بسم الله الرحمن الرحيم طبعا الشهر الي طاف بنفس هذه الايام كنت بالمملكة العربيه السعودية بحمد الله و رعايته
امي قررت السفر عشان عرس ولد خالتها الي هم من مكه اصلاً ، و باخر لحظه قررت تاخذني وياها لان كان من المقرر انها بتسافر ويا اخوي و انا عندي شغل كثير بسببها رفضت المرة الاولى بس المرة الثانية ثبتت ..
الرحله كانت ساعتين من مطار الشارقة سافرت ( لاول مرة اجرب مطار الشارقة )
انطباعي كان سيئ جدا عن مطار الشارقة كان و مازال حتى لما وصلت مطار جدة الدولي
وسافرنا على متن طيران سما السعودية
لا بأس فيها بس تضحك شكلها
وصلنا مطار جده الدولي ، و ما ادراك ما هذا المطار اوسخ مطار شفته بحياتي ( يسمحلي الكل و يسمحلي الشعب العربي و يسمحولي الكل على كل صراحه راح اكتبها ) اولا معاملة الناس بالمطار جدا جدا جدا جدا قذره
كل واحد نفسه واصله حده و صراخ ع الناس يعني انا اذا صرخ بويهي يعني بالاكيد كنت بضارب وياهم و لا يهمني حد ، بس الله ستر بخصوص المطار ( عن نفسي ما ارضى يكون مستشفى للمجانيين ببلدي ) والله المولات الي عندهم بجدة افخم بكثير من المطار بذات مول العرب لو مسوينه المطار كان احسن لهم
المهم كان العريس وحليله بانتظارنا ( يصير ولد خالة امي ) تاخرنا كثير على ما اظن مبركنيين الطيارة بعيد و شايلين الجناط على ظهورهم
و على طول توكلنا لمكه كان العرس بعد يومين خذ الطريج منا تقريبا ساعة و شوي امي اولا اصرت تروح تسلم على خالتها و بعدين نروح الحرم المكي
و صار امي الي تبيه
وبعدين تحركنا الى احلى مكان شفته بحياتي...
[ أغسطس 04, 2009, 05:24 PM: تم تحرير المشاركه من قبل: «[.نجـــ 5 ـــوم.]» ]
--------------------
امــــــي A N N E
المشاركات: 40288 | من: U.A.E الامـــارات | تاريخ التسجيل: نوفمبر 2003
|
اول شي وقف السيارة شوي بعيد .. عشان ما يشلها الونش لان ممنوع السيارات توقف يمب الحرم ..
كنا ( انا و امي و ثنتين من خواتي و وحده ويا ريلها و عيالها تركتهم بالفندق بجده لان الشغالة وياهم و ما نقدر ندخلها مكه )
و اول منظر شفته كان
( راح اصغر الصور ، و للحجم العادي اضغط على الصورة نفسها )
وبعدين شوي قربنا
قربنا اكثر ..
و صرت داخل الحرم و الشعور كان رائع جدا ..
. . . . . . . . .
وصلنا تقريبا ع الساعة 2 الفجر توقعت المكان بيكون خالي بس ماشاء الله تبارك الرحمن كان الحرم زحمه ، خفنا من سوالف انفلونزا الخنازير كنا لابسين هالكمامات مال الاطباء اهلي بذات امي و خواتي عادي لانهم متعودين على البرقع لكن انا بنص الطواف دوخت ، ما قدرت اكمل حسيت الناس مثل البحر ، مثل السيل و عيوني مو قادرة تستوعب شي اقول لامي حاس بدوخة ابي اطلعاريح ، تقولي اجل اذا جيت ايام الحج وش بتسوي ..؟ و كملت و شليت هالكمامات ، و قلت على الله توكلنا و لن يصيبنا الا ما قدرة الله
( مثل ما تشوفون الصور بقمة الروعة مو لاني انا مصورهم ، المكان بروحه يشرح الصدر )
( الحكومة السعوديه تهتم بالحرم المكي و المدني اهتمام رائع جدا بينما المساجد الاخرى الي بالطرقات لا حول الله و لا قوة الا بالله )
( من المواقف الطريفة الي صارت لي ، بعد ما خلصنا الطواف كنت كثير عطشان، و شربت ماي زمزم لاني بطني قالت بس و بعدين صلينا ركعتين امي صلت و انا وقفت يمبا اصلي فجاه و انا اصلي واحد من الهيئه يسحبني و يقولي هذا المكان للنساء اطلع و انا بنص الصلاه اقوله قول والله ، قطع صلاتي الله يقطعة )
طبعا لاحظتو بالصورة الاولى الظلام كنا واصلين الليل الساعة 2 الفجر .. و الحين شوفوا هالصورة كانت ع الساعة 5 و نص تقريبا الصبح ..
ماشاء الله المكان دايما منور صلينا الفجر و كلمنا الصفا و المروه و طلعنا نرتاح ... امبيه انا واعي كنت من الصبح اليوم الي قبلة رحت الدوام ، و بعدين ما ارتحت العصر و ما رقدت كنت ادور على اشيا ناقصتني فتخيلو 24 ساعة كنت صاحي ، خلاااااص حسيت عمري بموت من التعب
و نكمل ...
[ أغسطس 04, 2009, 05:21 PM: تم تحرير المشاركه من قبل: «[.نجـــ 5 ـــوم.]» ]
--------------------
امــــــي A N N E
المشاركات: 40288 | من: U.A.E الامـــارات | تاريخ التسجيل: نوفمبر 2003
|
مرحبا مرة ثالثة .. نكمل التقرير ، الاكثر من رائع ببلد الله يحبه كثير
خاله امي رفضت نطلع من مكه عشان قلنا بعد الطواف بنرجع جده ، بس رفضت و هم عنهم بنايه بمكه و عطونا طابق كامل وحليلهم و حلفوا علينا ما نطلع وصار الي يبونه قعدت 3 ايام تقريبا بمكه ، لين يوم العرس العرس كان اسلامي كثير لاول مرة اشوف عرس اسلامي بهذه الطريقة كله اناشيد اسلاميه و بعد العرس على طول مريت ع الشقة و خذيت اغراضي و طلعت جده ويا عمتي ( ساكنة بجدة و حضرت العرس )
ابي اشوف هالجدة متحمس لها ، جده غير قالو ، فعلا غير عن كل المدن مافي صور عن جده شو بصور ابي اعرف ...؟ الناس عثرة بسواقتهم ، الكل يلفلف على الثاني يعني مدري كيف سواقتهم تخوف اليوم الثاني اجرت سيارة قلت اطلع بروحي افرفر اجرتها الظهر ، رديتها عقب المغرب بصراحة سواقتهم وااايد OVER و مستحيل امشي وياهم
كنت اروح شارع اسمه التحليه فيه خوش مولات و كوفيات و دايما اقعد بـ بالتنيوم كافيه المعسل فيها و لا اروع .. ...
و بعدها بكم يوم ، رحنا الى المدينه المنورة مقر رسولنا الكريم عليه افضل الصلوات و السلام المسافة تقريبا كانت 5 ساعات من جدة للمدينة المنورة طول الطريج و نحن رايحين اتذكر قصص الرسول و اشوف الجبال الوعرة ، اقول كيف كان الرسول يمشي من بين الجبال بعدين امي قالت لي مدري حديث او قران انه كيف الله كان يسهل على الرسل بسفرهم ..
كل شي كان مرتب ، المدينه جوها حار اكثر عن جده .. كان يوم الخميس و ربحنا يوم الجمعة بالصلاه هناك ، اكيد وصلنا المساء بعد صلاه العشاء و هذا اول منظر كان ..
. . . و الفندق الي نزلنا فيه مقابل الحرم و شوفوا غرفتي وين كانت ...
اهـ هـ هـ هـ مطله على الحرم المدني ( يارب ما تكون اخر زيارة يا رب ) بلغنا و بلغ جميعنا هذا المكان ..
حطينا اغعراضنا و على طووووول للحرم بسم الله ماشاء الله ..
. . . . .
. . . . . . . . . . .
كنا ندور مطعم نتعشى فيه بعد الساعة 1 الكل مبند امر من الحكومة و بالذات مركزين على الفنادق و المحلات الي حول الحرم .. طبعا ما لقينا غير نتعشى بسكوت و شاي و انخمدنا عشان نصلي الفجر بالحرم المدني .. و الحمد لله صلينا الفجر
شفت البوابه الي يمبها قبر الرسول عليه افضل الصلوات .. و شفت ان الجو مو مزدحم كثير و قلت فرصه ادخل .. و دخلت و شفت قبر الرسول و الصحابه ( ابوبكر الصديق و عمر بن الخطاب ) رضي الله عنهم سلمت عليهم و كانت غصه بقلبي مدري شنو هي كنت فرحان و بنفس الوقت مدري شعوري غير ...
و هذه بعض الصور بالفجر من بعد صلاه الفجر .. ماشاء الله المسجد و لا مكان فيه فاضي غير جذي انه يوم الجمعة يعني الحمد لله اني صليت بهذا المكان بيوم مبارك ..
من بعد صلاه الجمعة ، نسيبي سألني صليت بالروضه ، قلت له لا ما اعرف وين مكانها .. قالي ما تعرف وين قبر الرسول ، قلت له اعرف قالي خلاص يمبا الروضة و لون الفراش فاتح غير عن هذا الفراش .. قلت له خلاص ان شاء الله .. و دخلت و يالللله سترك شو الزحمة الكتف بالكتف ، يالله شي مو طبيعي بالمرة .. و زحمة يعني قلت خلاص بطلع و قلت يا ربي سامحني ما راح اقدر اصلي بهذا المكان .. و فجاة ويا الدز مدري منو دزني دزه قويه و لقيت عمري بالروضة
استانست كثير واحد من الي واقفين الشرطة ع ما اظن ، يقولي اطلع يا خوي عطي مجال لغيرك ... قلت له انا ما صليت و رحت بعيد عنه و لقيت مكان يمب قبر السول و استانست ، حطيت سجادتي عشان ابدا الصلاه . بعد واحد يقولي لو سمحت برع ، اووووف لا حول و لا قوة قلت له شفيك انت بعد ما صليت انا .. و اصر على كلامه طاااااف يا عمي صليت و طولت بالصلاه بعد من سجدت بهذا المكان يالله ، ارتاح قلبي .. هذه كله بعد صلاه الجمعة عشان بنرجع جدة على طول و انا طالع من الحرم سلمت على الرسول مرة ثانيه .. و من طلعت من مسجد الرسول لا شعوريا لقيت عيوني تدمع كثير و بقلبي غصه اني راح اترك هالمكان ..
وهذه الصور الاخيرة ..
مناظر من بعد صلاه الفجر ...
[ أغسطس 04, 2009, 06:00 PM: تم تحرير المشاركه من قبل: «[.نجـــ 5 ـــوم.]» ]
--------------------
امــــــي A N N E
المشاركات: 40288 | من: U.A.E الامـــارات | تاريخ التسجيل: نوفمبر 2003
|
بصراحه حرام يكون المطار اللي يستقبل المعتمرين وحجاج بيت الله بهالمستوى وهالمعامله
احنا العام برمضان اعتمرنا..وتخيل اول ما نزلنا من الطياره ع المطار لقينا الدنيا زحمه وطوابير مالها اخر...وجان ناخذ دورنا في الطابور..وننطر ربع ساعه..نص ساعه..ساعه..الطابو ما يتحرك !! ..شالسالفه ياعالم؟؟ يقولك الـ system down مطار طول بعرض والسيستم داون..المصيبه تجيك طيارات ثانيه وتنزل اوادم يصفون وراك بالطابور وتزيد الزحمه وتنقلب الدنيا شوايه وكتمه وحر ومافي كراسي واقفين ع حيلنا واحنا صايمين ..لدرجه معانا امارتيين يقولون حق الشرطي بنعطيكم لاب توباتنا بس مشونا !!
معقوله مطار أد الدوونيا ما عندهم plan B
ما علينا جني طولت؟
صج قلبها مترررروووووسه
المشاركات: 1594 | من: عمـ(قـطـر)ــري | تاريخ التسجيل: يوليو 2004
|
مرسله في
حسووون .. هلا حبيبي ، و استانست انك اول رد و بعد استانست ان التقرير عجبك وياااارب يبلغك هالاماكن في اقرب وقت ممكن يارب و على كرة كنت ابي اخذ مرتي و ولدي بس خفت عليهم لانه اولاد ولدي بعده ما كمل شهر و امي خافت عليه تغيير الجو و قالت خذ مرتك بس على الاقل تغير جو و تعتمر و تحضر العرس بس انا شفتها صعبه و ان شاء الله اخذهم المرات الجايه و الله يسهل علينا
ليبيه مرحبا منورة بردك الموضوع بخصوص المطار ، والله خفت اتكلم اكثر و انطرد من المنتدى الي بخاطري اكثر يعني معاملة الامارات حقنا من شافونا عايله كبيرة واللللللللللللله ما فتشونا و خلونا نمر على الجميع بس مطار جدة وووووووووععععععععع وقفنا وين مكتوب رجال الاعمال و الدبلوماسيين كان اخف مكان ما فيه زحمة وكان يمبنا طابور دول الخليج و كان واحد عراقي على ما اظن ( قريت اسمه قصي ) بس عنده جواز امريكي قاله مفتش الجواز من شافة مو خليجي قاله لو سمحت روح وقف هناك دخل عنده و قاله مش رايح انا مو لعبه توقفوني اي مكان و حط الجواز جدامهم من شافو امريكي سكتو اقول حق امي شوفي طلع امريكي و مشوه قاااالت مالت عليهم تاج راسهم ترى الامريكي ، و نحن دول الخليج مبهذلينا
--------------------
امــــــي A N N E
المشاركات: 40288 | من: U.A.E الامـــارات | تاريخ التسجيل: نوفمبر 2003
|
مرسله في
wow wow super wow عمره مقبوله يا حسن اخوي
بججد بجد حبيت التقرير انا مكه مع اني زرتها 3 مرات كل مره ازورها احسن اني قاعد ازورها ل اول مره فحياتي جد بس تدخل الحرم الشريف تنسى الدنيا و مافيها من هموم و مشاغل
بلنسبه لمعامله العاملين بمطار جده عمرهم ما رح يتعدلون بجد صرت اقرف اروح جده من الاشكال يلي بلمطار مره مافي اسلوب في التعامل مع الناس كلو همجيه انشاءالله يكون في حل و يحطون ناس تستاهل
جد استمتعت بقرايه تقريرك
والله يرزقنا كلنا بزياره هلمكان مليون مره انشاءالله لانمافي احلى و احسن من هلمكان الشريف
شكرا حسوون
المشاركات: 16430 | من: London | تاريخ التسجيل: مايو 2005
|
مرسله في
اولا" نقبل الله و يا بختك يا ابو جواد ذكرتني باخر عمرة سويتها والله العظيم المدينة المنورة فيها احساس غير عن اي مكان بالدنيا انشاء الله كل المسلمين يجربوا هالاحساس عن قريب يعطيك العافية حسون و التقرير راااااااائع