من طول الغيبات جاب الغنايم .. احس الخبر يتعلق بشركة التوزيع الجديدة اللي استلمت افلام ديزني بعد فيفا
رد مقتبس:المرسل الأصلي هو A M I R:
كويس انهم عارفين قيمتها بالمصري وما خبصوا ولعبوا فيها وغيروها
لا طبعاً الادارة الجديدة مش عارفين قيمتها ولا قيمة اي شي انعمل قبل فترتهم .. ولو بيدهم كان خبصوا ولعبوا بهالاغنية مثل مالعبوا بأغنية "بير الامنيات" من فيلم سنووايت لما انعادت بشكل جديد في شورت ميكي ماوس الاخير ..
اللي ساعد ان اغنية هاكونا متاتا تنفذ بجلدها وتتدبلج بالمصري هو توقيت العمل على الحلقه .. الحلقة تدبلجت بعز حملة ديزني لازم ترجع مصري .. ايام ماكانت الناس ثايره عليهم .. وقتها كانوا منصدمين ومش عارفين كيف يهدون اعصاب الناس .. من الربكه دبلجوا فيلم دوري مكس مصري وفصحى .. وهاكونا متاتا خلوها بالمصري .. لكن الحين وبعد ماهدت الحمله ومرت 5 شهور رجعت حليمه لعادتها القديمة ..
يعني لو جات الحين اغنية هاكونا متاتا بأي عمل جديد راح تكون بالفصحى
[ سبتمبر 19, 2016, 12:27 PM: تم تحرير المشاركه من قبل: [ L.O.V.E.R ] ]
--------------------
المشاركات: 27179 | من: ~ NeverlanD ~ | تاريخ التسجيل: يوليو 2002
|
امس كان يوم طووويل قضيته كله مع مدراء شركة فيفا وشوتنج ستارز من 10 لين 9 فليل وعزموني عالعشاء بس قلتلهم لا خلاص تعبت وبروح الصراحه انصدمت فيهم يعني هنود عاديين مب مرتبين ولاشي مايبين عليهم انهم مسؤولين
قعدت على انفراد مع كبيرهم تقريباً ساعتين قالي والله فيفا فلست بالكاااامل وكنا في مشكله كبيرة وشوتنج ستارز اشترتنا والحين قاعدين ننقل مكاتبنا عندهم والحين تقريباً بنبداء من الصفر وبنحتاج تقريباً ثلاث شهور لين ماتوقف على ريولنا مثل قبل واملنا كله في تومب رايدر تنجح مبيعاتها هني لان النسخة الي عربناها قبل وايد ساعدتنا فممكن تساعدنا نوصل للفانز الي عندك قتله اكيد ممكن قالي منو متابعيك فعددتله الدول بعدين نطيلته في موضوع ديزني قلت فرصة مابتتكرر قلته شوف الفانز يموت على شي معرب يعني تقدر غلاف ديزني الاصلي تحط عليه سليب كفور ويكون معرب صدقني بينباع بسرعه رهيبه , اذا صعب السليب وزعوا بوسترات تكون معربه قالي صدق ؟ يحبون هالشغلات قتله اي قام كتبها في ملاحظة قالي بتفاهم مع ديزني اذا ماوافقوا بنطبع بنفسنا بوسترات وبنوزع مع كل نسخة , قتله تعرف شركة الخيول قالي اي قتله الفانز يدورون نسخهم وبوستراتهم بس لانها معربه هذه وهي جديمة كيف لو الاصدارات الحين وسويتوا شي فخم شو تتوقع بتكون المبيعات ,,, الفكرة عجببته وايد وقال انه بينفذها في اقرب فرصة
قال بعد انهم ياااااا بيرجعون ايدو او انهم بيفتحون واحد ثاني مثله يركز بس على اصدارات الفيديو جيمز والافلام قتله حلو وحط مع كل اصدار جديد كولكتر اديشن خاصة بموقعكم بس فالناس بتضطر تشتري منكم عشان هالنسخة كتاب معرب بوستر معرب سليب كافور معرب الخ تكون حصريه على الموقع واذا ماقدرتوا توفرون موقع فتحوا صفحه رسمية على سوق . كوم مجاناً قالي هم حالياً متعاونين مع فيرجن لان فيرجن فتحوا متجر اون لاين
قتله بعد تعال ليش توزيعكم يتأخر في دول الخليج قالي الكويت والبحرين مافيها سوق قطر مره اجرأتهم سريعة ومره يطولون المصيبه الي عندنا السعودية ,, الوزارة الي تطلع التصاريح ماذكر شو اسمها تاخذ عنهم 2000 ريال في الامارات ياخذون عنهم بس 200 درهم قالي غير المبلغ هذا يكدسون الافلام في المخازن لحد واحد منهم يتفيج يروح يشغله فيلم يشوفه اوكي ينزل او لا والسالفه وايد تطول فقالي صرنا بدل ما اتم النسخ في مخزنهم تعفن صرنا نوزعها على دول الخليج لين ماحضرت جنابه يشوف الفيلم ويقول اوكي وقتها يتم عندهم كمية بسيطه تروح للسعودية خصوصا ان فالسعودية مافي غير فيرجن المحلات العادية كله كوبي ومسروق قالي نكون خسرنا 2000 على الفاضي لان الي يبقى مايسوى ربحه
رجعت فتحتله موضوع ايدو قتله الفانز الي فالسعودية كان ايدو افضل خيار الهم مب بس سريع حتى الشحن رخيص تحطموا بعد ماتوقف ماتعرف شو صار فيهم وقلت عندهم الاصدارات , قال خلاص وعد بنشوف الموضوع وبنحاول نفتح الموقع مره ثانية , قتله بعد نقطه مهم فتحوا اكاونتات فالتواصل الاجتماعي ونزلوا اخباركم اول بأول مع كل اصدار ولازم الي يكتب يكون عربي لا تحطون اجنبي لانه مابيعرف يتواصل مع الناس
وبس قلت ابشركم صح مافي شي رسمي لين الحين بس المهم ان وصلتلهم الفكره والناس متحمسه لشو وهو حسيته وايد عاجبتنه فكرة التعريب بس شكله لازم ياخذ تصريح من ديزني اول
عطاني رقم وايملي سكرتيرته ومديرة التسويق والاتصال وقالي تواصل معاهم وقوللهم اذا عندك اقتراحات بعد اذا في شي حابين تقولونه بكتب ايميل وبرسله لهم
وعلى السريع عطاني رقم وحده اسمها رانيا تدبلج افلام باربي من شركة سما ضفتها على الواتس عشان اسوي معاها مقابلة ,, تذكرة ناصر على طول
مرسله في
Orphan يعطيك العافية وماقصرت والاقتراحات بمحله ان شاء الله يسمعون لنا وينفذون المقترحات ، من ناحية تعريب غلاف النسخ مثل قبل مثل شركة الخيول ، وكذلك يتم اصدار خاص او غلاف معدني خاص لنا نبي اصدارات كشخه بدل الغلاف البلاستيكي العادي وبالاخير شكرا لك
المشاركات: 7 | من: الكويت | تاريخ التسجيل: سبتمبر 2016
|
يعطيك العافية احمد وماقصرت .. والله صج محتاجين نوصل لاصحاب القرار سواء بشركات التوزيع او حتى ديزني نفسها عشان يتعدل الوضع شوي ..
بخصوص تعريب الاغلفه تعبنا واحنا نتكلم من ايام روتانا .. اذكر لما نزل فيلم تانجلد كنت اكلم مدير الهوم اتنترتيمنت بكبره عن هالنقطه وكان فرحان بالاقتراح ومتحمس ويناقشني فيه بعد .. وكان وقتها المفروض فيلم النبيلة والشارد الاصدار الماسي راح ينزل .. فكان يقولي شنو لازم نكتب عالبوستر؟ السيدة والصعلوك؟ .. قلت له لاااع @@ .. لازم يتم استخدام العنوان الرسمي للفيلم نفسه .. وبعدها عرفت ان مافي امل بشركات التوزيع هالموضوع لازم يتم باشراف من مكتب ديزني العربي نفسه عشان لحد يخبص ..
وهنود فيفا يحليلهم فعلاً وايد متعاونين وطيبين وما استغربت انطباعك عنهم .. بس للاسف بعد ماغيروا ايميلاتهم وانتقلوا لشركة جديدة خسرت وسيلة التواصل الوحيدة معاهم .. عشان جذي ممكن انت تفيدنا احمد وتكون حلقة الوصل الجديدة اللي راح يربطنا فيهم ..
بخصوص توزيع افلام ديزني بدول الخليج .. غريبه ان البحرين تكون مثل الكويت وسوقها ضعيف .. فيفا لحد اخر فيلم "زوتروبوليس" كانت توزع بالبحرين بشكل قوي .. ممكن اتفهم كلامهم عن الكويت لان فعلاً سوق الافلام عندهم تعبان وحتى فيرجن ماصمد كثير وسكر والكوبي منتشر عندهم بشكل كبير .. بس البحرين ماحس .. وعمان شنو وضعها؟ .. والحمدلله ان سوق الافلام في قطر مايشكي من شي لول وحتى توزيع افلام ديزني عندنا مايتأخر وايد واجراءات الجمارك عندنا سريعة باغلب الاحيان .. بس المصيبه صج السعودية .. يعني التأخير كله هو بسبب اهمال الكميات اللي يتم ارسالها + مراقبة الفيلم والموافقه عليه .. هالموضوع حله بيد الفانز يروحون ويكملون الجهات المسؤولة بالبلد ..
وبخصوص باربي اظن تقصد رنا مو رانيا صح؟ .. لانها الصوت الرسمي الجديد لباربي .. صوتها روعه روعه .. تمثيل وغنا شي خيالي الصراحه .. تكلمت مره عنها بالدليل لما ماتيل نقلت افلام باربي من لبنان لمصر كان حدث وقتها لان افلام باربي ظلت تتدبلج في لبنان من بداية 2001 لحد 2015 يعني فترة مو بسيطة .. من كثر ماحبيت صوت رنا تمنيت لو ان مصرية ميديا عطوها اي دور بافلام ديزني لانها صج خامة مميزة ..
بس شنو مناسبة المقابلة اللي بتسويها معاها احمد؟ لتكون رنا هي الصوت الرسمي الجديد بعد حق لارا كروفت
عالعموم الف شكر على تفاصيل مقابلتك مع فيفا صج استمتعت وانا اقرا .. وبالتوفيق لشوتنج ستارز في مهمتهم الجديدة .. قلت لكم قبل وصدق توقعي ماراح يبدأون توزيع قبل نوفمبر .. محتاجين فترة على مايرتبون هالنقله الكبيره من شركة لشركة .. لكن الله يعينهم وراهم مبدئياً 4 اصدارات ضخمة جديدة لازم ينزلونها مره وحده .. اليس 2 / كتاب الادغال / دوري / زوتروبوليس .. غير افلام الشركات الثانية .. وغير الاصدارات اللي سبق ونزلت قبل سنتين ثلاثه واللي لازم ترجع تنطرح باسم الموزع الجديد ..
2016 مازالت تواصل تجددها واختلافها عن باقي السنوات اللي مرت ..
--------------------
المشاركات: 27179 | من: ~ NeverlanD ~ | تاريخ التسجيل: يوليو 2002
|
ناصر هو قال ان بيكلمهم وبيشوف شو يردون عليه حتى طلب مني فنانين ان ممكن يصمموله رسومات او بوسترات ويطبعهم مع الفيلم
لا اسمها رانيا حمندي مسوية باربي 2014
سويت معاها المقابلة خلاص ونزلتها وفي قائمة بأسماء اعمالها منهم سيرسي في جيمز اوف ثرونز
قالوا نادين طلبت مبلغ كبير وهم ماعندهم قدره على هالشي حالياً فضطروا يغيرونها
نسيت اعلق على موضوع البحرين اظن احمد بس يشتري ,, هو قال افلامهم تتوزع هناك عادي بدون مشاكل بس المبيعات مب وايد وايد يقول تقريبا الامارات وقطر اكثر دولتين
[ سبتمبر 19, 2016, 01:17 PM: تم تحرير المشاركه من قبل: Orphen ]
يعطيك العافية احمد . . الف شكر ع هالمقابلة وما قصرت قبل كم يوم كنت اتسائل بخصوص شركة التوزيع اليديدة ومتى راح يبدون الشغل، الامور كانت مبهمة لين ما وضحتلنا الموضوع
عاد الله يعينهم ع بداية الشغل، وايد افلام المفروض تنزل هالايام ولين الحين ما نزلت استانست انهم انعجبوا بسالفة تعريب البوسترات والاغلفة وان شاء الله يضغطون على ديزني وتتنفذ الفكرة في الاصدارات الياية. وزين يوم فتحتلهم موضوع ايدو واتمنى انهم يرجعون ويفتحون موقع يديد وان شاء الله يكون افضل عن اللي قبل
اهم شي انهم خذوا فكرة عن متطلبات الناس والاشياء اللي بتجذب الزبون وان شاء الله تتنفذ كل المقترحات
--------------------
المشاركات: 161 | من: الإمـارات العـربيـة المـتــحــدة | تاريخ التسجيل: أغسطس 2014
|
مرسله في
أحمد أخبارك رووعة وتفتح النفس ، عبرت عن كل شي بخاطرنا وحسيت كأننا جالسين معكم بالنسبة للسعودية ياليت وزارة الاعلام يحطوا حيلهم ويطبقوا قوانينهم على المحلات اللي تبيع نسخ مزورة بالشوارع الرئيسية وعلى عينك ياتاجر وبعدين يهتموا بمراقبة الافلام والتشديد على دخولها وفسحها اصلا غريب التشديد والمماطلة بالفسح في زمن الانفتاح واليوتيوب والسوشل ميديا والتناقض ان وزارة الاعلام بنفسهم مصرحين بقوات OSN اللي تبث انتاجات ديزني وافلام الانميشن والسينما والكبار قبل مايفسحوها عندنا ع العموم أنا متفائل بشركة شوتنج ستارز وحسيت انهم فعلا جادين ومو حابين يكررون اخطاء الموزعين قبل واذا بقترح عليهم شي فهو ضروري يهتموا بمسألة الأسعار ويخفضوها شوي عشان التشجيع والمنافسة لأنه فيه ناس ماعندها استعداد تدفع 120 او 90 ريال على فيلم وهو موجود كوبي بـ 15 ريال ولو خفضوا السعر هالشي راح يزيد من مبيعاتهم مع انه صعب لأنهم يدفعوا مبالغ كبيرة لحقوق ديزني
+ خبر استبدال نادين نجيم من لعبة تومب رايدر فاجأني ! بالعكس انا حبيت ادائها بالجزء الماضي صح كانت بارده بمقاطع لكن نبره صوتها فيها من شخصية وروح لارا كروفت و أتمنى انك سألتهم ليش مادبلجوا اللعبة لما نزلت حصرية على الأكس بوكس 1 ؟
رد مقتبس:المرسل الأصلي هو [ L.O.V.E.R ]:
وكان وقتها المفروض فيلم النبيلة والشارد الاصدار الماسي راح ينزل .. فكان يقولي شنو لازم نكتب عالبوستر؟ السيدة والصعلوك؟
الاسم يجيب الجلطة من الضحك نفسي اعرف وش كانوا ناوين يكتبون على بوسترات الافلام الثانية
المشاركات: 3077 | من: المملكة العربية السعودية | تاريخ التسجيل: يوليو 2011
|
اتوقع السبب الرئيسي انهم يدورون الارخص والي مابيكلفهم مبلغ كبير هذا الي فهمته يوم قال نادين اجرها كبير ونحن تونا بادين وضطرينا ندور حد ثاني واتوقع مصر اغلى سعرهم
اللبنانيين هذي طريقتهم فالدبلجة من ايام المكسيكي مره حطوا برنامج كيف يسجلون ماريا مرسيدس وكانوا كلهم قاعدين ويشربون كوفي هههههه
اصلا حتى المصرين تشوفهم واقفين فالدبلجة فمادري بلاد الشام من وين طلعوا بطريقة انهم يدبلجون وهم على مكتب
عموماً مبدئياً ماحبيت الدبلجة الصوت ماكان راكب عليها حتى يوم لارا تصرخ او تتألم يا تسمع صوت الممثلة البريطانية او ينكتم الصوت استغربت من هالحركة غير هذا كله الموسيقى اعلى من الصوت نفسه
.....
معقول شيرين تمثل موانا ولا يغره من تامر حسني لان دايماً بينهم خلافات
.....
خالد
بالضبط ادائها بارد بس صوتها جداً قريب من الممثلة الاصلية قلتلهم هالملاحظة
بخصوص سؤالك انا مابفكرش انا عارف انا شغال مع كريستال داينمكس والسبب ان الاكسبوكس سوقها تعبان في المنقطه وهم الي دافعين على الدبلجات فقاموا استثنوا العربي
سوني لان سوقها اقوى دفعوا مبلغ ونزلت اللدبلجة حصرية على جهازهم بس
احمد فعلا يعطيك الف الف الف عافية انك قدرت توصل صوتنا بكل صغيرة وكبيرة للجهة المسؤولة وصار عندهم علم كافي و وافي بكل شي ، واشكرك من قلب فعلا انك نبهتهم بخصوص الوضع بالسعودية وشلون نعاني من هالموضىوع وقد ايش كان موقع ايدو موفر لنا كل شي وكان الموقع ماشي سوقه على ما اظن وبدليل ان افلام ديزني كانت تدخل توب 10 كاعلى مبيعات عندهم وعلى سبيل المثال سندريلا وبنفس الوقت ايدو صارت ذكرياته حلوة بالدليل بيننا كنا نتسابق مين يوصله الفيلم قبل الثاني لوول مرات ناصر قبل ومرات وسيم ومرات انا ومن اهم المرات اللي ما انساها لما وصلني ماليفسنت قبل الكل من اللحظات التاريخية اللي ما انساها بالنسبة لي
عموما ... اتمنى فعلا هالمرة ياخذون كلامنا بعين الاعتبار ويطبقون عالاقل شي منه وانا متاكد راح يشوفون شي ما شافوه قبل لوول متى بس
ومشكووور احمد مرة ثانية
--------------------
المشاركات: 1978 | من: K.S.A - Jeddah | تاريخ التسجيل: أغسطس 2011
|
مرسله في
أحمد ولد بلادي، ماقصرت حبيبي عالأخبار الحلوة والسنعة، عاد أتمنى إن الكلام اللي قلته لهم يطبقونه خاصة إن هم في أمس الحاجة لجذب الأنظار وزيادة المبيعات بأي شكل لضمان بقاء هالبزنس قائم بشكل صحيح ومقبول عالأقل، هالفرصة الأخيرة أحس لنا، وبعدها لازم نتريا شركة من تحت الأرض تطلع وتوزع لنا ، والمشكلة إن فيفا كانت ماسكة توزيع أغلب شركات هوليوود، مب بس ديزني ، إن شاء الله كل شيء يرجع مثل قبل وأحسن بعد
مرسله في
الاقتراح هو ان يتم اعادة بيع الاصدارات القديمه لو نزلت ك سبشل ادشن او غيره لان اعتقد ناصر قبل قال انهم ماراح يبيعون اي فلم قديم وما يبون يكررون خطأ فيفا اللي للحين الافلام في مخازنهم بكميات كبيره
فالافضل يستمرون في طرحهم ولكن كميات اقل هالشي اشوفه مناسب وشوف ردهم على هالنقطه ..
يعطيك العافيه
--------------------
المشاركات: 63 | من: Qatar | تاريخ التسجيل: أغسطس 2016
|
إرسال هذه الصفحه لصديق!
لطباعه هذا الموضوع
![الملف الشخصي لـ [ L.O.V.E.R ]](http://salmiyaforum.net/ubb/profile_ubb6.gif)
![[pleased]](graemlins/pleased.gif)
![[worried]](graemlins/worried.gif)
![[crazy]](graemlins/crazy.gif)
حسيت اني مكشوف
![[eyelove]](graemlins/eyelove.gif)
من 10 لين 9 فليل وعزموني عالعشاء بس قلتلهم لا خلاص تعبت وبروح الصراحه انصدمت فيهم يعني هنود عاديين مب مرتبين ولاشي مايبين عليهم انهم مسؤولين ![[Big Grin]](biggrin.gif)
ضفتها على الواتس عشان اسوي معاها مقابلة ,, تذكرة ناصر على طول
![[heartpump]](graemlins/heartpump.gif)
![[rose]](graemlins/40.gif)
، عبرت عن كل شي بخاطرنا وحسيت كأننا جالسين معكم![[rofl]](graemlins/rofl.gif)
![[applause]](graemlins/applause.gif)
![[crying]](graemlins/crying.gif)
