مرسله في
شفت وايد افلام بالفترة اللي طافت من اللي مترشحين للاوسكارز:
مون لايت: من الافلام الحلوة و اللي قصتها جدا انسانية و واقعية، و لكن في شي ما شدني بالفيلم .. مادري اهي الحبكة و لا تسلسل الأحداث ولا البرود الزايد عن اللزوم .. بس في شي ناقص بالنسبة لي .. ما انكر براعة تمثيل الطاقم و النهاية غير المتوقعة .. و لكن كان في شي ناقص بالنسبة لي .. شخصيا احس ان الضجة اللي حول الفيلم ماخذه اكبر من حجمها. تقييمي له 8/10
مانشستر باي ذا سي:
من أروع أفلام 2016 .. فيلم درامي محبوك بطريقة عبقرية .. تطور الشخصيات و التجسيد عن كايسي افليك صدمني بطريقة ايجابية .. طول الفيلم احس ان العبرة بتطيح بس مو راضيه تنزل من عيني بسبب اداء كايسي .. فيلم ولا اروع .. يعني لو ابي اخلي احد يتعلم شلون يمثل .. اقوله شوف هالفيلم و تعلم من اداء الممثلين .. انصحكم فيه و بشدة .. و لكن من الحين اقولكم اللي ما يحب افلام الدراما لا يشوفه .. تقييمي له 9/10
لايون: تمثيل الطفل يخررررررررررررع .. الطبيعية و الريكاشنات و الصوت .. شي قوي قوي قوي .. بالنسبة لي هو اللي معطي للفيلم قوة و ثقل .. اضافة الى تمثيل نيكول كيدمان الرائع .. الهدف من الفيلم جدا انساني .. الفيلم حلو .. تقييمي له 8/10
فنسيز: يمكن وانت تشوف الفيلم تحس انه ممل و طويل .. لكن كل ما يمشي الوقت كل ما تفهم اكثر الرمزية اللي موجودة بالحوار و البودي لانقوج، و هالشي اللي يخليك تحس بعبقرية الفيلم .. حبيت وايد تمثيل دينزل .. يعني من افضل التجسيدات اللي شفتهم له بتاريخه "مو الافضل و لكن من افضل" .. و حبيت تمثيل حبيبة قلبي فيولا .. تحس ودك تصفق لهم لما تشوفهم يمثلون مع بعض .. ما حبيت تمثيل ولدهم الصغير .. او يمكن تمثيله جيد ولكن جدام دينزل و فيولا طالع ضعيف تقييمي للفيلم 8.5/10
ارايفل: شفته اول ما نزل عندنا بالسينما .. و من الافلام العبقرية لسبب ماراح اقدر احرقه للي ما شافوا الفيلم .. لكن اللي شافوه عرفوا الاختراع اللي صار بالفيلم .. جد في شي تم اختراعه بالفيلم و هالشي خلاني جد انبهر .. القصة ان فضائيين موجودين و لكن يتناولون الموضوع بزاوية مختلفة عن اللي متعودين عليه .. شي اثرى الفيلم بشكل كبير .. تمثيل ايمي ادمز رائع رائع رائع و تستاهل عليه ترشيح للاوسكار الصراحة .. تقييمي للفيلم 8.5/10
هل اور هاي ووتر: من المرات النادرة جدا اللي احب افلام بهالنوعية هذي .. اداء الممثلين و تجسيد الشخصيات قوي .. اذا تحب الافلام الاكشن راح تلاقي قصة تربطك فيها .. و اذا تحب الاخراج المميز و التمثيل العبقري .. راح تلاقي شي بهالفيلم .. و اذا تحب الدراما ... راح تحب هالفيلم .. باختصار من احلى افلام 2016 تقييمي للفيلم 9/10
باقيلي نكتورنال انيمالز، جاكي، قيرل اون ذا ترين و فلورنس فوستر جينكز .. عشان اقدر اشوف الاوسكارز و انا متحمس اكثر
بالاخير .. ليلحين ما شفت فيلم بحلاوة و ابداع لا لا لاند .. للمرة المليون اقول انه ساحرني
راح اكتب رايي بعدين بكل فئة من فئات الاوسكار و منو اتمنى يفوز فيها
الموضوع مغلق
إرسال هذه الصفحه لصديق!
لطباعه هذا الموضوع
![[Big Grin]](biggrin.gif)
![[heartpump]](graemlins/heartpump.gif)
![[nut]](graemlins/nut.gif)
