الساعة 10:45 ... رحت السينما حق فلم Tangled و بما أنه اول عرض للفلم ... و الوقت صبح السينما تقدرون تقولون فل ... كأنه داش فلم بالعيد او الويكند و في الليل المهم .. الفلم وايد وايد عجيب ... ديزني رجعت مرة ثانية لافلامها القديمة حبيت الاغاني و خصوصا I See The Light و When Will My Life Begin فلين يضحك بس مو كثر ماكسيموس و باسكال و بداية الفلم حبيتها ماذر غوثل اول مرة اجوف شخصية بهالشر الكوميديا الي بالفلم حبيتها ... يمكن الفلم 20% كوميدي و الباقي ميوزيكال و رومانس و طبعا دراما الثري دي روعة مشتغلين عليه عدل وخصوصا شعر رابونزل كل ماتطيحه اصك عيني
اكثر المشاهد الي حبيتها بداية الفلم و شلون ماذر غوثل باقت رابونزل وهي توها صغيرة عشان تستفيد من شعرها مشهد الانوار رائع و كلاسيك جدا ماذر غوثل تسوي روحها طيبة بس بالنهاية خفت منها مشهد انفجار السد رائع جدا ... وخصوصا بالثري دي نهاية الفلم ابدا مو متوقعة و مؤثرة فلين رجع البرج عشان يطلع رابونزل من القصر وينقذها ... ولا ماذر غوثل تطعنه بالسكين و مربطة رابونزل بالكرسي و طلع الشر الي فيها ... هني كنت على اعصابي و ماتوقعت الي بيسويه فلين ... راحت له رابونزل تبي تنقذه و لا يقوم ويقص شعرها ويصير شكل ماذر غوثل رعب من قلب و تلقى حتفها وهي تطيح من البرج و فلين يوم يموت كانت دموعي شوي وتنزل لكن مرة وحدة دموع رابونزل ترجعه للحياة و ترجع حق امها وابوها بشعرها القصير البني ويتقدم لها فلين على فكرة ... تقييم الفلم PG على الي جفته كان بسبب ماذر غوثل بالنهاية و مشهدين فيهم دم
3 دي سينما السيف يختلف عن 3 دي سينما السيتي على فكرة
أنت وين دخلته في أي مجمع ؟!
أنا أمس كنت رايح ومتعشم إن بينزل الساعه 11 ونص مثل كل أربعاء جذي يسوون
بس طلعوا إلي بينزلون هم أفلام عاديه مو رابونزل
إن شاء الله عقب باجر بروحه وقت دوامي يكون بدري
--------------------
When the evening falls And the daylight is fading From within me calls ? Could it be I am sleeping For a moment I stray Then it holds me completely Close to home, I cannot say Close to home, feeling so far away
مرسله في
^ ^ دشيته اليوم اول عرض للفلم ... في الستي و الثري دي رائع جدا اي امس منزلين عسل اسود و ديو ديت حق العروض الاولى ... اتمنى انك تروحه باسرع وقت ... من افضل كلاسيكيات ديزني و انتظر رايك
وين محد جاف الفلم بعد؟
-------------------- - المشاركات: 1236 | من: Bahrain | تاريخ التسجيل: يناير 2009
|
على قولة رابونزل بيست داي ايفر لول .. فرحتين بيوم واحد .. فرحة متابعة تانجلد وفرحة استضافة قطر لكاس العالم .. الف شكر لكل اللي طرشلي مسجات واتصل وهناني .. خصوصا حبيب قلبي فات فري اللي بشرني بالموضوع .. لاني كنت ساعتها توني صاحي من النوم ومادري شالطبخه لول ..
المهم .. اليوم الصبح رحت السينما عشان احضر تانجلد .. الحضور كان اغلبه عائلات ورجال كبار جايين مع حريمهم .. واكيد كان فيه اطفال !! .. خفت ان الاطفال يخربون علي الفلم لاني كنت اشوفهم يصيحون وعاملين ازعاج قبل العرض .. لكن اول مادخلنا وبدا الفلم وظهر شعار ديزني .. الكل سكت وظل يتابع الفلم بإندماج تام اسعدني وايد .. ماسمعت حسهم الا بالمشاهد الكوميديه .. الكل كان داش الجو صح مع الفلم ..
ديزني ابدعت .. ديزني قدمت عمل للصغير والكبير .. فلم راااائع بكل المقاييس .. انا واحد خربت على نفسي ابو الفلم وقريت اشياء كثيره قبل مادخله .. لكن مع ذلك حسيت وكأني اول مره اعرف الاحداث .. طريقة تناول قصة رابونزل واقتباسها من قصة الاخوين جريم فعلا رائع .. وماعتقد ابداً ان اذا ما تم تحويل قصة رابونزل الاصلية لفلم راح تطلع بنفس وحلاوة النتيجه اللي شفتها وانا احضر تانجلد .. حبيت البدايه وطريقة تقديم الفلم والمشاهد السوداويه اللي فيها .. تمنيت عليهم بس ان طريقة السرد تكون اكثر جديه من فلين الخبل .. لكن مايهم لان بالنهاية رفع مستوى الحماس عندي لمعرفة شنو بيصير بعد المقدمه .. الفلم احداثه غير متوقعه وماتقدر تخمن ايش راح يصير ..
مع عشقي الكبير لشخصية تيانا .. لكن رابونزل من اجمل الشخصيات اللي ابتكرتها ديزني من ايام فلم مولان .. شخصية مليانه امل وحياه .. طول ماهي موجوده بالمشهد تسرق الاضواء من كل الشخصيات الثانيه .. كتكوته وقريبه للقلب .. عندها حلم مثل باقي اميرات ديزني .. بريئه وعايشه بعالمها الخاص اللي بنته وحطت قوانينه لها ماذر غوثل .. علاقتهم ببعض ذكرتني كثير بفرولو وكوازي مودو الا ان علاقة رابونزل بغوثل ارحم بكثير كون غوثل كانت تعطيها رعاية وحنان اكثر من فرولو لكوازي مودو ..
غوثل من اروع اشرار ديزني وبكل سهوله تقدر تاخذ مكانه مميزه بينهم .. اللي يميزها ويخليها غير عن باقي الاشرار هي انها شخصيه ممكن تتعايش معاها وتحبها .. مافيها نزعه للقتل او التدمير .. كل غرضها بالحياه هي انه تظل شابه وجميله للابد .. مش طالبه تكون هي الوحيده الاجمل مثل زوجة اب سنووايت .. يمكن هذا اللي خلاني اشوف ان شخصيتها فعلا مركبه ومش بسهولة باقي اشرار ديزني .. يعني غوثل كانت الام الحنون مع رابونزل ومستعده تروح مشوار 3 ايام متواصله بس عشان تجيب لرابونزل ألوان مثلاً .. عشان تقضي وقت فراغها بالشي اللي تحبه وهو تلوين الجدران .. فأنا ما انكر اني حبيت شخصية غوثل وعلى قد ماحبيتها وصلت لمرحلة كرهتها فيه .. وعلى قد ماكرهتها ايضاً وصلت لمرحلة تعاطفت معاها فيه ..
بالرغم من ان رابونزل عمرها 18 سنه الا ان ابداً مايبين عليها .. طول الوقت احسها مثل البيبي الصغير اللي يتجرأ ويتعنت برايه ولما يغلط يحس ان كلام امه وابوه هو الصح فيرجع ويرمي نفسه بحضنهم .. رابونزل كانت جذي .. كل ماتحيك غوثل مؤامره عشان تثبت لها ان مالها احد غيرها بالدنيا وترجع رابونزل لها وترمي نفسها بحضنها احس انها تعور القلب .. لانها مخدوعه بالحضن اللي حاسه فيه بالامان .. لذلك تعاطفت معاها لما رابونزل دفعت غوثل عالطوفه بعد ما اكتشفت ان مصدر امانها الوحيد بالدنيا طلع هو الخطر الوحيد اللي لازم كانت تخاف منه .. بالرغم من ان هالتصرف طائش .. لان مهما يكون تظل هالانسانه امها الوحيده اللي عرفتها .. بس حبيت اللي سوته لان غوثل تستاهل
الاغاني رائعه وادت الغرض المطلوب منها .. خصوصا اغنية ماذر غوثل .. حسيت اني قاعد احضر مسرحية غنائيه .. واغنية رابونزل وين ول ماي لايف بيجين كانت روعه واختصرت علينا معرفة حياة رابونزل وشلون كانت تقضي ايامها طول هالمده بالبرج ..
الفلم مليان مشاهد عظيمه والله لو مب الحيا كنت قمت وصفقت وصرخت على الناس عشان يقومون ويصفقون معاي على كمية الابداع اللي قاعدين نشوفه بالشاشه .. منها الاعاده الثانية لاغنية وين ول ماي لايف بيجين .. اول مانزلت رابونزل من البرج ولمست العشب برجلها وشمت ريحته ونامت على ظهرها وداست على الماي .. مشهد رائع بكل معنى الكلمه .. لحظه حقيقيه ساحره مستحيل تشوفها غير بافلام ديزني .. ومشهد الانوار العايمه بالسما واغنية اي سي ذا لايت .. مشهد ساحر والله .. خصوصا لما تنتشر الانوار بالمملكة كلها .. ومشهد انفجار السد كان يحبس الانفاس فعلاً .. الغابة والماي طالعين روعه بالكمبيوتر .. يمكن لو شفتهم بالتو دي ماحبيتهم هالكثر .. وبشكل عام مشاهد الاكشن كلها منفذه بإحترافيه عالية .. مشهد احتفال المملكة ايضاً كان من اروع وامتع المشاهد بالفلم .. حبيت حيوية ونشاط رابونزل وكيف كانت مصدر سعادة كل اللي حواليها .. جد المشهد تمنيت مايخلص ..
والمشاهد اللي ضحكتني على أفى من يشيل لول .. منها مشهد رابونزل لما اطلعت من البرج وكل شوي يتغير المشهد .. مره تقول ليش طلعت الحين غوثل بتعصب .. وبعدين تركض وتناقز وتقول مايهمني انا مستانسه .. وبعدين ترجع تخاف وتقول ياليتني ماطلعت لول مينونه .. ومشهد كيوبيد العجوز المخرف لما يعطينا بوسه لول .. ومشهد الحرس لما يوقفهم اللي يسوي ايمائات والحركه الاخيره اللي سواها يوم يحط يده على خده لول .. كل مشاهد فلين مع ماكسيموس .. ومشهد رابونزل لما تبتلش بفلين اول مايدخل البرج وماتعرف وين تخشه .. بس اكثر شي ضحكني بينهم لما يقولها فلين وين الشنطه جان تقوله خاشته بمكان سري لو تموت ماتعرفه .. جان يقولها على طول اكيد بالجره .. جان تعطيه بالطابي على راسه خخخ
كل الفلم بكفه والمشاهد الاخيره بكفه ثانيه .. نهاية الفلم من اقوى النهايات اللي شفتها لديزني من سنوات .. ذكرتني بستايل نهايات ديزني القديمه اللي كان فيها كل شي .. ثأر .. شجاعه .. اخلاص .. حب .. بكاء .. مثل الجميلة والوحش والاسد الملك وغيرهم .. من زمان ماشفت نهاية درامية بهالقوه .. كمية الاحساس بمشهد موت فلين وتعابير وجه رابونزل وهي تبكي خلت كل اللي يتابع يتفاعل معاهم ويتأثر .. مشهد موتة غوثل مرعب بشكل .. ذكرني بطريقة موتة جاستان اللي سقط للجرف .. وموتة كلايتون لما سقط ومات وهو مخنوق .. نهاية مرعبة خصوصا واني لحظتها ماطلعت من صدمة موت فلين وشعر رابونزل المقصوص .. كل هاللحظات الدرامية تجمعت بنفس الوقت .. النهايه بيرفكت واشبعتني جداً .. حتى اللي بالسينما .. استغربت ان الاطفال الصغار والكبار كانوا ساكتين بشكل فظيع ومندمجين مع اللي صار .. كانت تخلل بعض المشاهد لحظات صمت مطبق .. لو تطيح ابره بالقاعه سمعناها من كثر ماكان الكل مندمج ..
الفلم بلا شك واحد من افضل كلاسيكيات ديزني الاخيره .. كل شي نحبه موجود بالفلم .. والسي جي فعلا اثبت تفوقه بتانجلد .. رسم الشخصيات .. شعر رابونزل .. الخلفيات والغابة والتفاصيل الثانيه .. وصلت لنقطة بالفلم نسيت فيها اصلاً اني اشوف فلم مرسوم بالكمبيوتر .. جد حسيت اني قاعد اشوف فلم تو دي عادي لديزني .. لان نفس السحر وصلني .. ما حسيت اني افتقدت الرسم اليدوي ابداً ..
ماكسيموس وباسكال كانوا رائعين ووجودهم دايما حلو ومحبب بأي مشهد يطلعون فيه .. ماكسيموس فله كأنه كلب كبير لول .. وباسكال هالنتفه طلع مب سهل .. من كان يتوقع ان هو اللي راح يكون السبب في موت غوثل ؟ لول .. وشعر رابونزل مثل ماقلت روووعه وتصميمه بحد ذاته نقطه قوية تحسب للفلم .. والاحلى انهم خلوا لشعرها شخصيه خاصه وينبض بالحياه حاله حال باقي الشخصيات الثانيه ..
الملك والملكه مشاهدهم تحزن من قلب .. خصوصا لما حانت لحظة رفع الفانوس حداداً على بنتهم المخطوفه .. المشاعر اللي حطوها بمشهد الملكه وهي تواسي الملك الحزين كان رااائع ومؤثر لدرجة مستحيله .. الانميشن بهالمشهد كان غني ومفعم بالمشاعر .. قليل ما احس ان الشخصيات المرسومه بالكمبيوتر تنطق وتنبض بالحياه وكأنه في داخلها روح فعلا تحس وتتألم .. مثل العجوز كارل فريدريكسن بفلم اب وتأثره بذكرى زوجته .. والحين الملك والملكه ..
الفلم مهما اتكلم عنه ماقدر اعبر عن اعجابي فيه بالصوره المناسبه .. جد لايطوفكم .. اذا تبون تشوفون فلم عائلي حقيقي مالكم الا تانجلد .. ماراح تندمون على الوقت اللي راح تقضونه فيه .. اجمل فلم قدمته ديزني من سنوات .. توقعته يطلع مليان نكت ماصخه على ستايل شريك .. توقعته يكون عباره عن اقتباس سيء لقصة الاخوين جريم الاصلية .. توقعته يكون اقل جديه من اللي متعودينه بافلام ديزني .. طلعت كل توقعاتي غلط بغلط .. وبعدين طول ما انا قاعد اشوفه بالسينما اقول لنفسي شلون لما ارجع البيت باتجرأ اشوف شريك 4 اللي توني شاريه من ايام بعد ماشفت هالمستوى الراقي ؟؟ انحدار شديد من فوق لتحت !! .. ديزني سوتها وقدمت فلم راح يظل عايش لسنوات .. كلاسيكي ؟؟ طبعاً كلاسيكي ونص .. مافيه ادنى شك من ان الفلم يستاهل يكون ضمن باقة كلاسيكيات ديزني الخالده .. اذا ماشفته للحين شناطر ؟؟ روح لاقرب سينما وشوفه !! .. انا من الحين مخطط اشوف الفلم الاسبوع الجاي .. ومتحمس اشوفه لما ينزل بلو راي ..
[ ديسمبر 03, 2010, 02:21 AM: تم تحرير المشاركه من قبل: [ L.O.V.E.R ] ]
--------------------
المشاركات: 27170 | من: ~ NeverlanD ~ | تاريخ التسجيل: يوليو 2002
|
مرسله في
مشكووور يا نااصر على تقريرك الراائع... كنت أنتظره بفاارغ الصبر ....خاصة أنه هاي أول مرة أنتظر فيلم لديزني مع شلتكم من بديت أشارك بموضوعك ......تصدق...أنا حتى حسيت أنه أحلى من توي ستوري 3 وقريت أنه الفيلم راح ينزل في مارس على بلوراي وبعد كنت أبا أرووح السينما الأسبوع الياي.... بس المشكلة أنه هالأسبوع ابتداء من باجر كله مذاكرة لأن الأسبوع اللي عقبه بنبدأ امتحانات نهاية الفصل الأول ....فأبغي طلب من شلة ديزني .....ادعوولي بالتوووفيق....وأكوون شاكر لكم جداً..
-------------------- المشاركات: 348 | من: الإمارات العربية المتحدة | تاريخ التسجيل: أكتوبر 2010
|
مرسله في
^ ^ مرة وحدة وبطريقة غريبة تذكرت ايام و هي توها صغيرة ... مادري بس حتى انا مافهمت شلون تذكرت بالضبط كأنه غوثل او فلين قالولها عن الاميرة الضايعة
انا الشي الي مستغرب منه يوم ماذر غوثل تطعن فلين ... شلون السجين مافيه ولانقطة دم؟ لوول
[ ديسمبر 03, 2010, 12:12 PM: تم تحرير المشاركه من قبل: (((--Mr.Holiday--))) ]
-------------------- - المشاركات: 1236 | من: Bahrain | تاريخ التسجيل: يناير 2009
|
إرسال هذه الصفحه لصديق!
لطباعه هذا الموضوع
![[Eek!]](eek.gif)
![[super]](graemlins/super.gif)
![[Big Grin]](biggrin.gif)
![[heartpump]](graemlins/heartpump.gif)
![[Frown]](frown.gif)
![[Razz]](tongue.gif)
![[applause]](graemlins/applause.gif)
![[crying]](graemlins/crying.gif)
![[kiss]](graemlins/kiss.gif)
![[Smile]](smile.gif)
![[rofl]](graemlins/rofl.gif)
