الموسيقى العربية قبل "علم قلبي" كوم وبعده كوم تاني
الالبوم نزل يوم 4 فبراير 2003
الالبوم ده عمل طفرة في تاريخ الموسيقى العربية بالكامل والالبومات والاغاني العربية من بعده بقت تتصنف قبل علم قلبي وبعد علم قلبي عشان نبقى جايبين كده م الاخر
التنوع الموسيقي في الالبوم جه بسبب تنوع مواضيع الأغاني وعدد الشعراء الكبير في الألبوم 7 شعراء و7 ملحنين و3 موزعين (هاني يعقوب – فهد – عمرو شاكر)
تعالوا نشوف أغاني الألبوم وإزاي عمرو دياب قدر في علم قلبي يجمع بين كل أشكال الموسيقى ويعمل حاجات ظهرت لأول مرة في الأغاني العربية
_________________________________________________
علم قلبي كلمات: وليد جلال الحان: خالد عز–عمرو دياب توزيع: فهد
أول أغنية عربية يكون فيها موسيقى (هيب هوب)الأغنية كمان فيها أنواع موسيقى مختلفة (إليكترو- آر&بي -إيقاع خليجي) كل ده مع ستايل البوب في الموسيقى ودخول الناي والوتريات في الفواصل وطبعا كل الحاجات دي اللي عملها الموزع فهد
_________________________________________________
أنا عايش كلمات: ربيع السيوفي الحان: عمرو دياب – عمرو مصطفى توزيع: هاني يعقوب دايما الكلام القوي واللحن القوي محتاج موسيقى قوية وتوزيع قوي وده بالظبط اللي عمله الموزع هاني يعقوب نجم الأغنية الأول
أنا عايش نوع الموسيقى بتاعها (آر & بي -Cha-cha-cha) مع شوية كمانجات شرقي بإيد هاني فرحات في الفاصل الأخير في الأغنية كوكتيل موسيقى يخلي اللي بيسمع يبقى متكيف من الجمال
[هسمعكوا موسيقى انا عايش كاملة في الكومنتات .. الموسيقى لوحدها أصلا حدوتة]
_________________________________________________
قالي الوداع كلمات: بهاء الدين محمد الحان: خالد عز توزيع: فهد
بهاء الدين بيحكي "وأنا بسمع عمرو دياب الأغنية قولتله قالي الوداع وهقوله إيه هو الوداع يتقال فيه إيه" لقيت رد فعل من عمرو دياب نساني باقي الكلام اللي كنت كاتبه!
الشكل الموسيقى للأغنية هو (ارند بي سول) وكالعادة في ألبوم علم قلبي نهاية الأغنية كان فيها جزء توزيع للآلات الوترية بس عمله هاني فرحات عازف الكمانجا مع توزيع أماكن أصوات كل الآلات الوترية في الأغنية
________________________________________________
ياكنزي كلمات: محمد رفاعي الحان: رشيدة الحارس توزيع: فهد
أغنية يا كنزي (ارند بي وجاك سوينج) وفيه لمسة الفانك يعني الاساس ارند بي وجاك سوينج فيهم لمسة الروك والفانك مع تطويع ايقاع خليجي
ودي أول وأخر أغنية تتلحن لعمرو دياب من ملحنة وهي رشيدة زوجة المطرب لؤي
صولوهات الأغنية (الموسيقى فقط بدون كلام) عاملها هاني فرحات وكلها بآلات وترية شرقي كمانجا وعود وقانون
_________________________________________________
تقدر تتكلم كلمات والحان: محمد رفاعي توزيع: فهد
شكل جديد لأصوات الجيتارات كان مختلف تماما في سنة 2003 مع الشكل الموسيقى (آر&بي) ودخول الأغنية بالجيتار الحزين مع صوت بيانو قوي في نص الأغنية.
________________________________________________
لو عشقاني كلمات: بهاء الدين محمد الحان: محمد رحيم توزيع: هاني يعقوب
أول أغنية عربية تتعمل بموسيقى البوب مع إيقاع دربوكة جزائري وخد عندك بقى عزف عود مع سبانيش جيتار.. كوكتيل موسيقى يجيب صداع والله ونجم الأغنية طبعا الموزع هاني يعقوب اللي قدر يعمل كل الحاجات دي مع بعض _________________________________________________
علمني هواك كلمات: رضا أمين الحان: شريف تاج توزيع: هاني يعقوب
الأغنية كانت لحن وعايزين صياغة عليها فعمنا بهاء الدين محمد قاعد مع عمرو دياب في البيت ، وابدا مش راضية تيجي ، عمنا بهاء واستاذنا كلم استاذ رضا أمين "الله يرحمه" وقاله في لحن وعندنا مشكلة في الصياغة بس احتفظ بالمذهب بتاعها "علمني هواك ايه معنى الحيرة ، علمني أشتاق علمني الغيرة" ، استاذ رضا رحمة الله عليه كتب الأغنية في اقل من ساعة وكلمه قاله "قلبك صحاني على صوت دقاته ، ضمني خلاني روحه وحياته" ، "أجمل أحلام أنا بحلمهالك ، لو حتى بنام قلبي بيصحالك .. يفضل سهران يتمنى حاجات" ، ومن هنا بقت جاهزة الاغنية
الأغنية نوعها ميكس ارند بي وهيب هوب (بس تقدر تقول ارند بي بس علشان هو الاساسي) ، الانترو اتعمل بيز جيتار وبيانو ، والصوت اللي ف الاغنية اسمه وودين فروج اللي هو شبه صوت الضفدع اللي بتسمعه ، الميلودي اسمه لييد سانث سيزر
_______________________________________________
حبيبي يا عمري كلمات: بهاء الدين محمد الحان: خالد عز لحن الصولو: عمرو دياب توزيع: فهد
الأغنية فيها لحنين الأول بتاع الكلام وده عمله خالد عز.. واللحن التاني لحن الموسيقى الكتير اللي في الأغنية من غير كلام وده عمله عمرو دياب
حبيبي يا عمري التوزيع الموسيقي بتاعها عمله فهد.. والتوزيع الشرقي في الجزء الأخير من الأغنية بالآلات الوترية عمله يحيى الموجي (من بعد السكوت في نص الأغنية وكوبليه لو يوم حسيت بغيري لنهايته)
_________________________________________________
انت مقولتش كلمات: بهاء الدين محمد الحان: عمرو دياب-خالد عز توزيع: فهد
تكنو+إلكترو بوب+إيقاع خليجي لحن الكلام عمله عمرو ولحن الصولو والموسيقى بين الكوبليهات لخالد عز سهل جدا في الأغنية دي تسمع الإيقاع الخليجي وتميزه بكل سهولة في الموسيقى بين الكوبليهات عشان صوت المزمار عالي فيها
_________________________________________________
كلهم كلمات: أيمن بهجت قمر الحان: عمرو مصطفى توزيع: هاني يعقوب
الأغنية اللي بتوصف حالة بنعيشها كتير (كلهم بيقولوا كده في الأول والكلام الحلو بيتحول)
الأغنية (مزج المقسوم في قالب الارند بي) مقسوم شرقي مع موسيقى التكنو والبوب .. وخد عندك بقى إليكتريك جيتار وسبانيش جيتار وقانون وعود وناي وكمانجا وأكورديون وطبلة ورق
_______________________________________________
حنيت كلمات: هاني الصغير الحان: خالد عز توزيع: عمرو شاكر
الشاعر هاني الصغير تعاونه في الالبوم كان عن طريق صديقه الملحن خالد عز ، وكانوا سمعوا عمرو دياب الأغنية ، وتقريبا كانت تاني أغنية يسمعها في التحضيرات وركنها ، بعدها بسنة وشهرين الشاعر الاستاذ ايمن بهجت قمر كلمه الفجر ، قاله انا عند عمرو في البيت ، وسمعنا الأغنية تاني ، وعمرو قرر يضمها ، وفعلا راح الاستوديو تاني يوم وعمرو طلب منه يخفف الكلام ف الكوبليهات واتسجلت ووقتها المنتج محسن جابر قال لعمرو دي احلى أغنية ف الالبوم
الأغنية دي الشكل الموسيقي بتاعها اسمه (ريذم & بلوز) وده بيتعمل بحاجة اسمها (فندر رودز) في الكيبورد أو الأورج
صوت القانون والجيتار والكمانجا ظاهر بقوة خلفية الأغنية ورا صوت عمرو.. والجزء الأخير صولو الموسيقى بس بالـ(فندر رودز) اللي هو الشكل الموسيقي للأغنية نفسها عمله الموزع العبقري عمرو شاكر
_______________________________________________
خليني جنبك كلمات: محمد رفاعي الحان: نادر نور – عمرو دياب توزيع: فهد
نركز بقى مع بعض كده عشان هنتكلم كتير عن الأغنية دي
أولا خليني جنبك ماكنش اسمها خليني جنبك كان اسمها بعشق لقاك وخليني جنبك ده كان السينو بتاع الأغنية اللي هو الكوبليه اللي بيتعاد بعد كل كوبليه أساسي
عمرو دياب لما سمع الأغنية شال منها المقدمة اللي كانت بتقول (بعشق لقاك وبحس إني نفسي أكون نسمة في هواك.. يا حبيبي قلبي حياته لما يكون معاك.. زي الملاك شايفاك بعيني أجمل من الملاك واتمنى أكون لو حتى نجمة صغيرة تنور سماك) وخلى الأغنية على طول تبدأ من خليني جنبك
الكوبليه بتاع خليني جنبك ألحان نادر نور والكوبليهات التانية بتاعت (غيرت حالي في كلمة واحدة – أناديك حبيبي ولا عمري ولا أقولك إيه) دي من ألحان عمرو دياب
كمان أيمن بهجت قمر كان ليه تعديل على الكلام عشان نزله شكر خاص على الأغنية دي على غلاف الألبوم
خليني جنبك هي ملحمة موسيقية فعلا بتجمع بين 3 أشكال لموسيقى الروك (باور بلاد – هارد روك - بروجريسيف روك) والأخير ده نوع قديم من موسيقى الروك ظهر في الستينات
كمانجا وطبلة وباص جيتار ودرامز وسبانيش جيتار وفلامينجو وفي نهاية الأغنية صولو إليكرتريك جيتار لما بتكون الأغنية وصلت لقمة الموسيقى الرووك.. كل ده بقى مع توزيع الآلات الوترية قانون وعود وكمانجا عمله هاني فرحات
_______________________________________________
في النهاية:
البوم علم قلبي لو نزل تاني في سنة 2024 يعني بعد 21 سنة من تاريخ نزوله هيبقى رقم واحد وهنسمع فيه أحدث موسيقى وأحلى كلام وأقوى ألحان وأي مطرب هينزل بألبوم معاه محدش هيسمعه
مرسله في
لو علي اغانيه الجديدة اخر ١٠ او ١٤ سنة مقدرش افتكر اسامي اغنيتين مش بس ٥
لكن لو اغانيه القديمة اللي في اول ١٠ سنين من الالفية طبعا افتكرله اغاني كتير لاني بصراحة كنت بحب اغانيه وقتها اكتر بكتير من عمورة لانه في ذاك الوقت تامورة كان من جيلنا اقصد جيلكم واغانيه ستايلاتها ومصطلحاتها اقرب لجيلكم من عموورة شوية
طبعا مع الوقت بتكتشف حلاوة اغاني عمرو دياب وقتها وانها احلي وعايشة اكتر من اغاني تمورة
[ يوليو 17, 2024, 08:18 AM: تم تحرير المشاركه من قبل: Heel Tito ]
إرسال هذه الصفحه لصديق!
لطباعه هذا الموضوع
![الملف الشخصي لـ [H][A][SS]](http://salmiyaforum.net/ubb/profile_ubb6.gif)
![البريد الإلكتروني [H][A][SS]](http://salmiyaforum.net/ubb/email_ubb6.gif)
![[Big Grin]](biggrin.gif)
![[rofl]](graemlins/rofl.gif)
![[dancer]](graemlins/dancer.gif)
![[eyelove]](graemlins/eyelove.gif)
