حتى انا رجعت البيت ونمت على 2 ونص .. بس ماندمت طبعاً .. استمتعت بوقتي وحسيت اني عشت بحلم
البريمير عندنا كان فــــل من اول كرسي لاخر كرسي .. شي مستغرب لان الفيلم انعرض بدون سابق انذار وماعرفنا عن موعد عرض البريمير الا قبلها بساعات قليله بس .. ومع ذلك الجمهور كان مثل النمل على قطعة السكر .. والاحلى ان في اجانب داخلين ومعاهم اطفال صغار لابسين تيجان عليها قرون مالفسنت .. وبعض الشباب حاطين بخلفيات تليفوناتهم بوستر مالفسنت .. حماس الناس كلها كان واضح للفيلم ..
الفيلم انعرض على احلى شاشه .. شاشة الايماكس .. لكن لحد ينتظر الكثير من الثري دي .. لانه عادي وماحسيت فيه .. المتعه الحقيقية كانت بجودة وبحجم الشاشة اللي انعرض عليها ..
رايي ماراح يختلف كثير عن راي عليلو واحمد ..
الفيلم جداً جداً ممتع وماتمنيته يخلص بسرعه .. وماكنت متوقع ابداً انه يكون عميق لهالدرجة .. وهذا بنظري اللي رفع مكانة مالفسنت عن بقية الافلام اللي من نفس هالنوعيه .. مثل أوز وأليس وسنووايت والصياد .. وهو انه مش مجرد فيلم صيفي ممتع وخلاص .. ايضاً مليان روح وعاطفه ..
الواحد شنو ممكن يقول عن انجلينا؟ .. ممثلة عبقرية .. قدمت احد افضل الاداءات اللي شفتها بفيلم فيري تيل .. ضروري تترشح عالاقل للغولدن جلوب هالسنه عن مالفسنت .. قدمت الشخصية بروح جديدة وفيها تناقضات صعبة على اي ممثلة عادية انها تأديها .. مشهد بكائها بأول الفيلم رهيب ومؤثر وتستاهل الاوسكار عليه .. شعر جسمي كش من صراخها وألمها .. قبل كنت مقتنع ان مافي سبب يخلي مالفسنت تلقي لعنة بهالشر لطفلة ما اذنبت بحقها .. الحين وبعد ماشفت هالفيلم غيرت رايي تماماً واقتنعت ان ورا هاللعنة سبب جبار .. واختيارها للقبلة الحقيقية لابطال اللعنة وراه مغزى حقيقي .. لان هالنقطه هي اللي قست قلبها من الاساس .. فكانت حابه تشرب غيرها من نفس الكاس اللي شربت منه ..
الجزء الاول من الفيلم هو المفضل عندي .. وبعدين الجزء الثالث .. واخر شي الجزء الثاني اللي هو منتصف الفيلم ..
البنت اللي مثلت دور انجلينا وهي صغيرة تجنن وكانت مقنعه بالدور .. فانينغ كانت جيدة بدور ارورا مش اكثر .. اي بنت ثانية ممكن تسوي اللي سوته .. الممثل اللي لعب الملك ستيفان كان رهيب بعد وابدع بالدور .. خصوصاً لما وصل لمرحلة البارانويا وصار يهذي ويكلم نفسه بغرفة لوحدة .. وبنت انجلينا في احلى واكوت من جذي؟ لول .. شنو هالمخلوق البريء الكتكوت .. تيدي بير على شكل بنت .. وعرفت الحين ليش استعانوا فيها وبقية الاطفال خافوا لول .. لان في مشهد كانت لازم تمسكها مالفسنت بيدها وتشيلها ..
في مشاهد كثيره حلوه لكن عشان ما احرق عليكم الاحداث مضطر اذكر المشاهد اللي مافيها ضرر ..
مشهد القاء اللعنة هو مشهدي المفضل .. اللي نزلته ديزني عالنت عبارة عن مشهد مختصر .. بالفيلم راح تشوفون تفاصيل اكثر واحلى بألف مرة .. ماتفاجأت الا لما مالفسنت خلت الملك يركع .. قاعة السينما كانت بهاللحظه هدووووء واعصابهم مشدوده .. شنو هالقوه والجبروت من مالفسنت؟ تخيلوا بس .. خلت الملك يركع لها ويذل نفسه امام شعبه .. وبالاخير سحبت عليه السيفون بطريقة حقيرة وحرقت قلبه ..
وحبيت بعد مشهد تحول مالفسنت .. كان روعه .. وكل مشاهدها وهي صغيرة كانت تجنن بعد .. واكثر مشهد ضحكني لما ارورا تتكلم ومشتطه وفجأة مالفسنت تنومها خخ .. الكل ضحك .. وطبعاً المعركة الاخيرة انواع الحماس والاثارة ..
الجنيات الثلاث دورهم كان عادي وكان ممكن يكون افضل من كذا .. وجودهم وعدمهم واحد .. لكن حلو انهم التزموا بحركاتهم وألوانهم من فيلم الانميشن ..
وعلى فكرة حبيت ان الفيلم ابتدا بصوت وحده تروي القصة وكان ياما كان .. حسيت ان هالشي ربط الفيلم من اول لحظه بفيلم ديزني القديم ورجعنا لطفولتنا .. كانت لمسه حلوه منهم .. والصدمه هي بنهاية الفيلم لما تعرفون من هي صاحبة هالصوت .. لول ماتوقعت
طبعاً القصة مالها علاقه بالقصة اللي شفناها بفيلم الاميرة النائمة الانميشن من ديزني .. ضايفين تحولات جديدة غير متوقعة .. وعاملين ريفريش للفيري تيل المعروف .. ما تضايقت من هالنقطه لاني حاط ببالي اني داخل اشوف تويست جديد واستمتع عشان لا ادخل بداومة المقارنات واعور راسي .. كل اللي خذوه بس من الفيلم الكلاسيكي هي اسماء واشكال الشخصيات وبعض الجزئيات الصغيرة بحكم ان ديزني هي منتجة الفلمين ..
وبخصوص المؤثرات .. كانت سيدة العمل بهالفيلم .. اجمل مرة تظهر فيها المؤثرات البصرية بفيلم سينمائي على الاطلاق .. شفتوا روعة وجودة مؤثرات بيتر جاكسون بالهوبيت؟ هنا المؤثرات طالعه بنفس المستوى اذا مش افضل .. الوادي اللي عايشة فيه مالفسنت ياخذ العقل .. كنت اقول لنفسي وانا منسحر بهالمشاهد كيف ممكن تكون الجنه نفسها اذا هالمناظر اللي مايتخيلها عقل صمموها مجموعة من الفنانين!!
اما الاخراج الفني مافي كلمة تعطيه حقه .. فخم فخم فخم
السلبيات .. الفيلم قصير .. وفي حلقات مفقودة بالبناء الدرامي للفيلم ومشاهد كثير ناقصه .. انا من النوع اللي قليل مايركز على طريقة تسلسل الاحداث ونادر ما الاحظ العيوب والنقص .. بس مع مالفسنت ماقدرت الا اني انتبه لهالعيب لانه واضح مثل الشمس .. والغريب ان لو فيلم ثاني غير مالفسنت انوجدت فيه مثل هالمشكله القاتله كان الفيلم كله تدمر .. لكن هنا الوضع مختلف .. بالرغم من كل النواقص اللي فيه الفيلم مشى بطريقه جميلة .. واستطاع انه يسرقني ويحول نظري لاشياء ثانية اقوى .. اهم هالاشياء وجود انجلينا ..
الموسيقى التصويريه بطله ومن اجمل ماسمعت .. الموسيقى هنا تتكلم وتخاطب المشاهد وتحكيله قصة .. عكس الموسيقى مثلاً بفيلم فروزن اللي ماتقولك شي عن الفيلم وتحس بجمود معاها وعجزت انها تشكل اضافه .. الموسيقى عنصر مهم ولما تنعمل بشكل جيد ممكن انها تدفع العمل لاقصى درجات الجنون والابداع .. مثل ماصار مع فيلم آب .. الموسيقى كانت اهم عامل بنجاحه خصوصاً بمشهد زواج كارل بإيلي .. الموسيقى هنا مثلاً تروي حكاية للمشاهد وكانت تمثل صوت وروح الشخصيات حتى من غير مايتكلمون .. وفيلم ذا آرتست نفس الشي .. الموسيقى في مالفسنت كانت ابداع وساعدت المشاهد انه يفهم تحولات مالفسنت النفسيه من مرحلة الى مرحلة ..
بإختصار الفيلم ممتع وصيفي جداً وراح تستمتعون بكل دقيقه فيه .. وانجلينا بالنسبة لي قدمت واحد من افضل الادوار بمسيرتها جنباً الى جنب دورها في جيرل انترابتد وشانجلينج .. مش لانها ابدعت بس بتمثيل الشخصيه .. لانها بعد ساهمت بكل تفصيلة صغيرة تتعلق فيها مثل لون عيونها والقرون ونبرة الصوت .. مثل ما سوى بالضبط جوني ديب بشخصية جاك سبارو ..
صح وقبل ما انسى لول .. طريقة ظهور شعار قلعة ديزني ببداية الفيلم روعه .. راح تشوفون لمسه حلوه وجديدة
[ مايو 29, 2014, 01:20 PM: تم تحرير المشاركه من قبل: [ L.O.V.E.R ] ]
--------------------
المشاركات: 27170 | من: ~ NeverlanD ~ | تاريخ التسجيل: يوليو 2002
|