توني طالع من الفيلم وواصل البيت، فقلت خلني أكتب رايي على طول كون إن مشاعري وأحاسيسي تجاه الفيلم ممكن أترجمها بسهولة على هيئة كلمات مباشرة بعد شعوري فيها، شباب خلوني أبدأ كلامي وأقول الله يعينكم على ويوهكم بالفيلم أنا عن نفسي من شفت شعار ديزني وسمعت الموسيقى اللي بدأ فيها الفيلم والإبتسامة عندي واصلة حدها أقوى شيء لحد ماخلص الفيلم، والله جد ماتمصخر وياكم الفيلم من جماله وحلاوته والأنيميشن اللي فيه يخليكم مبتسمين لا إرادياً إلا لو حد كلمكم بالفيلم من اللي حواليكم بتدركون هالشيء لول وبتقولون معقولة كنت أبتسم لإن لو حد خرب عليكم بتحسون فإبتسامتكم وهي تنضغط وتنكمش وتختفي.
الفيلم بكل بساطة فيه أغلب الأشياء اللي أي فان لديزني ممكن يحبها ويفكر بوجودها بأفلام ديزني وفي أشياء بنفس الوقت ناقصة لكن هالشيء أبداً مابيأثر على متعتكم بالفيلم، ومن الأشياء اللي فعلاً أبهرتني هي البحر والأنيميشن اللي قاعدين نشوفه بالفيلم، صح إن قلبنا معورنا عشان فقدان التودي بأفلام ديزني لكن لما ديزني قررت تتوجه للثري دي حالها حال باقي شركات الأنيميشن، ماكتفت بالتوجه له، لكنها فيلم عن فيلم تثبت لنا إنها الأفضل وهالشيء يبين مع كل فيلم نشوفه والتطور اللي يقدمونه لهالتقنية اللي اكتسحت أفلام الأنيميشن ككل ، شيء قسم بالله يفتح النفس وتحسون بريحة البحر فقاعة السينما ، هذا غير شعر موانا ولما يتبلل فالماي ترى هالتقنية المستخدمة فالشعر جداً صعبة، وحتى قبل لما دخلنا لعصر أفلام الثري الدي الأنيميشن ما كانوا يقدرون يتحكمون بالشعر وحركته وكانت من أكثر الأشياء اللي تواجهه الأنيميترز وقتها، حتى مرة ناصر عطاني موقع فيه بودكاساتات لأفلام ديزني وصناعتها وكانوا يتكلمون وقتها عن تقنية الشعر وقالوا دام الثري دي للحين مب عارفين يضبطون الشعر وحركته أفلام التو دي مازالت بأمان ومافي شيء ممكن يلغي وجودها بحكم إن التو دي بإمكانهم يسوون اللي بيسوونه بالشعر وأكبر مثال بوكاهونتاس وشعرها، لكن مع مرور الوقت ولما شافوا إن الشعر وتقنياته تطورت فالثري فقالوا خلاص رااااحت عالتو دي، مع إني حزين على هالشيء لكني فخور بديزني لإنها تثبت إنها إذا دخلت مجال معين تفرض نفسها فيه وماتكتفي بالموجود، لكنها تقدم تقنيات جديدة لأول مرة، وهالشيء مب غريب على ديزني هالأشياء موجودة من أيام المرحوم والت.
بالنسبة لأغاني الفيلم أنا سبق وطلبت الساوندتراك وصارلي أسبوع وأنا أسمعه وداخل جو بالفيلم وحبيت الأغاني من أول استماع وحسيت إن الأغاني كانت جداً مميزة رغم التكرار لأغنية هاو فار آيل غو فالأغاني اللاحقة بالألبوم واعتمادهم عليها، لكن لما جفت الفيلم اليوم وشفت هالأغاني تنبض للحياة بواقع الفيلم نفسه وضمن كيانه ككل، انبهرت وقلت هاذي ديزني ، تنفيذها كان رائع وفي أغنية منهم صراحة أثارتني ونزلت دمعة وحدة بس مني لول، الأغاني ستايلها برودواي عالآخر فعشان جيه ممكن ماتترك وايد أثر مع كل الناس أو المين ستريم بشكل أصح، أنا عن نفسي أحب الميوزيكالز وأحب الأغاني اللي تخدم الحدث بشكل حلو ولائق لكن أغنية مثل يور ولكم أحس إنها بتترك أثر مع الناس تخيلوا من يومين كنت فمحل أشتري أغراض وآخر شيء قلت للي محل ثانكيو وقالت لي يور ولكم ماجذب عليكم يلست أجوفها لوهلة وتذكرت الأغنية وعشان أبرر وقفتي قلت لها ثانكيو مرة ثانية وطلعت على طول لووول، الأغنية رووعة وكاتشي وأتوقع ممكن نشوفها تترشح فالأكاديمية عشان إييبي ذا روك عشان يغنيها عالمسرح ويكسبون مشاهدات لكن طبعاً أفضل أغنية موانا الأساسية عليها.
والحين أبا أتكلم عن قصة الفيلم نفسها، القصة حلوة وروعة وأي فان لديزني بتدخل لقلبه على طول قصة الأميرة المكافحة في طريقها في مكان ما ، لما تقرون كلامي بتقولون شيء عادي وتعودنا عليه وأنا معاكم بهالشيء، والفيلم ككل أغلب أحداثه بالبحر وشخصياته قليلة والتركيز أغلبه على ماوي وموانا وهم بالبحر يعني مانشوف شيء غير هالماي فكل مكان، تحسون إنه شيء ممل لكن الإخراج الرائع وتركيبة الشخصيات وبناءها على طول الفيلم أضاف كثير للفيلم وعطاه متعة رهيبة وعفكرة هاي نقطة قوية لصالح ديزني واللي اشتغلوا عالفيلم لإن لما تكون عندك قصة بسيطة ومافيها وايد شخصيات صعب تظل جاذب الناس للقصة طول الفيلم لكن هالفيلم سواها، وعفكرة هالشيء يخلي الناس يروحون ويقارنونه بفيلم رائع لديزني نزل هالسنة وهو زوتوبيا، فعلاً زوتوبيا فيلم راقي ويحاكي العقل والواقع قبل المتعة عكس موانا واللي هو فيلم ممتع بشكل أساسي وهالمبداً اللي قايم عليه بس لو نفكر فيها هالشيء ترى مايعتبر نقطة ضعف بالعكس هذاك شيء وهذا شيء ومثل مايد أنا ودي موانا يفوز بالأوسكارز لكن أشوف إن زوتوبيا يستاهل أكثر ، ياليتهم لو يكرمون كلاسيكات ديزني الإثنين لهالسنة مع بعض لإن فعلاً كل واحد منهم قدم شيء محترم وبتوجه مختلف وبالأوسكارز سبق وفازوا ممثلين بأفضل ممثل رئيسي أو بالأحرى ممثلات مثل باربرا ستاريسند وكاثرين هيبرن. بالنهاية أحب أقولكم بتشوفون عمل رائع وممتع ومغامرة ديزناوية جديدة مملوءة بالحيوية ، وشوفوه على هالمبدأ لإن لو رفعتوا سقف توقعاتكم وايد ممكن ماتستمعون ذاك الزود بالفيلم.
[ نوفمبر 25, 2016, 05:30 PM: تم تحرير المشاركه من قبل: {(Fabulous)} ]
يعطيك العافية على التقييم الرائع.. استمتعت وانا أقراه وتقريبا نفس انطباعي عن الفلم
أحمد .. يله ما عليه الغالي كلها كم يوم وبتشوفون الفلم ان شالله .. ما بقى شي
رد مقتبس:بس عندي سؤال اخير ومشترك لكم انتو الاثنين .. شنو تقيمكم للثلث الاخير من الفيلم؟
الناس ماعندها الا هالجزئية يتكلمون عنها .. الكل يمدحها ومبهور فيها
يقولون لو فاز الفيلم بالاوسكار على زوتوبيا بيكون عشان هالفصل
نهاية مرضية جدا ناصر للفلم و حماسية.. يمكن النقاد عجبتهم لأنه بعد الهدوء اللي في النص الثاني الأحداث تسارعت و لحقوا يحطون مشهد صراع رائع نهايته شوي غير اعتياديه + 3 أغاني أو أغنيتين ونص من أروع ما يكون ..
نتايج البوكس أوفيس بتطلع بعد شوي ...
-------------------- [ المشاركات: 7335 | من: الامارات | تاريخ التسجيل: يوليو 2003
|
مرسله في
بندر... هذي نتايج يوم واحد بس.. يوم الجمعه... نتايج الويكند + عطلة عيد الشكر بتنزل بعد نص ساعه تقريبا... متوقعين له فوق ال85 مليون.. يعني بشوي أقل من افتتاحية فروزن..
-------------------- [ المشاركات: 7335 | من: الامارات | تاريخ التسجيل: يوليو 2003
|
يعطيك العافية على التقييم الرائع.. استمتعت وانا أقراه وتقريبا نفس انطباعي عن الفلم
أحمد .. يله ما عليه الغالي كلها كم يوم وبتشوفون الفلم ان شالله .. ما بقى شي
رد مقتبس:بس عندي سؤال اخير ومشترك لكم انتو الاثنين .. شنو تقيمكم للثلث الاخير من الفيلم؟
الناس ماعندها الا هالجزئية يتكلمون عنها .. الكل يمدحها ومبهور فيها
يقولون لو فاز الفيلم بالاوسكار على زوتوبيا بيكون عشان هالفصل
نهاية مرضية جدا ناصر للفلم و حماسية.. يمكن النقاد عجبتهم لأنه بعد الهدوء اللي في النص الثاني الأحداث تسارعت و لحقوا يحطون مشهد صراع رائع نهايته شوي غير اعتياديه + 3 أغاني أو أغنيتين ونص من أروع ما يكون ..
نتايج البوكس أوفيس بتطلع بعد شوي ...
الله يعافيك مايد تسلم، وحتى مراجعتك ماشاء الله عليك توصل الفكرة اللي تبي تقولها بكم من سطر مثل مايقول ناصر ومايحتاي تكتب وايد
وبالنسبة لسؤال ناصر فجوابي تقريباً نفس مايد، لكن في نقطة كنت أسمع الناس يقولونها وهي إن فالنصف الثالث بيصير شيء غريب إنه يحدث بفيلم أميرات بشكل عام لكني ركزت وصراحة ماشفت ذاك الشيء الخارج عن الإطار اللي يقصدونه بصراحة ، هذا وأنا دخلت الفيلم للحين مرتين وناوي أدخله للمرة الثالثة بعد
بندر الفرق شاسع لأنه هالمقارنة غلط.. كان فروزن منزلينه كعرض تجريبي ف100 صالة عرض تقريبا لمدة أسبوع.. موانا منزلينه في أكثر من 3800 صالة عرض وماسووله عرض تجريبي.. المقارنة الفعلية بين الاثنين هم فروزن اللي دخل 93 مليون دولار في أول 5 أيام و موانا اللي دخل 81 مليون دولار في أول 5 أيام ... يعني الفرق بينهم 10 مليون بس ... بداية قوية جدا لموانا ومن أقوى افتتاحيات السنه والأحلى انه الأسبوع الياي ما بينزل ولا فلم .. يعني موانا احتمال انه يطلع الأول مره ثانيه .. مبروك هالنجاح الكبير لكل الفانز
[ نوفمبر 27, 2016, 10:16 AM: تم تحرير المشاركه من قبل: howtodeal ]
-------------------- [ المشاركات: 7335 | من: الامارات | تاريخ التسجيل: يوليو 2003
|
رد مقتبس: وبعدين فروزن ترى نجاحه كان استثنائي ومايتكرر .. يعني من الظلم وضع اي فيلم معاه
فروزن هو افاتار الرسوم المتحركة
محد يقدر عليه
بالضبط ناصر.. هذا الشي اللي فانز ديزني الأجانب أحسهم مب فاهمينه.. متحمس أشوف النتايج كيف بتكمل.. الكل خايف من فلم Sing اللي بينزل على نهاية ديسمبر.. النقاد وايد مادحينه ... بس موانا عنده شهر كامل يدخل فيه ملايين بدون منافس... أعتقد آراء الناس الايجابية بتخلي الفلم يطول في البوكس أوفيس...
-------------------- [ المشاركات: 7335 | من: الامارات | تاريخ التسجيل: يوليو 2003
|
مادري من وين طلع هالفيلم سنغ .. المشكلة اشكال الشخصيات والانميشن طالع رخيص .. بنقهر لو خذ الاضواء من موانا
المهم ماجد وحمدان بخصوص الثلث الاخير
اللي قريته هو ان التعقيد الموجود بالمعركة الاخيرة كان افضل بكثير من اللي صار بنهاية فروزن كونه بعد يحتوي على واحد من اكثر المعارك الاخيرة المعقده .. مشهد آنا لما تنزل تدور السا وهي على وشك التجمد وخروج هانز عشان يقتل السا وامتطاء كريستوف لظهر سفن عشان ينقذ آنا .. وكيف ان هالنقاط الاربعة كلها تجمعت بساحة عراك وحده والكاميرا كانت تنتقل بينهم بأقل قدر من التقطيع ..
يقولون المعركة الاخيرة بموانا تنفذت بعد بشكل مبهر اكثر منه
--------------------
المشاركات: 27170 | من: ~ NeverlanD ~ | تاريخ التسجيل: يوليو 2002
|