منتــدى الســالميــه: دليل إصدارات ديزني • حالياً في الأسواق Coco مدبلج بالعربي

»	منتــدى الســالميــه » القسم الـفـنـي » ســـاحــة الفـــن الغـــربــــي » دليل إصدارات ديزني • حالياً في الأسواق Coco مدبلج بالعربي (الصفحه 62)

إرسال هذه الصفحه لصديق!

الموضوع متكون من صفحات: 1 2 3 ... 59 60 61 62 63 64 65 ... 161 162 163

الكاتب

الموضوع: دليل إصدارات ديزني • حالياً في الأسواق Coco مدبلج بالعربي

Memo0o
عضو نشيط
رقم العضويه 91533

This user is from Kuwait

مرسله في

اليوم كنت قاعده اطلب من موقع ديزني سوالف أكواب ومجسمات وجذي
واللي ضيق خلقي مادري ليش في تهميش فظيع حق The hunchback of notre dame

هالفلم اكثر فلم اعشقه من ديزني وأحب كل الديتلز اللي فيه وحتى شخصيه Hugo حيل احبه

ف شي يحر ان ماله اعتبار ولا جنه في يوم من الأيام نزلو فلم له، على الأقل مجسم محترم كان حيل خاطري احصل واحد 💔

من وين تطلبون مجسمات وسوالف تشوق ملوت ديزني؟ 💐

--------------------

!So Me

المشاركات: 616 | من: Kuwait | تاريخ التسجيل: أكتوبر 2014 |

أرسل ملاحظه لمشرف الساحه عن هذه المشاركه

Orphen
عضو نشيط
رقم العضويه 90094

This user is from Japan

مرسله في

من اكثر الافلام الي اعشقها
زين اني لحقت خذت كل المجسمات الي نزلتله في هذيج الفترة

بينزل مجسم لـ ازميرالدا عشهر اكتوبر باللبس الاحمر

انا اخذ مجسماتي من ايباي وبعدين ديزني ستور لان الي في ايباي اندر

--------------------

المشاركات: 909 | تاريخ التسجيل: أبريل 2011 |

A M I R
عضو نشيط جدا
رقم العضويه 90355

This user is from Saudi Arabia

مرسله في

احمد بلييييز حط لنا صور هالمجسمات اللي تقول عنهم
يعجبني ذوقك
[eyelove]

........

من شوي لجين عمران نزلت سناب شوفوا عن شنو

ونصحت الكل يشتريه من المحلات

--------------------

المشاركات: 1978 | من: K.S.A - Jeddah | تاريخ التسجيل: أغسطس 2011 |

(..khaled..)
عضو مستمر
رقم العضويه 90174

This user is from Saudi Arabia

مرسله في

رد مقتبس:
المرسل الأصلي هو Memo0o:
اليوم كنت قاعده اطلب من موقع ديزني سوالف أكواب ومجسمات وجذي
واللي ضيق خلقي مادري ليش في تهميش فظيع حق The hunchback of notre dame

هالفلم اكثر فلم اعشقه من ديزني وأحب كل الديتلز اللي فيه وحتى شخصيه Hugo حيل احبه

ف شي يحر ان ماله اعتبار ولا جنه في يوم من الأيام نزلو فلم له، على الأقل مجسم محترم كان حيل خاطري احصل واحد 💔

من وين تطلبون مجسمات وسوالف تشوق ملوت ديزني؟ 💐

أتذكر وأنا صغير شفت ستاند كامل بمحل ركن ديزني كله منتجات ودمى أحدب نوتردام
وكانت الجودة والتفاصيل بوقتها صح USA مو اللحين كل شي made in China
وللحين مقهور اني ماأشتريت منها شي وأخذت أغراض لشخصيات ثانية [crying]

وبخصوص التهميش معاك حق بأفلام كثيرة مو بس بأحدب نوتردام ..
عندك مثلاً منتجات هرقل وحياة امبراطور الجديدة وحياة حشرة مو متوفرة حتى بستورات وملاهي ديزني لاند نفسها
والتركيز كله على الأفلام الجديدة ، خصوصاً أفلام العله ستار وروز وشخصيات مارفل ماخذين نص مساحة ستورات ديزني ، وربع لفيلم فروزن ، والربع الأخير لباقي شخصيات ديزني

رد مقتبس:
المرسل الأصلي هو A M I R:
من شوي لجين عمران نزلت سناب شوفوا عن شنو

حتى هيا الشعيبي أمس ببرنامجها "هيونه" طلعت من فانز ديزني وحضرت مسرحية الأسد الملك بلندن 6 مرات

المشاركات: 3077 | من: المملكة العربية السعودية | تاريخ التسجيل: يوليو 2011 |

Orphen
عضو نشيط
رقم العضويه 90094

This user is from Japan

مرسله في

رد مقتبس:
المرسل الأصلي هو A M I R:
^

احمد بلييييز حط لنا صور هالمجسمات اللي تقول عنهم
يعجبني ذوقك

تقصد ازميرالدا

او اكتب في جوجل

Disney Couture de Force

انا ماخذ رابونزال + اريل من هالماركة

[ يونيو 26, 2016, 12:37 PM: تم تحرير المشاركه من قبل: Orphen ]

--------------------

المشاركات: 909 | تاريخ التسجيل: أبريل 2011 |

itunes_q8
عضو نشيط
رقم العضويه 91724

This user is from Kuwait

مرسله في

امازون فيها شغلات حلوه

--------------------

المشاركات: 547 | من: Kuwait | تاريخ التسجيل: أبريل 2015 |

// BanDar //
عضو فعال جدا
رقم العضويه 87745

This user is from Kuwait

مرسله في

أخيراااااااا شفته [dancer]

ممتع عالآخرررررر , واحلى من الاول بكثيرر

مغامرات وحماس روعه وحبيت اكثر شي الاخطبوط هانك [eyelove]

--------------------

المشاركات: 14384 | من: k.u.w.a.i.t | تاريخ التسجيل: فبراير 2009 |

itunes_q8
عضو نشيط
رقم العضويه 91724

This user is from Kuwait

مرسله في

انا مخلي Dory حق العيد علشان استمتع فيه بوضح النهار مع البوبكورن و ادوات السمنه في صالة السينما الباردة

--------------------

المشاركات: 547 | من: Kuwait | تاريخ التسجيل: أبريل 2015 |

A M I R
عضو نشيط جدا
رقم العضويه 90355

This user is from Saudi Arabia

مرسله في

رد مقتبس:
المرسل الأصلي هو itunes_q8:
البوبكورن و ادوات السمنه في صالة السينما الباردة

اي والله ما يحلالي الفيلم الا وانا ابلع

......

[eyelove]

احمد توني شفت المجسمات طلعت شايفها قبل في ديزني لاند بس طبعا مو الكل
المجموعة فخممممة وطريقة تنفيذها وتفاصيلها تجنن

واهنيك على ايزميرالدا بصراحة تحفة

--------------------

المشاركات: 1978 | من: K.S.A - Jeddah | تاريخ التسجيل: أغسطس 2011 |

[ L.O.V.E.R ]

سوبر مصمم
رقم العضويه 3004

This user is from Quatar

مرسله في

ميمو

فعلاً احدب نوتردام وهرقل مالهم منتجات وايد للاسف

لكن من فترة كنت حاط عيني على تمثال في ايباي وللحين ما اشتريته لكوازيمودو لما توجوه ملك الوحشين

شكله وتفاصيله جداً رهيبين [applause]

click here

--------------------

المشاركات: 27179 | من: ~ NeverlanD ~ | تاريخ التسجيل: يوليو 2002 |

[ L.O.V.E.R ]

سوبر مصمم
رقم العضويه 3004

This user is from Quatar

مرسله في

شباب بخصوص التماثيل

قولوا حق احمد يوريكم غرفته بس .. ماشاءالله ولا كهف العجائب

عنده مجموعة من افخم ماشفت لتماثيل ديزني

.......

عن نفسي ما افضل التماثيل اللي فيها تفلسف وتفاصيل اضافية وزحمة وبعيده عن الشكل الاصلي للشخصية

ورود وكاروهات وسباركل ومادري شنو

مثل مجموعة Jim Shore

احب لما اخذ تمثال يكون نسخة صادقة للشخصية مثل ماشفناها بالفيلم [heartpump]

بحط لكم التوب 3 بالنسبة لي من الاقل للافضل

مجموعة WDCC

اتوقع كل الفانز متفقين على روعة تماثيل هالمجموعة ..

المميز بهالخط انهم ماخذين اشهر المشاهد الايقونية بافلام ديزني لكل شخصية وعاملين عليها تمثال تفاصيله مبهره بالنسبة لحجمه ..

مشهد اغنية دنيا فوق .. من اندر واغلى تماثيل هالمجموعة

مشهد رويلا وهي تتكلم بالتليفون .. من اكثر التماثيل اللي نفسي فيهم ..

مجموعة Kevin and Jody

كيفن وجودي صديقين اشتغلوا مع بعض بشركة ديزني وكانوا مسؤولين عن تصاميم بعض الاشياء في حدايق ديزني .. اللي يميز شغلهم هو جودة التصنيع + فخامة الالوان + تطابق تماثيلهم مع اشكال الشخصيات الاصلية من غير اضافات وتفلسف + احجام التماثيل العملاقه << وهذي اهم نقطة تميزهم .. ديزني من 10 سنوات تقريباً وقفت تصنيع البيق فيجرز بسبب تكلفتهم العالية ولصعوبة شحنهم وضمان وصولهم بشكل سليم .. عشان كذا مجموعة هالاثنين تعتبر اليوم بمثابة كنز حقيقي لاي هاوي تجميع لتمايل ديزني ..

تمثال لايف سايز لتود [eyelove]

تود من الشخصيات اللي نادر ماديزني تنزل شي عنه .. فمابالكم لما فجأة ينزل له تمثال بهالاتقان والجودة الرهيبه وفوق هذا بحجمة الحقيقي؟ شي ولا بالاحلام!! من اكثر القطع اللي فرحت لما لقيتها على ايباي قبل فتره ..

شايفين دقة ونعومة النحت والتلوين؟ شي خرافه!!

كأنهم طالعين فعلاً من فيلم سنووايت!!

خجلان اشتريت واحد منه بحالة جديدة ومع كرتونه وشهادة الاصالة الخاصة فيه

شكله عالطبيعة احلى من الصورة بعد .. وحجمة جداً كبير [heartpump]

بس المشكلة رموشه وايد دقيقين .. اخاف ينكسرون .. عالعموم جرأة منهم يصممون رموش واقعية بدل لا يرسمونها بخط اسود عالوجه وخلاص

بس اللي طلع عيوني وانا ابحث عنه هو هالتمثال!!

تمثال بينوكيو لحظة تحوله لحمار

اكثر تمثال تعبني بحياتي .. انجنيت على جماله وفخامته اول ماشفت صورته بالنت [heartpump]

جداً حبيت انهم ماخذين اشهر لحظة ايقونية بالفيلم!!

جمال النحت والتلوين بهالتمثال بدون مبالغة ما مر علي بحياتي كلها .. والله العظيم كانه رسم!! .. هالتمثال يعتبر من اندر تماثيل مجموعتهم واكثر واحد الناس تدوره .. اول مانزل بايباي دخلت بمزايدة شرسه لحد مافزت فيه

شكله كيوت وحجم التمثال كبير وقريب لحجم بينوكيو الطبيعي بالفيلم

الفيونكه اللي برقبته من قماش حقيقي .. والقاعدة اللي واقف عليها ضخمة وثقيلة .. تحفة فنية بكل معنى الكلمة [eyelove]

عندهم بعد كذا تمثال روعه ..

على فكره هم اللي صمموا بعد كتب الريبليكا لسنووايت وسندريلا والاميرة النائمة

باقي شغلهم تلقونه على صفحتهم بفلكر ..

مجموعة Giuseppe Armani

على الرغم من اني متعصب جداً لفكرة التصميم المطابق لشكل الشخصيات مثل ماظهرت بالفيلم الا ان مع مجموعة ارماني هالموضوع يعتبر استثناء بالنسبة لي .. ليش؟ .. لان تماثيل هالمجموعة تكاد تكون اكثر تماثيل شفتها بحياتي ابداع وروعة وفخامة .. تصاميم ارماني مايله للواقعية مع مزيج ساحر من نمط تماثيل عصر النهضه الايطالية .. يعني تخيلوا لو مايكل انجلو صحى من قبره وصمم تماثيل لشخصيات ديزني تتوقعون شلون بتكون النتيجة؟ ما اقدر اتخيل شي بعيد عن تماثيل ارماني!!

جد جد تماثيله من كثر الاتقان والفخامة اللي فيها تحسون انها تنبض بالحياة .. شوي وتتكلم وتتحرك ..

وعلى فكرة تكنيك الالوان اللي يستخدمه يعتبر من اصعب التقنيات .. قريت مره ان هالتقنية من شدة صعوبتها تحتاج لدراسة جامعية وشهادة بكالوريوس خاصة فيها عشان يتم اعتماد الفنانين الخاصين بتلوين هالتماثيل .. متخيلين تعقيد الموضوع؟! يعني انتو ماراح تمتلكون تمثال عادي والسلام .. راح يكون بيدكم قطعة فنية نفيسه ممكن تجيب لكم اضعاف سعرها مع الوقت ..

ارماني كان ينحت تماثيل لديزني من السبعينات لحد ماتوفى في 2006 .. وكل تماثيله تنباع اليوم باسعار فلكية مقارنة بباقي تماثيل ديزني على ايباي .. جاني هوس بتجميع تماثيله قبل سنه بشكل ماتتخيلونه لحد مافلست .. لكن والله مو خسارة فيهم ابداً ابداً .. شي يخلي العين ترتاح [heartpump]

من اروع التماثيل اللي سواها هالبني ادم تمثال شفق من فيلم الاميرة النائمة

نظرة قريبة على تفاصيل نحت وتلوين الوجه [heartpump]

الاميرة ياسمين مع نمرها راجا [eyelove]

هالتمثال من كثر ما ابهرني اشتريت منه قطعة ثانية!! لا تسألوني ليش @@ بس كذا !! .. مع انه لمتد ومافي غير كم قطعة متوفرة للبيع واسعاره حريقه .. لكن ماقدرت اشوف هالجمال واشتري منه حبه وحده بس ..

تمثال الجميلة والوحش .. قمة بالفخامة [heartpump]

سنووايت ودقدق [eyelove]

لاحظوا ملابسها شلون منحوته .. كأنها قطعة قماش رقيقه لاصقه بجسمها فعلاً @@

اما التلوين والظلال حكاية ثانية

الحب بينوكيو [heartpump]

شوفوا شلون التلوين معطه احساس حقيقي .. حتى جبيتو طالع رهيب!!

صرت مجمع تقريباً فوق ال 12 تمثال لهم ومستمر ..

[ يونيو 27, 2016, 05:51 PM: تم تحرير المشاركه من قبل: [ L.O.V.E.R ] ]

--------------------

المشاركات: 27179 | من: ~ NeverlanD ~ | تاريخ التسجيل: يوليو 2002 |

[ L.O.V.E.R ]

سوبر مصمم
رقم العضويه 3004

This user is from Quatar

مرسله في

رد مقتبس:
المرسل الأصلي هو itunes_q8:
انا مخلي Dory حق العيد علشان استمتع فيه بوضح النهار مع البوبكورن و ادوات السمنه في صالة السينما الباردة

والله الحماس طاق ألف عندي

اذا عرضوه هالخميس بروح اشوفه بعد الفطور واكرر تجربة مشاهدتي لبريف لما انعرض برمضان [heartpump]

لها طعم الافلام اللي تشوفها في السينما بهالشهر [Big Grin]

عاد يارب يطلع الفيلم بمستوى الاول

اكثر شي محمسني للفيلم هو بدايته لما يطلعون لنا مشاهد دوري وهي صغيرة [kiss]

معقوله في شي كيوووت لهالدرجة؟!

قاعد اقرا ردود الفانز حول الفيلم

يقولون صح ان الفيلم مو بمستوى الاول لكنه غير نظرتهم لدوري 180 درجة لما رجعوا وشافوا الجزء الاول

تعاطفوا اكثر واكثر معاها ..

خصوصاً بالمشهد اللي تقول فيه لمرهف انها لما تكون معاه تحس بالامان

وان محد ضل وياها لفترة طويلة من قبل مثله [Frown]

الفيلم راح يخلينا نشوف دوري ومعاناتها مع موضوع الذاكرة المؤقته من وهي طفلة ..

--------------------

المشاركات: 27179 | من: ~ NeverlanD ~ | تاريخ التسجيل: يوليو 2002 |

itunes_q8
عضو نشيط
رقم العضويه 91724

This user is from Kuwait

مرسله في

ناصر

روعه رووووعه التماثيل الله يهنيك فيهم .. انا ترا ماسك نفسي مابي افتح على روحي باب بالتشري من ايباي و هالمواقع لأن لو بشتري بفلس و بترس غرفتي من تماثيل ديزني

بخصوص دوري .. ودي اجرب اشوفه برمضان مثلك لكن شركة السينما عندنا مخلينه حق العيد + في العشر الاواخر من رمضان تتسكر السينمات عندنا بالكويت احتراما لهالايام المباركه الله يعودها علينا و عليكم ان شاء الله

----------------

يبت لكم بعض الصور الجديدة من ديزني شنغهاي

--------------------

المشاركات: 547 | من: Kuwait | تاريخ التسجيل: أبريل 2015 |

[ L.O.V.E.R ]

سوبر مصمم
رقم العضويه 3004

This user is from Quatar

مرسله في

اي والله نصيحه ايتونز الموضوع ترى ادمان

حط في بالك اذا عتبت عالم تجميع الفيجرز ماراح تطلع منه بسهوله الا وكل راتبك طاير بنص الشهر

وفوق هذا اذا ماعندك مكان راح تتوهق فيهم

السنه اللي فاتت من كثر التماثيل اللي وصلتني حطيتهم بكراتينهم بنص الصاله لحد ماتراكموا فوق بعض

لين ماجاتني امي تصيح تقولي ضااااق صدري من منظر الكراتين لول تصرف شيلهم ولا بحذفهم انا

بس المشكله ان في اشياء نادره تنزل ومرات بأسعار مجنونه وحلوه وودك ماتفرط فيها عشان ماتندم بعدين

المهم بعد ماقعدنا انا وامي نفتح الكراتين عشان نرتب البيت من العفسه اللي صارت

ماقدرت تتحمل جمال تحف ارماني وخذت نصهم [Razz]

حلاتين على اللي جايبه قشها معاها [Big Grin]

مادري ليش ايتونز احس ديزني شنغهاي مقارنه بغيرها جداً باهته وحتى افتتاحها باهت [thinking]

--------------------

المشاركات: 27179 | من: ~ NeverlanD ~ | تاريخ التسجيل: يوليو 2002 |

[ L.O.V.E.R ]

سوبر مصمم
رقم العضويه 3004

This user is from Quatar

مرسله في

Life, Animated

رد مقتبس:
في نهاية هذا العام يقدم لنا المخرج الحائز على جائزة الأوسكار فيلماً وثائقياً مؤثراً يسرد حكاية الشاب أوين، والذي شخص عندما كان بسن الثالثة بإصابته بالتوحد، الى أن اكتشف أوين وسيلة فريدة للتغلب على إصابته وذلك من خلال مشاهدة أفلام ديزني الرسومية، والتي ساعدته في التعبير عن نفسه والتواصل مع العالم الخارجي، لتصبح أفلام مثل "حورية البحر" و "بيتر بان" بالنسبة له بمثابة لغة خاصة للتعبير عن مشاعره.

.........

التريلر عامل له شير المنتج دون هان [eyelove]

جداً متحمس اشوفه ..

والله ماكان يطلعني من عالمي وانا صغير غير افلام ديزني [heartpump]

تأثري فيها احس انه انعكس على حياتي بشكل ايجابي بعد ماكبرت في كل شي

صرت اشوف والمس الجمال حتى في ذرة التراب

صرت مؤمن اكثر بالمعجزات

صرت احب اتعرف على ثقافات كل بلد واشوف هالاماكن اللي خذتنا لها ديزني بأفلامها

صرت اكثر جرأه بتقبل المختلف واحب اعيش بينهم

مثل اريل وحبها انها تعيش بين البشر

صرت اشوف ان مافي شي اسمه مستحيل

انتو متخيلين اني كنت بيوم من الايام افكر بمستقبلي بعد ماخلصت الثانوية وكنت افكر جدياً ادخل ترشيحه

مع ان هالطريق ابدااااً مو صوبي

بس عشان مولان؟! لول

كنت اقول لصاحبي اذا مولان قدرت تحقق ذاتها وهي بنت وتدخل العسكرية وتثبت نفسها انا في شنو اقل منها [Mad]

وكنت اقول هالشي وانا مؤمن ومصدق كلامي

وهو يقول انت من صجك؟؟ اكيد انجنيت تقارن نفسك بشخصية كارتون!!

هالشخصيات وقصصها وافلامها كانت ومازالت نماذج تدفعني فعلاً بحياتي

وكان اخر همي شنو الناس تقول عني

جد جد افلام ديزني ما اشوفها مجرد رسومات تتحرك وخلاص [eyelove]

[ يونيو 28, 2016, 01:16 PM: تم تحرير المشاركه من قبل: [ L.O.V.E.R ] ]

--------------------

المشاركات: 27179 | من: ~ NeverlanD ~ | تاريخ التسجيل: يوليو 2002 |

الموضوع متكون من صفحات: 1 2 3 ... 59 60 61 62 63 64 65 ... 161 162 163