غير هذا الإخراج إسطوري والزوايا إلي يصور منها المخرج فنااااانه ينتقي الزاويه صح
أجواء الفيلم ستينيه بحته ماحسيت إن الفيلم يديد
حتى الممثل إلي مثل دور الثيربي حق كولين فضيع هالريال
كولين الأقرب للأوسكار هالسنه ولو خذه بكون راضي تمام الرضى
--------------------
When the evening falls And the daylight is fading From within me calls ? Could it be I am sleeping For a moment I stray Then it holds me completely Close to home, I cannot say Close to home, feeling so far away
الامس شفت سوشل نيتورك للمره الثانية على بلو راي .. ومع هالمشاهده تأكدت ان هذا افضل فيلم لسنة 2010 بلا منازع .. ديفد فينشر قدم عمل كلاسيكي معاصر محكم من كل الجوانب .. مافي لحظه تمر من غير ماتكتشف شي جديد .. كل مشهد يمر له معنى .. كل شغله تطلع مدروسه .. على سبيل المثال مشهد مارك وهو قاعد بالجلسه الخاصه بالمحاميين وكيف كان الجو يمطر بغزاره شديدة وكأنها صرخه قاعد يطلقها مارك من غير ماينطق بأي حرف .. حسيت بتوتر فظيع وكأني عايش بأعماق مارك .. في كثير مشاهد ذكيه قادره على انها تستوقف المشاهد ..
عنوان الفلم بحد ذاته اختيار ذكي .. كنت اقول ليش ماسموه فيس بوك وخلاص ؟ .. بس الفلم عرفت ان سوشل نيتورك هو عنوان عريض لحياة مارك .. بالرغم من انه استطاع ينشئ اكبر شبكة للعلاقات الاجتماعيه الا انه ماقدر يحتفظ بصديق واحد لنفسه .. وفشل مع مرتبة الشرف بأنه ينشئ شبكة علاقات اجتماعيه خاصه فيه .. فكرة الفلم جذابه وحلوه وتخلي الواحد يعيد النظر بحياته وعلاقاته .. الفلم كله على بعضه عباره عن ملحمه خاصه بالصداقه والعلاقات .. فلم كثير ملهم وساحر ..
ديفد فينشر قام بشغل جبار خلف الكاميرا .. التعديل بالفلم كان رائع وواضح مدى الجهد المبذول فيه .. ديفد فينشر بالكواليس كان هو ربان السفينه بكل معنى الكلمه .. حتى تمثيل جيسي الغريب كان هو السبب فيه .. كان ينصحه كيف يمثل الدور وكيف ينطق الكلام بشكل سريع مثل السايكو وكان له يد بكل الامور اللي خلت جيسي يترشح لافضل ممثل .. هالجائزه فعليا اعتبرها لديفد اكثر من جيسي .. لانه كان السبب في كل حرف واداء شفناه من جيسي ..
البونز فيشتر روعه وعطاني فكره عن الجهد الكبير اللي قام فيه فريق العمل .. تخيلوا كل شاشات الكمبيوتر اللي كنا نشوف الشخصيات قاعدين عليها كانت باللون الازرق على طول الفلم .. ماكان ظاهر عندهم شي .. واللي قام بدور التوأم هو ممثل واحد .. لكن الجسم كان لممثلين .. جسم الممثل نفسه والثاني جسم لممثل مؤقت انشال وجهه وانضاف وجه الممثل اللي شفناه .. التقنيات كانت رهيبه وذكرتني كثير بفلم فينشر بينجامين بوتن ..
سوشل نيتورك بالاضافه الى بلاك سوان اعتبرهم افضل فلمين هالسنه وافضل بمراحل عن باقي الافلام المرشحه .. لازم واحد فيهم يفوز بالبيست بيكتشر .. حرام لو راحت على واحد منهم .. وديفد فينشر لازم يظفر بجائزة افضل مخرج .. ياهو او دارين ارنوفسكي عن بلاك سوان .. افضل مخرجين واكثر اثنين قدموا عمل سينمائي متكامل ثغراته تكاد تكون معدومه ..
بالنسبه لافضل ممثل رئيسي .. بالنسبه لي المنافسه محصوره بين كولن فريث وجيف بريجز .. الغريب ان التاريخ يعيد نفسه مع كولث فريث وجيف بريدجز .. السنه اللي فاتت كانوا اكثر اثنين يستاهلون الاوسكار .. مع العلم ان دور كولن فريث كان اصعب بكثير بسنغل مان والكفه كانت تميل للاداء اللي قدمه .. بينما جيف اللي ساعده بالاضافه لاداءه هو ان ساعة تكريمة وحصوله على الاوسكار حانت .. نفس الشي السنه هذي !! .. كأنه كولن يرد الصاع لجيف على الاوسكار اللي سلبه منه السنه اللي فاتت .. بالرغم من انهم اقرب اثنين للاوسكار هالسنه وكلهم قدموا اداءات قويه .. الا اني بديت اقتنع اكثر ان جيف يستاهل الاوسكار اكثر عن دوره بترو جرنت .. بس ساعة تكريم كولن بالاوسكار حانت هالسنه .. معادله غريبه .. ويمكن ماتكون منصفه .. بس بالنهايه بكون سعيد لو راح الاوسكار لواحد منهم .. لا فرانكو ولا غيره قدم اداء قريب من هالاثنين هالسنه ..
افضل ممثله رئيسيه .. الموضوع محسوم .. نتالي بورتمان قدمت افخم اداء هالسنه عن بلاك سوان .. اداء راح يخليها تحفر اسمها بسهوله بين الممثلات اللي قدموا ادوار اسطوريه .. دور دسم واداء استثنائي مخيف وجبار بنفس الوقت .. لا انيت ولا غيرها ممكن ان اداءها يتقارن باللي قدمته نتالي .. بس يمكن الاوسكار له كلمة مختلفه بهالموضوع .. ويمكن يخذلنا مثل ماخذلنا قبل ويسلمون الجائزه لانيت مجامله على مشوارها .. عموما اتمنى ان نتالي ماتطلع الا وهي شايله الاوسكار بيدها .. لانها الاجدر عن اداءها المميز بالفلم .. عاد شكلها بيكون تحفه وهي حامل .. اذا فازت بتكون ثاني ممثله تطلع تستلم الاوسكار وهي حامل بشكل واضح بعد كاثرين زيتاجونز ..
افضل ممثل مساعد .. انا من عشاق اداء جيفري راش عن كينغز سبيتش .. واتمنى ان الجائزه تروح له .. في مشاهد فعلا مثلها بتمكن بالفلم وكان صادق فيها لابعد درجة .. ماعندي مشكله لو خذها كرستين بيل لاني بعد استمتعت بأدائه بذا فايتر .. بس حبيت جيفري اكثر ..
افضل ممثله مساعده .. ميليسا ليو صايره رهييييبه واحب اشوفها بأي فلم تطلع فيه .. ماعندي اي مشكله لو خذت الاوسكار لان برايي دورها كان من العوامل الرئيسيه اللي خلتني استمتع بذا فايتر .. بس ماقدر اغض النظر عن الاداء المرعب اللي قدمته الطفله الصغيره اللي مثلت بترو جريت .. هالبنت بتطلع ممثله جباره لو استمرت .. كلت الجو عن مات ديمون وكل الممثلين الكبار اللي معاها بالفلم .. اداءها صادق ورائع .. من وين جابت كل هالقسوه والجبروت بالاداء !! .. كانت فعلا مثل مايكون ابوها مات ورايحه تنتقم لموته ولا كأنها تمثل .. بصراحه انا حاب كثير ان الجائزه تروح لها .. ولو راحت لمليسا مثل ماقلت ماعندي مشكله لانها تستحقها .. اما ايمي ادمز كثير فرحت لترشيحها .. هالممثله مصممه توصل لاول اوسكار لها .. وانا متأكد ان هاليوم بنشوفه قريب .. بالرغم من ان كثير كانوا يشككون بموهبتها واستمرارها لما اطلعت الا انها اثبتت لهم انها ممثله شاطره وقادره تطور نفسها ..
افضل سيناريو اصلي .. حاب ان انسبشن ياخذها .. لكن اكيد بتروح لكينغز سبيتش .. وافضل سيناريو مقتبس .. الاحق فيها سوشل نيتورك .. وماراح ازعل لو راحت لترو جريت وتوي ستوري 3
افضل اغنية اصلية .. يارب يارب تانجلد .. كفايه انهم احرمونا من فرحة ترشيحه لافضل فلم انميشن .. ابي الفلم ياخذ اوسكار واحد عالاقل .. من زمان ماخذت ديزني اوسكار عن افضل اغنية اصليه وهي اللي كانت متسيده هالفئه بالتسعينات .. جد حرام .. بس اللي مخليني اتفائل وافرح هالمره هو ان بنشوف العبقري الن مينكن طالع على المسرح ويعزف الاغنيه عالبيانو .. اول مره يطلع الن مينكن ويعزف عالمسرح .. بيكون شي حلو كثير لكل معجبينه ..
افضل فلم رسوم متحركه اعتقد صارت محسومه لتوي ستوري 3 .. ما ملوا بيكسار من الاوسكارات ؟ .. احنا ملينا لول
افضل سينماتوغرافي .. حرام لو راح لغير بلاك سوان .. الفلم مليان مشاهد خرافيه صورتها تجنن وتحبس الانفاس .. خصوصا مشاهد البالية اخر الفلم .. وافضل اخراج فني حاب انها تكون لترو جريت .. بس شكلها بتروح لكينغز سبيتش .. وبتكون فضيحه لو خذها .. لان غرفة جيفري راش اللي صوروا فيها سبق وصوروا فيها كليب لايمي واينهاوس وفلم جنسي .. وهالغرفه هي ابرز مواقع التصوير بكينغز سبيتش !!
متحمس كثيييير لتقديم ان هاثواي وجيمس فرانكو .. خطوه اكثر من موقفه للاكاديمية باختيار مواهب شبابيه لتقديم الحفل .. متأكد انهم راح يعطون الحفل روح حلوه وخفيفه ..
كل التوفيق لسوشل نيتورك وبلاك سوان ..
[ فبراير 27, 2011, 12:42 PM: تم تحرير المشاركه من قبل: [ L.O.V.E.R ] ]
--------------------
المشاركات: 27170 | من: ~ NeverlanD ~ | تاريخ التسجيل: يوليو 2002
|
الشباب ناقشوا هالمره توقعاتهم ونظرتهم لترشيحات الاوسكار هالسنه
تقديم: يزيد النفجان | خالد السديري | فيصل العازمي
في هذه الحلقة ينضم لنا فيصل العازمي من الكويت لنتحدث عن توقعاتنا وآرائنا في ترشيحات جوائز الأوسكار، والتي سيعلن عن نتائجها يوم الأحد القادم. هل سيكتسح The King’s Speech أهم الجوائز، أم هل سيتقاسمها مع أفلام مثل The Social Network؟ أيضاً نتحدث عن قوائم أفضل 10 أفلام للسنة الماضية لكل منا.
إرسال هذه الصفحه لصديق!
لطباعه هذا الموضوع
![[heartpump]](graemlins/heartpump.gif)
![[Eek!]](eek.gif)
![[nut]](graemlins/nut.gif)
![[eyelove]](graemlins/eyelove.gif)
![[dance]](graemlins/dance.gif)
![[super]](graemlins/super.gif)
![[applause]](graemlins/applause.gif)
![[Confused]](confused.gif)
![[Wink]](wink.gif)
![[smoke]](graemlins/smoke.gif)
![[crying]](graemlins/crying.gif)
شفكيم طيب فكرت اليوم الأحد ![[Razz]](tongue.gif)
