شفت الفيلم الامس بالليل .. حسيت اني محتاج اصبر شوي لليوم الثاني قبل لا اتكلم عنه
* الرد مايحتوي على اي حرق للاحداث *
زوتوبيا فاق كل توقعاتي اللي كنت بانيها من المراجعات الايجابية اللي نزلت .. اللي ماشاف الفيلم اقوله استعد لان بإنتظارك قطعة سينمائية فاخرة وممتعة ومافيها لحظة ملل وحده .. زوتوبيا بدون مبالغة اعتبرة اذكى فيلم انميشن شفته من سنوات طويلة .. ذكي من ناحية بناء الشخصيات وتطورها من حال لحال خصوصاً بطلين الفيلم .. ذكي من ناحية القاء النكت ومتى تنقال .. ذكي من ناحية البناء الدرامي وطرح فكرة بوليسية ناضجة ومحكمة وذكية مانشوفها الا بالاعمال الموجهه للكبار .. ذكي من ناحية اختيار مواضيع حساسه وجريئة وصعب ان يتم تناولها بفيلم لايف اكشن مثل العنصرية العرقية فمابالكم فيلم انميشن ولديزني ..
فيلم عميق ومؤثر ويتعامل مع الشخصيات وكأنها شخصيات حقيقية نشوفها بالحياة الواقعية تخطئ وتصيب ممكن تحبها وفي لحظه تزعل منها .. الشخصيات هنا طالعه مش ملائكية ولها اخطائها خصوصاً بطلة الفيلم جودي ..
ومع اني ماحبيت كثير الشرير الخاص بالفيلم .. بس لازم اعترف واقول ان هذا افضل شرير متخفي ظهر بكل افلام ديزني .. صج صج انصدمت وماتوقعت لما كشفوا عن هويته الحقيقية .. يمكن لاني توقعت اني بكون ذكي كفاية عشان اكشفه .. لكن طلعت متحري فاشل مع مرتبة الشرف .. تمنيت بس انهم لو اشتغلوا اكثر على ابعاد الشخصية وعطوه اسباب مقنعه اكثر .. لكن عادي هالنقطة ما اثرت وايد على مستوى الفيلم ..
واتفق مع ماجد ان غزال من اجمل شخصيات الفيلم وخسارة ان ماعطوها مساحة اكبر .. ناعمة وطيبة وتنبذ العنصرية ومثال رائع لفانزها في زوتوبيا عشان يقتدون فيها ..
جودي هوبس نجمة الفيلم الحقيقية والشخصية الافضل واللي مستحيل يطلع المشاهد من الفيلم من غير مايحبها .. تحمل كل الصفات الرائعة لاميرات ديزني .. كتلة صغيرة من الفرو مليانة امل وتفاؤل وسعادة .. احس اني بالمستقبل لو كنت متحطم او زعلان وشغلت فيلم زتوبيا وشفت جودي لمدة خمس دقايق عادي انشحن مره ثانية بالطاقة واحس ان كل المصاعب اللي امر فيها سهله ولها حل .. جودي من هالشخصيات اللي تخليك تبتسم وتحس ان الحياة وردية وحلوة بالرغم من كل المصاعب اللي فيها ..
اما نك وايلد فهو مفاجأة الفيلم .. ثعلب ذكي ومحتال ومحد يقدر عليه .. لكن ورا هالشكل الجذاب ماضي حزين ويعور القلب وهو اللي شكل شخصيته في الحاضر ..
جداً حبيت مشاهدهم مع بعض هو وجودي .. وفي مشهد راااائع بينهم ماقدر اقوله عشان لا احرق عليكم لكن صج حسيت بمشاعر دافيه وكنت لاشعورياً ابتسم وفرحان معاهم .. من اروع الثنائيات اللي شفتها بافلام ديزني
الانميشن هنا خارق وفوق العادة خصوصاً مدينة زوتوبيا نفسها وطريقة تقسيم المناطق اللي تعيش فيها الحيوانات بمختلف انواعها واحجامها .. وعلى ان المدينة كانت مبهره بكل معنى الكلمة الا ان المكان المفضل عندي واللي من جد كنت استانس لما ننتقل هناك هي مشاهد القرية اللي تعيش فيها جودي .. خاطري اخذ اجازة واعيش في مكان ريفي يشبه قريتها .. مكان يفتح النفس واحس اني اشم ريحة هوى عليل حتى وانا قاعد بالسينما واتابع ..
طريقة تحريك الحيوانات احس احتاج منهم مجهود شاق لان كل حيوان له طريقة سير مختلفة مو مثل الشخصيات الادمية اللي تتحرك بنفس الطريقة .. الارنب يمشي بشكل مختلف والثعلب والاسد وغيرهم بشكل مختلف .. احس صج الرسامين تعبوا على هالتفصيله الصغيرة اللي احنا يمكن ماننتبه لها لكنها تلعب دور كبير بطريقة تصديقنا لهالشخصيات ..
الموسيقى التصويرية جداً كيوت وذكية وفي مشاهد كانت تلعب دور مهم بالاحداث عشان تدخلنا جو فيها مثل مشاهد ملاحقة الفهد .. وهذا اول عمل لديزني انميشن يشتغل عليه الملحن المفضل عندي من بيكسار مايكل جوكينو .. ترك بصمه حلوة وكيوت ومقاربه لجو اعماله السابقة اللي قدمها من خلال اب وانسايد اوت ..
الاكشن بالفيلم قوي ويحبس الانفاس وفي لحظات رهيبه تحس ان خلاص راحت عليهم لكن فجأة يطلع الحل بطريقة ذكية .. ومت من الضحك على مشاهد فيلم ذا جاد فاذر .. حبيت طريقة اقتباسهم منه
في النهاية زوتوبيا فيلم جداً ممتع وساحر .. ومع انه جديد تماماً على ديزني الا انه يحمل كل العناصر الكلاسيكية اللي حبيناها بالافلام السابقة .. كل شي متوظف هنا بشكل مختلف وغير روتيني .. خصوصاً شعار مدينة زوتوبيا .. اي واحد بإمكانه يكون اي شي هو يتمناه .. حسيت الفكرة مقاربة لاغنية when you wish upon a star .. اذا بامكاني اصنف افلام ديزني من ناحية افلام الحيوانات فزوتوبيا راح يجي بالقمة بمحاذاة افضل 3 افلام تدور عنهم .. مع الاسد الملك وبامبي ودمبو ..
[ مارس 05, 2016, 08:56 AM: تم تحرير المشاركه من قبل: [ L.O.V.E.R ] ]
--------------------
المشاركات: 27170 | من: ~ NeverlanD ~ | تاريخ التسجيل: يوليو 2002
|
من جد من جد استمتعت بكل حرف وبكل سطر كتبته والحين عداد الحماس عندي فووووووق ماتتخيل بس كان عبالي بتآجل الفيلم لبعدين ماتوقعت تشوفه بهالسرعة لووول
حاليا عندي شعور نفس اللي كنت احسه بالافلام القديمة لما انتظر لحظة اني اشوفها وماتوقعت هالشي يصير معاي تحديدا مع زوتوبيا !!! اخر مرة حسيت فيه ايام رابونزل ، كنت اعد الايام والليالي عشان اشوفه وكانت من اجمل اللحظات عندي والحمد لله الحين قاعد يصير نفس الشي مع زوتوبيا
بغض النظر عن نجاح الفيلم ، عندي سوال صغيرون
هل لو كان الفيلم غنائي يعني نفس فروزن و رابونزل كان بيطلع احلى ؟!
--------------------
المشاركات: 1978 | من: K.S.A - Jeddah | تاريخ التسجيل: أغسطس 2011
|
يعطيك العافية ناصر على المراجعة ماشاءالله عليك ما خليت شي إلا وتكلمت عنه
----------------------------------
هلا والله داحم لا والله مب ساحب ولا شي الفلم بيبدأ عندنا اليوم الساعة ١٢ الا ربع اخر الليل بتوقيت المانيا يعني عندكم اتوقع الساعة ٣ الا ربع، وطبعاً هالوقت انتوا نايمين وبعد راح ادخله مره ثانية باجر الصبح إن شاء الله لأن السينما الصبح له طعم ثاني بالنسبة لي فإن شاء الله باجر اعطيكم رأيي عن زومانيا "الاسم الألماني" الله يوفقك في اختباراتك ويبشرك بالنتيجة العالية إن شاء الله
[ مارس 05, 2016, 01:24 PM: تم تحرير المشاركه من قبل: ديزناوي ]
--------------------
المشاركات: 161 | من: الإمـارات العـربيـة المـتــحــدة | تاريخ التسجيل: أغسطس 2014
|
مرسله في
بندر!! صارلك 20 سنه بالمنتدى وللحين ماتعرف تحط الصور الكبيرة شلون؟ عفست الموضوع الله يهداك حطهم بالكود الي يصغر الصورة
المشاركات: 44721 | من: الـكـويـت | تاريخ التسجيل: أكتوبر 2003
|
بعد المشاهدة الثانية لزوتروبولس . . احب اقول اني ناوي اشوفه للمرة الثالثة
بكل اختصار زوتروبولس واحدة من افضل افلام الانيميشن اللي شفتها بحياتي قصة الفيلم جديدة ومبتكرة ما نشوفها وايد في افلام الانيميشن وهذا اللي يميزه صح ان ديزني قدمت وايد افلام فيها عبر عن الاصرار والتحدي وان كل واحد يقدر يكون اللي يتمناه لكن بـ زوتوبيا الامر مختلف وفيها شوية واقعية بالضبط مثل ما قال ناصر ان لكل شخصية لها تصرفات خاطئة ومب ملائكية. واتفق معاه ان الشرير اللي في الفيلم هو افضل شرير متخفي وفعلاً انصدمت اول ما ظهر على حقيقته وانا اتوقع انكم انتوا ما راح تتوقعون الشرير الا بعد ما يكشف عن نفسه بالاخير.
تصميم مدينة زوتروبوليس خياااالي من الصحارى للثلوج للغابات الاستوائية وغيرها وكذلك المدينة الصغيرة وسكانها القوارض مثل الفيران ولكل فصيلة حيوان لها اماكنها واجهزتها وسياراتها وبيوتها. استغرب من المخرجين كيف ومن وين يابوا كل هالخيال وحطوه في الفيلم. لكن اللي ما عجبني انهم مركزين على حيوانات معنية مثلاً الفيلة ووحيد القرن والدببة القطبية تلاقيهم بكثرة في المدينة بس بغض النظر عن هالشي لا تزال المدينة وايد متعوب عليها من المباني وحركة الحيوانات وتعايشهم مع بعض في مدينة وحدة. مشاهد الاكشن والمطاردات جداً قوية والموسيقى تلعب دور بهالمشاهد مثل ما قال ناصر
شخصية غزال من اجمل شخصيات الفلم بالضبط مثل ما قالوا مايد وناصر بس للاسف ما طلعت وايد. جودي ونك من افضل الثنائيات واصنفهم في التوب فايف عندي، بالرغم من اختلاف فصائلهم الا انهم يشكلون ثنائي عبقري. ومثل ما قال ماجد عن تطور شخصية نك واللي خلته يطلع بهذا الشكل اللي شفناه في الفيلم وكذلك الصداقة اللي بينه وبين جودي. بصراحة انا ودي اشوفهم مرة ثانية بسيكولز ولا مسلسل او شورت فيلم ع الاقل لان نقدر نشوف هذا الثنائي بمغامرات اخرى والاهم من هذا ان مدينة زوتروبوليس لازم يتعمقون فيها وبتفاصيها اكثر وخصوصاً تضاريسها المختلفة تسمحلهم انهم يطلعون منها الف قصة.
بإختصار الفيلم رائع وقوي جداً فوق ما كنت اتصور وانا اسحب كل كلمه قلتها اول ما اعلنوا عنه كـ فلم عن حيوانات وبطولة حيوانات وقتها حسيته انه شي غبي لكن طلع من افضل الافلام اللي فعلاً استانست فيها واللي ما اتمنيت انها تخلص وصدقوني راح تستمعون بكل دقيقة وعن نفسي خلاص قررت ادخله للمرة الثالثة وهالشي نادراً ما اسويه مع افلام السينما بإستثناء فيلم اوتيل ترانسلفانيا ٢ اول ما انعرض عندنا مدبلج في السينما دخلته ٣ مرات، مب مصدق اني داخل فيلم انيميشن مدبلج في السينما . زوتروبولس اعتبره من الكلاسيكيات التوب ١٠ عندي واقدر اقول انه افضل فيلم كلاسيكي لديزني من بداية الالفية. (بإستثناء افلام الفيري تيلز)
المهم يلا قوموا واحجزوا تذاكركم اليوم قبل باجر ولا تطوفكم المغامرة اللي تجمع نك وجودي ولا يطوفكم جمال تضاريس زوتروبولس ولا يطوفكم الشرير بهذا الفلم اللي مستحيل تكتشفونه الا بعد ما يكشفلكم عن نفسه ولا تطوفكم مشاهد الاكشن اللي تحبس الانفاس. بكل اختصار راح تكونون بموعد مع احدث كلاسيكيات ديزني اللي كسرت كل التوقعات وفاقت كل المقاييس ومثل ما قال ناصر تحفة سينمائية.
--------------------
المشاركات: 161 | من: الإمـارات العـربيـة المـتــحــدة | تاريخ التسجيل: أغسطس 2014
|
إرسال هذه الصفحه لصديق!
لطباعه هذا الموضوع
![الملف الشخصي لـ [ L.O.V.E.R ]](http://salmiyaforum.net/ubb/profile_ubb6.gif)
![[eyelove]](graemlins/eyelove.gif)
![[heartpump]](graemlins/heartpump.gif)
![[Big Grin]](biggrin.gif)
![[rofl]](graemlins/rofl.gif)
![[Eek!]](eek.gif)
![[cleverman]](graemlins/cleverman.gif)
![[crying]](graemlins/crying.gif)
![[iwantattention]](graemlins/iwantattention.gif)
![[nerd]](graemlins/nerd.gif)
![[rose]](graemlins/40.gif)
![[applause]](graemlins/applause.gif)
![[super]](graemlins/super.gif)
