface.gif)
![[Big Grin]](biggrin.gif)
![[kiss]](graemlins/kiss.gif)
![[Eek!]](eek.gif)
![[applause]](graemlins/applause.gif)
المشهد هذا كان تحفه ومش مشهد لـ فيلم كرتوني وهالنقطه تحسب لصالح ديزني برافو![[rofl]](graemlins/rofl.gif)
![[worried]](graemlins/worried.gif)
ولا شاف الشر أصلاً هالهانس حرام فيلم بـ حجم فروزن يكون مافيه شرير كفو لول![[eyelove]](graemlins/eyelove.gif)
![[dance]](graemlins/dance.gif)
![[happy.]](graemlins/happy.gif)
![[super]](graemlins/super.gif)
![[nut]](graemlins/nut.gif)
![[bgrlaugh]](graemlins/bgrlaugh.gif)
![[pleased]](graemlins/pleased.gif)
